ამერიკის სალიცენზიო გამოცდების ჩასაბარებლად საქართველოში ზოგადი და ბავშვთა ქირურგიის ტრენინგის დროს დავიწყე მომზადება. 2014 წელს, ჩემს ორ გოგონასთან ერთად, ჩამოვედი დიდი ხნის იმიგრირებულ დედასთან.
მიუხედავად იმისა, რომ არასდროს შემიწყვეტია პროფესიული სწრაფვა, აქ თვითგადარჩენის ინსტიქტი და საკუთარი შვილების მინიმალური ცხოვრებისეული საჭიროების უზრუნველყოფა იყო ყოველთვის მთავარი და გადამწყვეტი ფაქტორი. 9 წლის განმავლობაში, 4 სხვადასხვა საავადმყოფოში მუშაობის შემდეგ, ამჟამად გასტროენტეროლოგიის followship-ზე ვარ.
კოვიდის დროს, ნიუ-იორკში ჰოსპიტალისტად 4 წელი ვიმუშავე, რამაც ძალიან დიდი სიამაყე შემძინა როგორც პროფესიულად, ასევე პერსონალურად.
მიუხედავად იმისა, რომ ეს ქვეყანა ექიმებისთვის ერთ-ერთი საუკეთესო ადგილია, რეალობა საკმაოდ განსხვავებულია. თვითონ ამერიკელებს ძალიან რთული ფინანსური და ცხოვრებისეული გზის გავლა უწევთ, სანამ სამედიცინო სკოლას და ტრენინგებს დაასრულებენ. ბევრს უჭირს მუშაობა, ბევრი დეპრესიაშია, არ არიან ბედნიერები, გადაღლა და სუიციდი ძირითადი თემაა ხოლმე ექიმებს შორის განხილვისას. ეს პროფესია მუდმივ განვითარებას მოითხოვს. რეზიდენტებთან თუ მუშაობ, დამატებითი პასუხისმგებლობა გემატება მათი განვითარებისთვის. დიდი შრომის და ენერგიის ჩადება გიწევს. თუ ემოციურად სტაბილური არ ხარ, ძნელია პირად პრობლემებთან გამკლავება და პროფესიონალურად განვითარება.
ტრენინგის დროს, მიუხედავად ყველაფრისა, ყოველ დილას უნდა გაიღვიძო დილას 5-6 საათზე და წახვიდე სამსახურში, იმუშაო ზოგჯერ 9 საათამდე ან უფრო გვიანობამდე. მუდმივად უნდა ააგო და შეინარჩუნო რეპუტაცია.
ოჯახს როდესაც სჭირდება შენი დახმარება, ამისთვის დრო არ გაქვს. ზოგჯერ ტელეფონზე პასუხის გაცემას ვერ ახერხებ თუ ვინმეს რაიმე გადაუდებელი პრობლემა არ აქვს. თუმცა, ტრენინგები და რთული პერიოდები დროებითია. თუ ჩააბარებ გამოცდებს და მიიღებ ლიცენზიას, ქვეყანა მიგიღებს, როგორც ამერიკელს. სხვა ქვეყნებში ეს ასე ადვილად არ ხდება. ყოველწლიურად იზრდება ქართველი ექიმების რიცხვი ამერიკაში. მათ გარეშე მე გამიჭირდებოდა აქ კარიერის დაწყება. ჩემი უახლოესი მეგობრის, ბექა ბახტაძის წიგნის გარეშე გამოცდის ჩაბარებასაც ვერ მოვახერხებდი. თუ ხარ კარგი ექიმი, ეს ნიშნავს იმას, რომ კარგი ადამიანი ხარ. არ აქვს მნიშვნელობა, რა უნარებით ჩააბარებ მისაღებ გამოცდებს, მთავარია როგორი მუშაობის ეთიკა გაქვს და როგორ შეძლებ ყოველდღიურად განვითარდე ისე, რომ ექიმობის მოტივაცია და ხალისი არ დაკარგო. გამოცდებისთვის როგორ მოემზადები, ამის გარკვევაში დიდი დრო იკარგება. იმედია, უფრო მეტი და მეტი თაობა გაუზიარებს მომავალ კოლეგებს, მარტივად როგორ მოემზადონ. თუ სხვა ქვეყანაში გაქვს დამთავრებული სამედიცინო სკოლა, აქ სხვა თვალით გიყურებენ, მაგრამ დიდი სიამაყის გრძნობაა, როცა შენი ცოდნით ამერიკელების გვერდით განაგრძობ მუშაობას. ყველას გვაქვს ჩვენი ინდივიდუალური შანსი და უამრავი მაგალითია იმის, რომ უცხო ქვეყნიდან ჩამოსული ექიმები უფრო მოტივირებული და ბედნიერები არიან თავის საქმით, მიეკუთვნებიან ყველაზე წარმატებულ ექიმთა რიცხვს სხვადასხვა დარგში.
აქ რეზიდენტურის დასაწყებად ჩამოვედი და ჩემი მეგობრის facebook შეტყობინებით მივედი ინტერვიუზე, მაგრამ მაშინ სამუშაო ვიზა არ მქონდა და ვერ დავიწყე მუშაობა, თუმცა ინტერვიუ და შეხვედრა იმდენად მნიშვნელოვანი იყო, რომ მაინც ამიყვანეს ამავე რეზიდენტურაში მეორე წელს.
თავიდან ვფიქრობდი ქირურგიის რეზიდენტურის გავლას, მაგრამ ეს საკმაოდ რთული გზა იყო უცხოელი სამედიცინო სკოლადამთავრებულებისთვის, ისევე როგორც მეტ ფინანსურ საჭიროებას მოითხოვდა ჩემგან, რომლის საშუალებაც მე არ მქონდა. საკუთარი შვილების მოვლას ვერ მოვახერხებდი, უსასრულო კვლევისა და გაუთავებელი რეზიდენტურის წლები რომ თავიდან დამეწყო. ამ ეტაპზე, გასტროენტეროლოგიაში ბევრი ძალიან საინტერესო და ინოვაციური ქირურგიული პროცედურა კეთდება ენდოსკოპიურად. ღვიძლის, პანკრეასის სიმსივნეების სტენტირებები, ნაღვლის ბუშტის და პანკრეასის ცისტის ენდოსკოპიური დრენირებები, ენდოსონოგრაფიული ბიოფსიები, პალიატრიული მკურნალობები, ენდოსკოპიური ბარიატრიული პროცედურები. როცა ლიცენზირებული გასტროენტეროლოგი გავხდები, სხვადასხვა დარგის ქართველ ექიმებთან ერთად, ვგეგმავ საქართველოში ჩასვლას და ამ ინოვაციური პროცედურების
ჩატარებას, ცოდნისა და გამოცდილების გაზიარებას.
სტუდენტები და სხვა კოლეგები, ვინც ფიქრობთ ამერიკაში ჩამოსვლას, არასდროს არ არის გვიან. ჩემმა ყოფილმა პროგრამის დირექტორმა, რომელიც ცნობილი პროფესორია, 60 წლის უცხოელი აიყვანა ინტერნად.
სოციალური ქსლები ბევრს ეხმარება კარგი კონტაქტების დამყარებაში. გააქტიურდით ტვიტერზე და მიჰყევით თქვენთვის საინტერესო ექიმებს, მკვლევარებს. ყველას გაუგზავნეთ წერილი, პირადად დაუკავშირდით ქართველ ექიმებს უცხოეთში, სთხოვეთ დახმარება, გადახედონ თქვენს რეზიუმეს, გაგიწიონ რეკომენდაცია. ექიმობა ბევრად მეტია, ვიდრე ფინანსური და სოციალური სტატუსი, გარკვეული სახით ცხოვრების არსი და წესი ბევრი ქართველისთვის , ეს არის რაც გამოგვარჩევს და განაპირობებს წარმატებას. . ამერიკა ექიმებისთვის საუკეთესო ადგილია. თუ მოინდომებთ და ბევრს იშრომებთ, აქ ყველაფერს მიაღწევთ, რასაც მიზნად დაისახავთ.
მშვიდი, წყნარი ყოველდღიური შრომით ყველაფრის მიღწევა შეიძლება. ბედნიერი და იღბლიანი ვარ, რომ ჩემი მშობლებისა და მათი კოლეგებისგან გამომყვა საავადმყოფოს და პაციენტების დახმარების სიყვარული.
