,
თურქეთის გაზეთ „ევრენსელში“ (Evrensel) დაბეჭდილია სტატია სათაურით „ის, ვინც უკრაინაში „მშვიდობაზე“ ლაპარაკობს, ომს აღვივებს“ (ავტორი - იუჯელ ოზდემირი). „უკვე ახლავე ჩანს, რომ შვეიცარიაში დაგეგმილი სამშვიდობო კონფერენცია, რომელიც 15-16 ივნისს უნდა ჩატარდეს, ომის გრძელვადიანი შეწყვეტისა და დასრულების საკითხში ვერანაირ ქმედით დადგენილებას ვერ მიიღებს“, - ნათქვამია პუბლიკაციაში.
გთავაზობთ სტატიის მოკლე შინაარსს:
რუსეთ-უკრაინის ომის დასრულების არავითარი ნიშან-წყალი არ ჩანს. ამჟამად მიმდინარეობს მზადება „მშვიდობის სამიტის“ ჩასატარებლად შვეიცარიაში, რომელსაც მხარს უჭერენ უკრაინა და მისი დასავლელი მოკავშირეები, მაგრამ მეორე მხრივ, გერმანიამ და ამერიკის შეერთებულმა შტატებმა მოიწონეს და დაეთანხმნენ კიევის განზრახვას დაბომბოს რუსეთის ტერიტორია შორსმოქმედი იარაღით, რომლებიც მათ უკრაინას გადასცეს.
გერმანიის კანცლერი ოლაფ შოლცი რამდენიმე ხნის წინ გერმანული იარაღის გამოყენებას უშუალოდ რუსეთის ტერიტორიაზე მდებარე ობიექტების წინააღმდეგ „წითელ ხაზად“ თვლიდა. ბერლინი აცხადებდა, რომ ასეთი მოქმედება მოსკოვისა და ნატოს ერთმანეთთან შეტაკებას გამოიწვევდა, თუმცა ამჟამად კანცლერმა უარი თქვა თავის ადრინდელ პოზიციაზე და სამტავრობო კოალიციურ პარტნიორებთან - „მწვანეებთან და „თავისუფალ დემოკრატებთან“ ერთად, აგრესიულ და მეომრულ პოლიტიკაში ჩაერთო. გერმანიის მიერ ამასწინათ უკრაინისათვის გადაცემული თვითმავალი საარტილერიო დანადგარი Panzerhaubitze 2000 და ზალპური ცეცხლის რეაქტიული სისტემა Mars II განკუთვნილნი არიან რუსეთის ტერიტორიაზე მდებარე სამიზნეებისათვის.
რაც შეეხება ჯო ბაიდენს, აშშ-ის პრეზიდენტმაც, ფაქტიურად, ნება დართო უკრაინელ სამხედროებს ამერიკული სარაკეტო სისტემები რუსეთის ტერიტორიაზე მდებარე ობიექტების გასანადგურებლად გამოიყენონს.
მართალია, ბერლინიც და ვაშინგტონიც კიევს მიუთითებენ, რომ ამერიკული და გერმანული იარაღი მხოლოდ ხარკოვის ოლქში უნდა გამოიყენონ და მხოლოდ რუსეთის საზღვრისპირა ზოლში, მაგრამ ყველამ ძალიან კარგად იცის, რომ ბრძოლის ველზე სხვანაირად იქნება. რასაკვირველია, დიდი ალბათობით, რუსეთი შესაბამის საპასუხო ნაბიჯებს გადადგამს. ასევე არ არის გამორიცხული, რომ რუსეთსა და ნატოს შორის სეტაკების საფრთხე გაიზრდება, რაც ალიანსში დავას გამოიწვევს. თუმცა საინტერესეოა ის ფაქტი, რომ გერმანია და აშშ გადაწყვეტილებებს ჩრდილოატლანტიკური ალიანსის ჩარჩოებში კი არ იღებენ, არამედ ცალკე მოქმედებენ და ნაბიჯებს ნატოელ პარტნიორებს არ უთანხმებენ. ალბათ, ვაშინგტონი და ბერლინი ერიდებიან იმას, რომ ნატოში რომელიმე წევრი ქვეყანა ვეტოს დაადებს უკრაინის დახმარებას შორსმოქმედი შეიარაღებით.
თუმცა ამ მხრივ ამერიკას და გერმანიას არც უსუალოდ ნატოს ხელმძღვანელობა არ ჩამორჩება - ალიანსის გენერალურმა მდივანმა იენს სტოლტენბერგმა ამას წინათ პრაღაში, როცა 32 წევრი ქვეყნის საგარე საქმეთა მინისტრების თათბირზე სიტყვით გამოვიდა, მათ მოუწოდა, რომ უკრაინას ყოველწლიურად 40 მილიარდი ევროს ფინანსური დახმარების გამოყოფა უზრუნველყონ. მოსალოდნელია, რომ გენმდივნის წინადადება ნატოს ვაშინგტონის სამიტზე იქნება განხილული, მიმდინარე წლის ივლისში. თუ მართლაც ყოველწლიურად მხოლოდ ნატოს ხაზით 40 მილიარდი ევრო იქნება შეგროვებული უკრაინისათვის, კიევი ომს აუცილებლად გააგრძელებს და მშვიდობაზე ლაპარაკი მხოლოდ ლიტონ სიტყვებად დარჩება.
გარდა ამისა, დამკვირვებლები მიუთითებენ, რომ ასეთი ხერხით ნატო უკრაინისათვის დახმარების გარანტირებას ფიქრობს - თუ დონალდ ტრამპი აშშ-ის პრეზიდენტი გახდება, კიევს ის მხარდაჭერას შეუმცირებს, 40 მილიარდი ევროს კი იგი ვერ დაემუქრება.
შვეიცარიის ნიდვალდენის კანტონში დაგეგმილი სამშვიდობო სამიტის მიმართ მსოფლიოში საკმაოდ მნიშვნელოვანი წინააღმდეგობრივი დამოკიდებულება არსებობს.
ჯერ ერთი, რომ სამიტზე რუსეთი არ არის მიწვეული. მეორე - სამიტს არ ესწრებიან არც ჯო ბაიდენი და არც სი ძინპინი - პირველი პიროვნულად (ჯო ბაიდენი წინასაარჩევნო კამპანიის ჩარჩოებში ჰოლივუდელ მსახიობებს ხვდება შეწირულებების მისაღებად, შვეიცარიაში ვიცე-პრეზიდენტი კამალა ჰარისი უნდა ჩავიდეს), მეორე კი - სახელმწიფოს მასშტაბით, ანუ თუ სი ძინპინი არ იქნება, ეს ნიშნავს, რომ პეკინიდან სამიტზე არავინ არ ჩავა.
საინტერესოა, რომ სინგაპურში ყოფნისას, ამ რამდენიმე დღის წინათ, უკრაინის პრეზიდენტმა ვოლოდიმირ ზელენსკიმ ჩინეთი შვეიცარიის სამიტის ჩაშლის მცდელობაში დაადანაშაულა - პეკინი რიგი ქვეყნების მთავრობებზე ზეწოლას ახდენს, რომ მათ კონფერენციაში მონაწილეობა არ მიიღონო.
საერთაშორისო მასმედიის ცნობით, მსოფლიოს 193 წვეყნიდან (გაეროს წევრებიდან) შვეიცარიის სამიტში 106 ქვეყანა მონაწილეობს, რომელთა ლიდერები ან თვითონ დაესწრებიან, ან თავიანთ წარმომადგენლებს გაგზავნიან. სხვათა შორის, BRICS+ის ბევრი წევრი ქვეყანა სამიტში არ მონაწილეობს - შვეიცარიაში, ჩინეთის, რუსეთისა და ბრაზილიის გარდა, არ იქნება ირანი, ეთიოპია, საუდის არაბეთი და სხვები. რაც შეეხება თურქეთს, ანკარა სამიტს დაესწრება.
წყარო: https://www.evrensel.net/haber/520051/ukraynada-baris-diyenler-savasi-korukluyor
ბრიტანულ „დეილი ტელეგრაფში“ (The Daily Telegraph) გამოქვეყნებულია სტატია სათაურით „ტრამპმა პუტინისათვის დრო ისე გამოთვალა, რომ სანქციებით მაქსიმალურ შედეგს მიაღწიოს“ (ავტორი – კონ კოფლინი). პუბლიკაციაში განხილულია აშშ-ის პრეზიდენტის მიერ რუსეთის წინააღმდეგ მიმართული მეორადი სანქციების ათდღიანი ვადა და მოცემულია მათი სავარაუდო შედეგები.
გთავაზობთ სტატიას შემოკლებით:
დონალდ ტრამპმა, ალბათ, ყველაზე საუკეთესო და შესაფერისი დრო შეარჩია თავისი მეორადი ეკონომიკური სანქციების ახალი ვადის გამოცხადებისათვის, რომ რუსეთს ნავთობისა და გაზის გაყიდვით მიღებული შემოსავლები შეუმცირდეს და უკრაინაში ომი შეწყვიტოს.
დონალდ ტრამპს სამჯერ ეგონა, რომ ვლადიმერ პუტინი სამშვიდობო მოლაპარაკების აუცილებლობაში დაარწმუნა, მაგრამ სამჯერვე, როგორც კი სატელეფონო საუბარი მთავრდებოდა, რუსეთის არმია უკრაინული ქალაქების დასაბომბად რაკეტებსა და დრონებს უშვებდა.
აშშ-ის პრეზიდენტის მხრიდან იმის დაგვიანებული აღიარება, რომ „პუტინი მას თურმე ათამაშებდა და ომის გასაგრძელებლად დროს იგებდა“, იმას ნიშნავს, რომ როგორც იქნა, „ტრამპი აბობოქრდა“ და თავის რუს კოლეგას ათდღიანი ვადა დაუწესა ცეცხლის შესაწყვეტად. თუ კრემლი თეთრი სახლის მოთხოვნას არ დაეთანხმება, ძალაში შევა ახალი მომატებული საბაჟო ტარიფები იმ ქვეყნების მიმართ, რომლებიც რუსეთისაგან ნავთობს ყიდულობენ. სანქციის მიზანი და განხორციელების პროცედურა ასეთია: აშშ რუსული იაფი ნავთობისა და გაზის მოყვარული ქვეყნების – ინდოეთის, ჩინეთის (და ალბათ, თურქეთის და სხვების) მიერ წარმოებულ იმპორტირებულ პროდუქციაზე მომატებულ საბაჟო ტარიფებს დააწესებს. მათი ფასი იმდენად გაძვირდება, რომ ამერიკაში მყიდველი აღარ ეყოლება, ანუ ინდური და ჩინური კომპანიები დაზარალდებიან. ზარალის თავიდან ასაცილებლად იგივე ქვეყნები იძულებულნი გახდებიან, რომ რუსეთისაგან ნავთობისა და გაზის შესყიდვა შეწყვიტონ, რის შედეგადაც რუსეთს შემოსავლები შეუმცირდება, ანუ კრემლს აღარ ექნება თანხები უკრაინასთან ომის გასაგრძელებლად. რუსეთი ცეცხლს შეწყვეტს და სამშვიდობო მოლაპარაკებაზე დათანხმდება.
კონგრესში ზოგიერთი დეპუტატი უფრო რადიკალურად არის განწყობილი, რომლებიც 500%-იან სანქციების დაწესებას მოითხოვენ.
უეჭველია, რომ დონალდ ტრამპი სერიოზულად არის განწყობილი. თუ გავითვალისწინებთ იმ ფაქტს, რომ მან იძულებული გახადა იაპონია და ევროკავშირი სავაჭრო ხელშეკრულებების დადებისას აშშ-ის მოთხოვნებზე დათანხმებულიყვნენ, განა თეთრი სახლი კრემლის წინაშე უკან დაიხევს?
როგორც კი ინდოეთი და ჩინეთი მტკივნუულ დარტყმას იგრძნობენ ამერიკასაგან, ისინი იძულებულნი გახდებიან რუსეთისაგან ნავთობ-გაზის შესყიდვა შეამცირონ (ან საერთოდ შეწყვიტონ). ამით დაინგრევა ვლადიმერ პუტინის გენერალური გეგმა რუსეთის იმპერიული ძლიერების აღდგენის შესახებ.
რუსეთი უკრაინის ფრონტზე წარუმატებლობას განიცდის. მართალია, კრემლმა დრონებითა და რაკეტებით უკრაინული ქალაქების დაბომბვა გააძლიერა, მაგრამ ფაქტია, რომ მაისში დაწყებულ შეტევას რუსეთის არმიისათვის რაიმე მნიშვნელოვანი წარმატება არ მოუტანია. ვლადიმერ პუტინი ბოლო დროს მუდმივად ცდილობს რომელიმე მსხვილი უკრაინული ქალაქის დაპყრობას, მაგრამ უშედეგოდ – პოკროვსკს და კონსტანტინოვკას ისევ უკრაინელები აკონტროლებენ. უკრაინელები მამაცურად იბრძვიან, რუსები უამრავ ჯარისკაცს კარგავს – კრემლის ზარალმა უკვე მილიონს მიაღწია დაღუპულებისა და დაჭრილების სახით. ეს ნიშნავს ყოველდღიურად 1080 რუსი მებრძოლის დაღუპვა-დასახიჩრებას.
ასევე ნაკლებად სავარაუდოა, რომ რუსეთი ათასკილომეტრიან ფრონტის ხაზზე რაიმე წარმატებას მიაღწევს მას შემდეგ, რაც დონალდ ტრამპი უკრაინას მეტ იარაღს მიაწვდის. უკრაინელებს თუ იარაღი საკმარისი რაოდენობით ექნებათ, ისინი რუსებს უკან დაახევინებენ და საეჭვოა პუტინმა ის ტერიტორია შეინარჩუნოს, რაც ბოლო დროს დაიპყრო. კრემლს ირანის იმედიც აღარ ექნება, რადგან თეირანი მნიშვნელოვნად არის დასუსტებული ისრაელთან (და აშშ-სთან) ამასწინანდელი საჰაერო შეტაკების გამო.
არის იმის ნიშნებიც, რომ თვითონ ვლადიმერ პუტინს მისსავე გარემოცვაში ბევრი არ ეთანხმება, რასაც მოსკოვში მიმდინარე საკადრო წმენდა მოწმობს. ზოგიერთი მაღალჩინოსანი ჩინოვნიკი სიცოცხლეს თვითმკვლელობით ამთავრებს, ცნობილი ოლიგარქები კი ქვეყნიდან გაქცევის დროს იქნენ დაკავებულები. ზოგიერთი მაღალჩინოსანი ოფიცერი, რომლებსაც ყოფილ თავდაცვის მინისტრთან სერგეი შოიგუსთან ახლო ურთიერთობა ჰქონდათ, დაპატიმრებულები იქნენ კორუფციის ბრალდებით.
იმ სიძნელეების მასშტაბს, რასაც ვლადიმერ პუტინი შეეჯახა ომის გამო, მოწმობს ის ფაქტი, რომ იგი იძულებული გახდა გასულ კვირას ყოველწლიური სამხედრო-საზღვაო აღლუმის ჩატარება გაეუქმებინა – უკრაინაში განცდილი დიდი დანაკარგების გამო.
ამრიგად, დონალდ ტრამპის გადაწყვეტილება ვადების შემცირების თაობაზე დროულია – ის იმ დროს იქნა მიღებული, როცა ვლადიმერ პუტინს, ყოყოჩობის მიუხედავად, ე.წ. „სპეციალური სამხედრო ოპერაციის“ გაგრძელების ვარიანტები უმთავრდება.
თუ რუსეთის პრეზიდენტი გამოფხიზლდება და მიხვდება, რომ მას უკრაინაში ომის მოგების შანსი არ აქვს, მას სხვა არჩევანი არ ექნება იმის გარდა, რომ დონალდ ტრამპის მოთხოვნას დათანხმდეს – ცეცხლი შეწყვიტოს და სამშვიდობო მოლაპარაკება დაიწყოს.
