საფრანგეთში სტაჟირების მიზნით 2009 წელს ჩამოვედი ექს-მარსელის უნივერსიტეტის ლაბორატორიაში. სადაც სწავლა გავაგრძელე ფუნდამენტური ფარმაკოკინეტიკის და მათემატიკური მოდელირების განხრით. ასევე განათლება მივიღე კლინიკური და პოსტ კლინიკური კვლევების მიმართულებით მარსელის, გრენობლის და ლიონის სამედიცინო უნივერსიტეტებში.
პირველი სამსახური ქ. მარსელის შეზღუდული შესაძლებლობის მქონე ბავშვთა ინსტიტუტში მქონდა, სადაც იშვიათი და ძალიან იშვიათი დაავადებების მქონე ბავშვებს ვიკვლევდით. ორმა ინსტიტუტმა, ჩვენი კვლევების საფუძველზე, დაახლოებით ერთი მილიონი ევროს დაფინანსება მიიღო იმისათვის, რომ გაეუმჯობესებინათ ინსტიტუტში მყოფი იშვიათი დაავადების მქონე ბავშვთა ცხოვრების ხარისხი. 2015 წელს მოვიპოვე კიდევ ერთი მაგისტრის ხარისხი საზოგადოებრივი ჯანდაცვის მიმართულებით - ინოვაციურ ტექნოლოგიებსა და პროექტების მართვაში, რის შემდეგაც მუშაობა დავიწყე ქ. გრენობლის საუნივერსიტეტო საავადმყოფოს კლინიკური ფარმაკოლოგიის დეპარტამენტში, სადაც კოორდინირებას ვუწევ მონო და მულტიცენტრულ კვლევებს ნევროლოგიის, ენდოკრინოლოგიის და ონკოლოგიის მიმართულებით. ერთ-ერთი მნიშვნელოვანი კვლევა, რომლის კოორდინატორიც გახლავართ, ეხება ინსულტ გადატანილ პაციენტებში ღეროვანი უჯრედების გამოყენებას. კვლევის პირველი ფაზა წარმატებით დავასრულეთ და ველოდებით საბოლოო ანალიზის შედეგებს. 2020 წლის COVID-19-ის პანდემიიდან გამომდინარე, აქტიურად ვარ ჩართული სხვადასხვა საერთაშორისო, როგორც ეპიდემიოლოგიურ, ასევე ვაქცინების კვლევებში.
გასულ წელს, ჩემი ყოფილი ლექტორის შემოთავაზებით, ვიყავი თბილისის სახელმწიფო სამედიცინო უნივერსიტეტის ფარმაცევტული ფაკულტეტის სამაგისტრო ნაშრომის ერთ-ერთი ხელმძღვანელი. მიხარია, რომ ჩვენმა კვლევამ და მაგისტრანტმა საუკეთესო შეფასება მიიღეს. მომავალშიც ვაპირებ აქტიურ თანამშრომლობას როგორც სამაგისტრო, ასევე სადოქტორო პროგრამების მიმართულებით, რადგან მიმაჩნია, რომ მეცნიერების ხელშეწყობა და დასავლური სამეცნიერო გამოცდილების გაზიარება საქართველოსთვის ძალიან მნიშვნელოვანია.
გარდა ამისა, 2016 წლიდან ვხელმძღვანელობ ასოციაციას « ქართველები საფრანგეთში » , რომელიც ახორციელებს როგორც საგანმანათლებლო, ასევე საქველმოქმედო პროექტებს საფრანგეთსა და საქართველოში.
სტუდენტებს მინდა ვუთხრა, რომ სწავლას და შრომას აუცილებლად მოაქვს წარმატება. როგორც ძველი ბერძენი ფილოსოფოსი იტყოდა, მსოფლიო დგას სამ მნიშვნელოვან საფუძველზე: ეს არის განათლება, შრომა და თანადგომა. დღეს საქართველოს, როგორც არასდროს ისე სჭირდება კარგი განათლების მქონე ახალგაზრდები, რომლებიც შეძლებენ შრომით და ერთმანეთის თანადგომით გამოიყვანონ ჩვენი ქვეყანა კრიზისიდან და გააერთიანონ წარმატებული ქვეყნების რიგებში.