ქართველი ჟურნალისტი, დავით კიკალიშვილი, რომელიც ამჟამად შვედეთში ცხოვრობს და მოღვაწეობს, ქვეყანაში არსებულ მდგომარეობას სოციალური ქსელით ეხმაურება. გთავაზობთ მის პოსტს.

"დღეს შვედეთის პრემიერმინისტრი სტეფან ლოვენი და მთავარი ეპიდემიოლოგი ანდერს ტეგნელი სიკვდილს, რეალობაში, ჭადრაკს ეთამაშებიან და არავინ იცის ვინ გამოვა გამარჯვებული. შვედეთი ევროკავშირის ერთადერთი ქვეყნაა, რომელმაც კარანტინის მკაცრ რეჟიმზე უარი თქვა. სტრატეგია: ჯგუფური იმუნიტეტის გამომუშავება, რისკჯგუფების იზოლაცია და სამუშაო ადგილების შენარჩუნებაა.(შესაძლოა ამ სტრიქონების წაკითხვისას ვითარება შეიცვალოს)
ამ თამაშში, რომელშიც საზოგადოების ეკონომიკური სტაბილურობის შენარჩუნება მთავარი მიზანია, ბრიტანეთი დამარცხდა, ბორის ჯონსონი რეანიმაციაში კოვიდ19-ს ებრძვის. შეერთებულ შტატებში, ეკონომიკურად მსოფლიო ლიდერი, ნიუ-ორკი თითქმის უბედურების ზონად გამოცხადდა და შესაძლოა ამ პანდემიამ, პრეზიდენტ ტრამპის პოლიტიკური კარიერა გადაიყოლოს.

შვედეთზე კლიშეები: მეფე, სოციალიზმი, ვიკინგები, იკეა, კარლსონი, Volvo, ხოკეი, H&M-ი, Ericsson-ი, ნობელი, ABBA, LEGO და ტუნბერგი.

შვედეთის ყველა, უშუალო მეზობლებმა და ევროკავშირის უმრავლესმა წევრმა სახელმწიფოებმა ხისტი საკარანტინო ზომები მიიღეს, მიუხედავად ამისა ქვეყანამ ღიად დატოვა საზღვრები, საჰაერო და საზღვაო პორტები, როგორც საწარმოები, რესტორნები, ბაღები და სკოლები.
კორონა ვირუსით პირველი დაავადებული შვედეთში 16 თებერვალს დაფიქსირდა, დაავადებულთა და გარდაცვლილთა რიცხვმა მარტის დასაწყისიდან საგრძნობლად იმატა. ქვეყნის პრემიერმა, სტეფან ლოვენმა კი თავისი პოლიტიკა ასე ახსნა: ყველა ზრდასრულმა მოქალაქემ საკუთარ თავზე უნდა აიღოს პასუხისმგებლობა. არ არის საჭირო ჭორებს აყოლა და პანიკა. არავინ დარჩება ყურადღების მიღმა, მაგრამ აქვე მნიშვნელოვანია ეკონომიკური სტაბილურობა. ამ სტრატეგიის სულისჩამდგმელმა, შვედეთის მთავარმა ეპიდემიოლოგმა ანდერს ტეგნელმა კი განაცხადა: ჩვენ ვერ დავანგრევთ, დრაკონული მეთოდებით, საზოგადო ცხოვრებას. პრობლემას წერტილოვანი დარტყმებით უნდა ვებრძოლოთ.
საგანგებო ზომები თანდათანობით უნდა შემოვიღოთ, რომ საზოგადოება ამას გაგებით მოეკიდოს და მოქალაქეების ფსიქიკაზე ეს ნაკლებად აისახოს. ჩვენ არ გამოვრიცხავთ, რომ შესაძლოა, დაავადების გავრცელების პიკზე, ხისტი ნაბიჯები გადავდგათ და ამ დროს არ გვჭირდება კარანტინით გათანგული მოსახლეობა, რომელსაც ერთი სული ექნება, რომ გარეთ გამოიქცეს, აცხადებენ შვედეთის საზოგადო ჯანდაცვის სამსახურში.
მთავრობამ მხოლოდ რეკომენდაციები გასცა სოციალურ დისტანცირებასა და რისკჯგუფების იზოლაციაზე. დახურა მხოლოდ უმაღლესი სასწავლებლები და 50ადამიანზე მეტი შეკრებები აკრძალა. დღეისათვის, შვედეთში, ბევრი დისტანციურად მუშაობაზე გადავიდა. 20%ით შემცირდა ქალაქებში მოსიარულეთა რიცხვი და 50%ით საზოგადო ტრანსპორტით სარგებლობა. ბევრი კინოთეატრი, თეატრი და კურორტი თავისი ინიციატივით დაიხურა. გაუქმდა მასობრივი ღინისძიებები. რესტორნებმა და კაფეებმა შეამცირეს მაგიდების რაოდენობა. ხალხი ნაკლებად მოგზაურობს ქვეყნის შოგნით. სხვათაშორის სამედიცინო დიპლომის მქონე პოლიტიკოსები საავადმყოფოებსა და კლინიკებში წავიდნენ სამუშაოდ. შვედურმა საზოგადოებამ შესაშური დისციპლინა და თვითშეგნება გამოავლინა.
მაგრამ გაამართლებს თუ არა ამ საჭადრაკო პარტიის ასეთი სტრატეგია?
ჯერ-ჯერობით ავადმყოფებს გართულებების გარეშე სახლში მკურნალობას ურჩევენ. ქვეყანამ მასობრივ ტესტირებაზე უარი თქვა. ახლა მთავარია სხვა მეთოდებით გავთვალოთ თუ რა დაწოლა იქნება სამედიცინო სექტორზე, ხოლო ტესტირება მძიმე ავადმყოფებს და რისკჯგუფებს ჩაუტაროთ, როგორიცაა მაგ. ექიმები და ქრონიკულად დაავადებულები, აცხადებენ შვედეთის ჯანდაცვის სისტემაში. ქვეყნის მთავარ ეპიდემიოლოგ ტეგნელს იმედი აქვს, რომ ამ პერიოდში საზოგადოება კოლექტიურ იმუნიტეტს გამოიმუშავებს და თუ გავრცელების პიკზე, მას აპრილის ბოლოს მაისის დასაწყისში ელიან, სიკვდილიანობა კატასტროფული არ იქნება ქვეყანა გადალახავს ამ კრიზისს. ის დარწმუნებულია, სანამ ვაქცინა არ არსებობს კოლექტიური იმუნიტეტია გამოსავალი, მაგრამ არა თვითმიზანი.
შვედეთს ამ ვითარებაში გარკვეული შეღავათები აქვს. 10 მილიონიანი მოსახლეობის მქონე ქვეყანა, ტერიტორიის სიდიდით მე-5 ეა ევროპაში და მაცხოვრებელთა სიმჭიდროვე ნაკლებია, ვიდრე იგივე ნიუ-ორკის შტატში. საოჯახო მეურნეობების 50% ერთი ან ორი ადამიანისაგან შედგება განსხვავებით იგივე იტალია-ესპანეთისაგან სადაც უფრო დიდი ოჯახებია ხანშიშესული წევრებით. ევროპაში, შვედეთი ლიდერია ცალკე ბინებისა თუ სახლების რაოდენობით და მოშორებულია პანდემიის გავრცელების კერებს. სხვა ქვეყნების მიერ შემოღებულმა კარანტინმა შეანელა ვირუსის გავრცელება და ამ დროის განმავლობაში გამოიკვეთა მკურნალობის მეთოდები. მაგრამ
შვედეთში სიკვდილიანობა უფრო მაღალია, ვიდრე მეზობელ სკანდინავიურ ქვეყნებში? ბევრი კითხვა გაჩნდა სტატისტიკის სიზუსტესა და დროულ გამოქვეყნებასთან დაკავშირებით. საპირწონედ ცხადდება, რომ გარდუვალი მსხვერპლი მაინც იქნება და აქ კრიტიკულია არა დრო არამედ ეყოფა თუ არა შვედეთს არსებული სამედიცინო რესურსები? ხელისუფლებამ უკვე დაიწყო საველე ჰოსპიტლების გამართვა, მაგრამ შვედურ საზოგადოებაში არ მალავენ შეშფოთებას არსებული პოლიტიკის მიმართ. ასე გაზეთი ექსპრესსენი წერს: როდესაც 10წლის წინ მოიხსნა სააფთიაქო მონოპოლია, გაუქმდა სახელმწიფოს მიერ წამლებით უზრუნველყოფის ვალდებულება. ჩვენი ჯანდაცვის სისტემა ძალზე დეცენტრალიზებულია და ახლა, სასწრაფო რეჟიმში, გვიხდება სახელმწიფოს მიერ მარაგების შევსება. გამოცემა აფტონბლადეტი ამატებს: ჩვენ პრობლემას ვერ გავართვით თავი. რეანიმაციის ადგილები ისედაც ნაკლები იყო შვედეთში, სამხედრო ჰოსპიტლები კი შთამბეჭდავია, მაგრამ მხოლოდ ორია და თუ მოვლენები ცუდი სცენარით განვითარდა, არ გვეყოფა არც სასუნთქი აპარატები, არც მედიკამენტები და არც მომზადებული პერსონალი. ყველას დაგვაგვიანდა! როგორც მთავრობას ისე საზოგადოებას, რომ ამ საკითხის გარშემო დისკუსია წამოგვეწყო.
ორიათასმა შვედმა მეცნიერმა ღია წერილი გაავრცელა შეზღუდვების გამკაცრებისა და დიდი ქალაქების ჩაკეტვის მოთხოვნით.

დღეს, როდესაც ჩინეთმა გამოაცხადა, რომ დაამარცხა ეპიდემია და ეკონომიკა თავიდან ამოქოქა, ბევრ ევროპულ ქვეყანაში გაჩნდა ცთუნება შეარბილონ საკარანტინო რეჟიმი. ავსტრიაში, რომლის მთავრობამ განაცხადა, რომ აპრილის ბოლოდან, იმის დათქმით თუ ვითარება არ გამწვავდა, ზოგიერთ შეზღუდვას მოხსნის, მხოლოდ სავაჭრო ქსელმა ერთ თვეში სამი მილიარდი ევროს ზარალი ნახა, ციფრები ბევრად, ბევრად დიდია გერმანიაში, ბრიტანეთსა თუ საფრანგეთში. ყველაზე ოპტიმისტური გათვლებით ევროპული ეკონომიკა, 2021 წლის პირველ ნახევარში თუ დაუბრუნდება სამი თვის წინანდელ მაჩვენებლებს.
შვედეთს ახლა ევროპაში და ალბათ მთელ მსოფლიოში ლაკმუსის ქაღალდივით დაჰყურებენ.

როგორ დამთავრდება სიკვდილთან ჭადრაკის ეს პარტია?"

დავით კიკალიშვილი.