2023 წლის 18-19 მაისის შეჯამება უკრაინაში:
- დონეცკის ოლქში, მარიუპოლში აფეთქებებია. სავარაუდოდ უკრაინელთა სარაკეტო შეტევასთან გვაქვს საქმე და არა დრონების მოქმედებასთან. არაა გამორიცხული ბრიტანული Storm Shadow მოხვედროდა რუსულ სამიზნეს - ასაფრენ ბილიკსა და საწყობს.
- ბახმუტის ირგვლივ უკრაინელთა შეტევა წარმატებით გრძელდება. ქალაქის სამხრეთით უკრაინულმა დანაყოფებმა კლიშჩიივკას მიაღწიეს. შეტაკებები დასახლების მომიჯნავედ მიმდინარეობს. ქალაქის სამხრეთით რუსული პოზიციები ძალიან სწრაფად იშლება.
- ბახმუტის ჩრდილოეთით უკრაინელები ყველ სუსტ რუსულ პოზიციას რამდენიმე მიმართულებიდან უტევენ. პროგრესი დიდი არ არის, მაგრამ ორიხოვო-ვასილივკაში შესული რუსულ დანაყოფებს უკან დაახევინეს, ხოლო ცოტა უფრო მოშორებით ზალიზნიანსკეს მიმართულებით წაიწივნენ წინ უკრაინელები. აღნიშნული ორივე დასახლება ბახმუტი-სლავიანსკის გზის მიმართულებით მდებარეობს.
ამ ფონზე, რუსები სოლედარის ირგვლივ ტერიტორიებს ამაგრებენ და ნაღმავენ კიდეც. აშკარაა უკრაინელთა შეტევას სოლედარზე ჩრდილოეთიდან ელოდებიან ისინი.
- ქალაქი ბახმუტი ამ დრომდე ყველაზე რთულ წერტილად რჩება. რუსული ნაწილები თითოეული შენობის ასაღებად ასობით ადამიანს სწირავენ. როგორც მოსალოდნელი იყო პრიგოჟინის დანაყოფები არსად არ გასულან და კვლავაც უმთავრეს საზარბაზნე ხორცს წარმოადგენენ.
- ქალაქი დონეცკის მომიჯნავედ, განადგურებულ მარიინკაში შეტაკებები გრძელდება. ამჯერად უკრაინელები ურტყამენ რუსულ პოზიციებს. საბრძოლო მოქმედებებში ჩართულია უკრაინული არტილერია და სატანკო ნაწილებიც. რა თქმა უნდა, მარიინკა, ავდიივკა და ბახმუტი რუსული გამოფიტვის როლს ასრულებს ახლა.
- ყირიმში უკრაინელმა პარტიზანებმა ბახჩისარაის სიახლოვეს რკინიგზა ააფეთქეს რასაც რუსული ლოჯისტიკური მატარებლის რელსებიდან გადასვლა მოჰყვა. ბახჩისარაი ისტორიულად ყირიმელი თათრების დედაქალაქია. ისინი რუსულ ოკუპაციას დიდი ხანია უწევენ წინააღმდეგობას.
- აფეთქებებია სევასტოპოლშიც. რუსები აცხადებენ რომ წვრთნები მიმდინარეობს, მაგრამ რეალურად ჰაერსაწინააღმდეგო სისტემები აქტიურად მუშაობენ. ეს კი უკრაინული დრონების შეტევის შესაძლებლობაზე მიუთითებს.
- დღეს პრეზიდენტი ზელენსკი საუდის არაბეთში ჩავიდა და არაბული ლიგის სამიტს დაესწრო. მან სწორედ აქ განაცხადა, რომ რუსების პირველი მსხვერპლი ყირიმის ანექსიის შემდეგ სწორედ ყირიმელი თათრები იყვნენ, რომელთა ნაწილი უკრაინის სხვა პროვინციაში მიგრირდა ან ანტისაოკუპაციო ქსელში ჩაება, მაგრამ ზოგიერთ მათგანს უფრო ტრაგიკული ბედი ეწია - აიძულეს ქვეყნის გარეთ გაქცეულიყო ან რუსეთის შიგნით გადაადგილებულიყო. საკმაოდ მძლავრი განცხადება ჰქონდა პრეზიდენტ ზელენსკის. საუდის არაბეთი მნიშვნელოვანი ეკონომიკური მოთამაშეა კარგი სამხედრო შეიარაღებით (რასაც ვერ ვიტყვით მის სამხედრო ძალებზე), მაგრამ რაც მთავარია საუდებს შორს მიმავალი ზეგავლენები აქვთ მრავალ არაბულ სახელმწიფოზე. ამასთან, ზელენსკი ზოგიერთი არაბული სახელმწიფოსადმი საკმაოდ კრიტიკული იყო და მათ სისუსტესა და თავიანთი სახელმწიფოსათვის საზიანო რუსულ კოლაბორაციონიზმზეც მიუთითა.
- იაპონიაში დიდი შვიდეულის შეხვედრა იმართება. უკვე გაჟღერდა ძირითადი შეტყობინება რუსეთთან მიმართებით. ითქვა, რომ დასავლეთი მანამ დაუჭერს მხარს უკრაინას, სანამ მას ეს დასჭირდება. ასევე ითქვა, რომ მშვიდობა მანამ ვერ იქნება მიღწეული, სანამ რუსი სამხედროები უკრაინაში იმყოფებიან. დაბოლოს, აღინიშნა, რომ რუსეთს მოუწევს გადაიხადოს ის, რაც მისი აგრესიისას განადგურდა. ეს მრავლისმთქმელი პოზიციაა და კარგი იქნებოდა საქართველოც რომ მოქცეულიყო ამ პოზიციაში. დღეს პრეზიდენტი ზელენსკი ტოკიოში ჩავა და შეუერთდება სამიტს.
- აშშ-ს მხრიდან გაჟღერდა, რომ უკრაინისათვის F-16 მრავალფუნქციური გამანადგურებლის გადაცემის წინააღმდეგი აღარაა. ბრიტანეთი თავის მოკავშირეებთან ერთად (პირველ რიგში კი ნიდერლანდებთან ერთად) დაიწყებს უკრაინელი პილოტების წვრთნას. ამ შემთხვევაში მნიშვნელოვანი ის კი არ არის მხოლოდ, რომ უმნიშვნელოვანესი გამანადგურებლები შეიძლება აღმოჩნდეს უკრაინელთა ხელში, არამედ ესაა სიგნალი რუსეთისათვის, რომ დასავლეთი ყველაფერზეა წამსვლელი ოღონდ რუსეთი დამარცხდეს და იარაღზე შეზღუდვა პრაქტიკულად მოხსნილია. ამ ყველაფერს ემატება ნორვეგიაც, რომელიც უკრაინას რვა M270 ზალპური ცეცხლის რეაქტიულ სისტემას გადასცემს. ეს დამანგრეველი იარაღი უკვე მოქმედებს უკრაინაში, მაგრამ ამ რაოდენობის შევსება რუსულ პოზიციებზე ძალიან დიდი სიზუსტის საარტილერიო დარტყმების გახშირებას გულისხმობს.
- აშშ-ს ცენტრალური სადაზვერვო სააგენტო (CIA) რუსების გადმობირებაზე აქტიურად მუშაობს და უშუალო ქსელის შექმნის გარდა ღიადაც კი მოუწოდებს თანამშრომლობაზე. რეალურად რუსული ორგანოების გამოფიტვა შიგნიდან მიმდინარეობს.
- 18-19 მაისი უკრაინის ნაციონალური ტანისამოსის ვიშივანკას დღეა.
