,
გასული წლის ბოლოდან მსოფლიოს უმსხვილესი კომპანიები, როგორებიცაა Google, Amazon, Citigroup, Blackrock და სხვები, სამუშაო ძალის შემცირებასა და ასობით თანამშრომლის დათხოვნაზე ალაპარაკდნენ. მიმდინარე შემცირებები კი მსოფლიოში არსებული ეკონომიკური არასტაბილურობით, ხელოვნური ინტელექტის განვითარებითა და კომპანიების მიერ პანდემიის პერიოდში გაზრდილი თანამშრომლების რაოდენობის შემცირებით აიხსნება. ასობით თანამშრომლის გათავისუფლების ტენდენცია კი სამუშაო ბაზარზე უამრავ გამოწვევას აჩენს, განსაკუთრებით “თეთრსაყელოიანი” კადრებისთვის.
Forbes-ის ინფორმაციით, იანვრის თვის განმავლობაში 58 ტექნოლოგიურმა კომპანიამ ჯამურად 7 785 თანამშრომელი დაითხოვა - გამოცემა მიზეზად საოპერაციო პროცესების რეორგანიზაციასა და AI პროექტებში რესურსების გადანაწილებას ასახელებს. სამუშაო ძალის შემცირების ტალღა 2023 წლის მსოფლიო მასშტაბის “ქამრების შემოჭერის” სტრატეგიას მოჰყვა - გასულ წელს ანალოგიური ბედი გაიზიარა ტექნოლოგიურ სექტორში დასაქმებულმა 260 000-მა ადამიანმა.
შემცირებების გრძელვადიანი ეფექტი თანამშრომლების პროგნოზებზე უკვე შეინიშნება - MyPerfectResume-ის მიერ ჩატარებული გამოკითხვის თანახმად, დასაქმებულთა 85% ფიქრობს, რომ შესაძლოა, 2024 წელს სამსახური დაკარგოს.
თავად კომპანიები ოპერირებისას სიფრთხილეს იჩენენ, თანამშრომლების შემცირება ხარჯების ოპტიმიზაციაში ეხმარებათ - შესაბამისად, შემცირებების პროცესი, სავარაუდოდ, დასასრულს ჯერ კიდევ არ მიახლოებია. მზარდი ტენდენცია კი ცხადყოფს, რომ უმსხვილესი ბიზნესები ეკონომიკურ პირობებსა და მაღალ საპროცენტო განაკვეთებზე მორგებას ცდილობენ და, შესაძლოა, სიტუაციის კიდევ უფრო გამწვავებისთვისაც ემზადებიან.
პრეზიდენტმა ვლადიმირ პუტინმა განაცხადა, რომ 2025 წელს რუსეთის ეკონომიკური ზრდის ტემპი 1%-მდე შენელდა.
მთავრობის სხდომაზე გამოსვლისას მან აღნიშნა, რომ ეს მაჩვენებელი საგრძნობლად ჩამორჩება წინა წლების დინამიკას. კერძოდ, 2023 წელს 4.1%-იანი და 2024 წელს 4.3%-იანი ზრდა დაფიქსირდა, რაც სამხედრო ხარჯების ზრდის ეფექტით იყო განპირობებული.
პრეზიდენტის თქმით, ეკონომიკური აქტივობის ასეთი შენელება მთავრობისთვის მოსალოდნელი იყო და ის დიდწილად ინფლაციის წინააღმდეგ მიმართულმა ხელოვნურმა ზომებმა განაპირობა. ამ შემთხვევაში, პუტინი ცენტრალური ბანკის მიერ განსაზღვრულ რეფინანსირების განაკვეთზე მიუთითებს, რომელიც 16%-იან ნიშნულზეა.
პუტინმა ხაზი გაუსვა, რომ ცენტრალური ბანკის მიზანმიმართულმა პოლიტიკამ შედეგი გამოიღო და ინფლაცია, რომელიც 2024 წელს 9.5%-ს შეადგენდა, წელს 5.6%-მდე შემცირდა. მისივე პროგნოზით, 2026 წლის ბოლოსთვის ეს მაჩვენებელი 5%-იან ნიშნულამდე დაიწევს.
ეკონომიკური ზრდის შენელების მიუხედავად, კრემლი ამტკიცებს, რომ სახელმწიფო ბიუჯეტი სრულად ფარავს სოციალურ ვალდებულებებსა და სამხედრო საჭიროებებს, მიუხედავად იმისა, რომ რეკორდულად მზარდი ბიუჯეტის დეფიციტი სხვა რეალობაზე მიუთითებს.
ექსპერტთა ნაწილი მიიჩნევს, რომ რუსეთის ეკონომიკურ სტაგნაციას სამუშაო ძალის დეფიციტი, მაღალი საპროცენტო განაკვეთები და დასავლური სანქციების კუმულაციური ეფექტი იწვევს, რომლის სრულ მასშტაბებს უფრო მეტად 2026-27 წლებში ვიხილავთ.
ცნობისთვის, 2026 წლისთვის რუსეთის მთავრობა მშპ-ის 1%-1.3%-იან ზრდას პროგნოზირებს, თუმცა საერთაშორისო სავალუტო ფონდი უფრო პესიმისტურ, 0.8%-იან ზრდის მაჩვენებელს ვარაუდობს.
წყარო: https://bm.ge/
