,
ღეს, თბილისში, A პუნქტიდან B პუნქტამდე მანქანით მისასვლელად, საშუალოდ 1 საათი გვჭირდება. ესეც, იმ შემთხვევაში, თუ ა და ბე პუნქტები ერთმანეთისგან ძალიან დაშორებული არაა და შეიძლება, ერთ უბანშიც კი იყოს. თუ ამას მანქანის გასაჩერებელი ადგილის ძებნაში დაკარგულ დროსაც დავუმატებთ, საათ-ნახევარზეც კი ავალთ.
საცობის გამომწვევ მიზეზთა ჩამონათვალი საკმაოდ ვრცელია - ქალაქში მოსახლეობის რაოდენობის ზრდა, მძღოლები, რომლებიც მოძრაობის წესებს არღვევენ, საზოგადოებრივი ტრანსპორტის მოუწესრიგებლობა და ა.შ. თუმცა, ექსპერტების აზრით, პირველი და მთავარი მიზეზი თბილისის ქაოსური განაშენიანებაა.
საქართველოს ტრანსპორტისა და გზების ასოციაციის თავმჯდომარე, დავით მესხიშვილი ამბობს, რომ ქალაქში მშენებლობის ნებართვების გააზრების გარეშე გაცემა დაახლოებით 30 წლის წინ დაიწყო და პრობლემის სათავეც სწორედ ესაა. ქალაქი, რომელიც მთებს შორისაა მოქცეული და, უმეტესად, ვიწრო ქუჩებია, დღეს ვერც ამდენ კორპუსს იტევს და, მით უმეტეს, ვერც ავტომობილებს.
„პირდაპირი კავშირია ურბანულ განაშენიანებასა და საცობებს შორის. ამის ნათელი მაგალითია ნინო ჟვანიას ქუჩა, სადაც ორმხრივად არის მრავალსართულიანი კორპუსები, გზის სიგანე 4-5 მეტრია, ორივე მხარეს პარკირებულია ავტომობილები; კორპუსებს არ აქვს საპარკინგე ადგილები. ამ კორპუსების მშენებლობის ნებართვები რის მიხედვითაა გაცემული, არავინ იცის. ამ ქუჩას რა უნდა ეშველოს? აქ კორპუსები საერთოდ არ უნდა აშენებულიყო,“ - განმარტავს დავით მესხიშვილი.
მისივე თქმით, საცობების განტვირთვის ერთ-ერთი მნიშვნელოვანი გზა ნამდვილად არის საზოგადოებრივი ტრანსპორტი, თუმცა, ქაოსური განაშენიანების გამო, მივიღეთ ქუჩები, რომლებსაც საზოგადოებრივი ტრანსპორტი ვეღარ უდგება. ამიტომაც დგას თითოეული კორპუსის წინ დაახლოებით იმდენი ავტომობილი, რამდენი ბინაცაა.
„რაც უკვე აშენდა და დატვირთულია, აღარაფერი ეშველება. ადრე, მშენებლობის ნებართვის გაცემისას სატრანსპორტო დასკვნა არ გაიცემოდა. ახლა გაიცემა, თუმცა ფაქტია, ეს საკმარისი არაა. ამიტომ, ეს პოლიტიკა კიდევ ერთხელ უნდა გადაიხედოს. არის შემთხვევები, როცა სამშენებლო კომპანიები აცხადებენ, რომ გათვალისწინებული აქვთ საპარკინგე ადგილი. შემდეგ კი ეს სივრცეები გადაკეთდება კომერციულ ფართებად, ზოგისთვის თონეა, ზოგისთვის მარანი ან მაღაზია, ავტომობილები კი ისევ ქუჩაში რჩება. ზოგადად, ავტომობილების კონცენტრირება კონკრეტულ უბანში შემთხვევით არ ხდება. იქ არის ხოლმე მიზიდულობის კერები - მრავალსართულიანი კორპუსები, საზოგადოებრივი თავშეყრის ადგილები, საკონცერტო დარბაზები, ან სავაჭრო ცენტრები. ამიტომ, ასეთი ობიექტების მშენებლობისას სატრანსპორტო დასკვნებს ძალიან ყურადღებით უნდა მოვეკიდოთ. უკვე არსებული უბნებისთვის რთულია, რაიმე გამოსავალი მოვძებნოთ. ახლა უნდა ვისაუბროთ იმაზე, რომ აღარ გაჩნდეს ახალი ტერიტორია, რომელიც იქნება სპორტის სასახლის უკანა სივრცის, ან ნინო ჟვანიას ქუჩის მსგავსი,“ - ამბობს ტრანსპორტისა და გზების ასოციაციის თავმჯდომარე.
ექსპერტს ქალაქში არსებული სიტუაცია სრულად უიმედოდაც არ ესახება. მისი თქმით, საგრძნობლად უმჯობესდება ვითარება გზაჯვარედინების მოწესრიგებით და მაგალითად თამარაშვილის მიმდებარედ ბოლოს ჩატარებული სამუშაოები მოჰყავს.
„გზაჯვარედინები უნდა მოწესრიგდეს, მათ შორის, მცირე ესტაკადებითაც. ქალაქში ეს პრობლემა ბევრგანაა და უკვე ვნახეთ რამდენიმე სამუშაო, რომელმაც შედეგი გამოიღო და ჩაჭედილი საცობი აგვარიდა. მაგალითად, თამარაშვილზე ხდებოდა საშინელება. არც ახლაა დროსთან შეფარდებით ეს ადგილი გამტარუნარიანი, თუმცა ჩაჭედილი ნამდვილად აღარაა. მძღოლებმა უკვე იციან, როგორ შეიძლება გავიდნენ მარჯვნივ, მარცხნივ, წითელზე ჩერდებიან და ა.შ. კვანძების გახსნა მნიშვნელოვანია და ამ მიმართულებით ცოტა სწრაფი ტემპი სასურველი იქნებოდა,“ - განმარტავს დავით მესხიშვილი.
ქალაქის პრობლემებზე საუბრისას, დავით მესხიშვილმა ისიც აღნიშნა, რომ გზების გამტარუნარიანობის, საცობებისა და საგზაო უსაფრთხოების პრობლემა მხოლოდ თბილისში არ დგას. ანალოგიური გამოწვევები საქართველოს სხვა დიდ ქალაქებშიც, განსაკუთრებით მწვავედ კი ბათუმში შეინიშნება. ზღვისპირა ქალაქზე საუბრისას, დავით მესხიშვილმა რამდენიმე მნიშვნელოვანი საკითხი გამოყო:
„ბათუმი არის არათუ ანალოგიური პრობლემის, არამედ უარესი გამოწვევების წინაშე. ამ ქალაქის განაშენიანების პრობლემაზე შეიძლება ბევრი ვისაუბროთ, ფაქტობრივად, ბათუმი აღარც ნიავდება. თუმცა, გარდა ამისა, სრულად მოსაწესრიგებელია საგზაო ინფრასტრუქტურა. ნიშნების უმეტესობაც კი არასწორად დგას. ბათუმში არის არაერთი შავი წერტილი, ანუ ადგილი, სადაც ბევრი ავტოსაგზაო შემთხვევა ხდება,“ - აცხადებს დავით მესხიშვილი ურბან მედიასთან საუბრისას.
ნათელია, რომ თბილისის პრობლემები სხვა დიდი ქალაქებისთვისაც გადამდებია, თუმცა, მოსახლეობის სიმრავლის გამო, მეტს საუბრობენ დედაქალაქების საცობებზე და საინფორმაციო სივრცეში იკარგება ბათუმის, ან, თუნდაც, ქუთაისის პრობლემები. არადა, ის, რაც თბილისში უკვე გამოუსწორებელ საკითხად იქცა, შესაძლოა, სხვა ქალაქებში თავიდან ავიცილოთ.
წყარო: Urban Media • ურბან მედია
კომპანია Meta-მ დაასრულა მრავალფეროვნების, თანასწორობისა და ჩართულობის (DEI) პროგრამები. ინფორმაციას ამის შესახებ Fox News-ი ავრცელებს.
კომპანიამ თანამშრომლებს განუცხადა, რომ „სამართლებრივი და პოლიტიკის ლანდშაფტი მრავალფეროვნების, თანასწორობისა და ჩართულობის ძალისხმევის გარშემო იცვლება“.
მანამდე უმსხვილესმა ამერიკულმა კვების კომპანია „მაკდონალდსმა“ ოთხი წლის შემდეგ მრავალფეროვნების პოლიტიკის გაგრძელებაზე უარი განაცხადა.
როგორც „მაკდონალდსის“ მიერ გავრცელებულ განცხადებაშია აღნიშნული, ის მრავალფეროვნების პოპულარიზაციაზე უარს იტყვის კომპანიის უმაღლესი რგოლის დონეზე. ეს პროგრამა შეჩერდება კვების ობიექტების მიმწოდებლებისთვისაც, რომლებსაც ადრე კომპანია უმცირესობების დასაქმებისკენ მოუწოდებდა.
