ავსტრიაში 1994 წელს ჩავედი, მსოფლიოში წამყვან მუსიკალურ უნივერსიტეტში, ზალცბურგის მოცარტეუმში სწავლის გასაგრძელებლად. საკმაოდ რთული გამოცდები ჩავაბარე, 170 მსურველიდან 9 შეგვარჩიეს და სტუდენტი გავხდი. 2002 წელს წარჩინებით დავამთავრე მოცარტერიუმი და ხელოვნების მაგისტრის დიპლომი ავიღე. 2003 წელს დამაჯილდოვეს ღირსების ორდენით, რომელიც მთელი ავსტრიის მასშტაბით წელიწადში მხოლოდ ერთ ხელოვანზე გაიცემა. ამავე წელს მქონდა მოსმენა აუსბურგის (გერმანია) ოპერაში, სადაც 83 ტენორს შორის ამომარჩიეს და ასე დაიწყო ჩემი საოპერო კარიერა ევროპაში.
უამრავ საოპერო თეატრში მთავარი როლი შევასრულე, მქონდა კერძო გაკვეთილები და უდიდესი გამოცდილება დამიგროვდა. ჩემი გამოსვლებიდან გამოვარჩევდი ლუიზა მილლერს ბერლინში, მასნადიერის ციურიხში, ვერდის რექვიემს იერუსალიმში, ბოჰემას კოპენჰაგენში, ჯამბაზები ვენაში, ოტელოს ბელგრადში, ევგენი ონეგინს ტაიპეში და მრავალ სხვას. უახლოეს მომავალში საქართველოში ვაპირებ კონცერტის გამართვას. მიზნად მაქვს რიხარდ ვაგნერის ტანჰოიზერის და ტრისტანი და იზოლდას შესრულება.
მუსიკაში წარმატება მაშინ მოდის, როდესაც მუსიკოსი განვითარებას და პროგრესს არ წყვეტს, როგორც კი კმაყოფილებით განვითარებას შეაჩერებს, მაშინ იწყება დაღმასვლა. ხელოვნებას კომპრომისი არ უყვარს. დამწყებ მუსიკოსებს ვურჩევდი, რეალურად შეაფასონ შესაძლებლობები, ოპტიმალურად გამოიყენონ მოცემული შანსები, ბევრი იმუშაონ საკუთარ თავზე და გააგრძელონ სვლა წინსვლისკენ.