2008 წელს ბონის (გერმანია) უნივერსიტეტის დოქტორანტურაში ალგებრული ტოპოლოგიის განხრით ჩავირიცხე. ძალიან მნიშვნელოვანი იყო ჩემთვის იქ გატარებული წლები. შესაძლებლობა მომეცა, მონაწილეობა მიმეღო სხვადასხვა სამეცნიერო სემინარის თუ კონფერენციის მუშაობაში. ჩართული ვიყავი მათემატიკური პროექტების განხორციელებაში. მქონდა ყოველდღიური მეცნიერული ურთიერთობა ტოპოლოგიაში და მომიჯნავე დარგებში მომუშავე სხვა ახალგაზრდა მკვლევარებთან. ჩვენ ერთმანეთისგან ბევრს ვსწავლობდით. მუდმივად ვიყავით იდეების და ცოდნის გაცვლის რეჟიმში. ბონის უნივერსიტეტში მოღვაწე ცნობილი გერმანელი მათემატიკოსები მეხმარებოდნენ პროფესიულ ზრდასა და განვითარებაში. 2013 წელს, პროფესორ შტეფან შვედეის ხელმძღვანელობით, დავიცავი დისერტაცია ჰომოტოპიის თეორიაში.
ჩემი სამეცნიერო ინტერესების სფერო მოიცავს ალგებრულ ტოპოლოგიას, K-თეორიას და ჰომოლოგიურ ალგებრას. ალგებრული ტოპოლოგია შეისწავლის რთულ გეომეტრიულ ობიექტებს ალგებრული მეთოდების გამოყენებით. ეს ობიექტები, თავის მხრივ, გამოიყენება ფიზიკაში და მეცნიერების სხვა დარგებში. მე ძირითად ვმუშაობ ჰომოტოპიის თეორიაში, რომელიც ალგებრული ტოპოლოგიის უმნიშვნელოვანესი მიმართულებაა. კერძოდ, შევისწავლი სიმეტრიული ობიექტების დეფორმაციებს. ჩემი კვლევები ჰომოტოპიის თეორიაში უკავშირდება რიცხვთა თეორიას, გეომეტრიას და აბსტრაქტულ ალგებრას.
დისერტაციის დაცვის შემდეგ, 2013-2016 წლებში, ვმუშაობდი კოპენჰაგენის (დანია) უნივერსიტეტში, სადაც სამეცნიერო-კვლევით საქმიანობას ვეწეოდი, სტუდენტებისთვის ვკითხულობდი ლექციებს მათემატიკის მიმართულებით. ეს წლები მნიშვნელოვანი იყო იმით, რომ დავიწყე საერთო კვლევების განხორციელება მსოფლიოს წამყვან სამეცნიერო ცენტრებში მომუშავე მათემატიკოსებთან, რასაც ბუნებრივად მოჰყვა ჩემი სამეცნიერო ინტერესების გაფართოება. შემდეგ საქმიანობა ისევ ბონის უნივერსიტეტში გავაგრძელე, სადაც ორი წელი ვიმუშავე. 2019 წელს მუდმივი პოზიცია მივიღე დიდ ბრიტანეთში ერთ-ერთ უძველეს, აბერდინის (შოტლანდია) უნივერსიტეტში. აქ ძალიან კარგი პირობები და ატმოსფეროა ნაყოფიერი სამეცნიერო-კვლევითი მუშაობისთვის, რაც შესაძლებლობას მაძლევს მეტი შემართებით გავაგრძელო კვლევითი საქმიანობა. ასევე ვკითხულობ ლექციებს და ვარ სტუდენტების სამეცნიერო ხელმძღვანელი.
ვცდილობ, ხშირად ვიყო საქართველოში. ყოველ ჩასვლაზე მოხსენებას ვაკეთებ ანდრია რაზმაძის სახელობის მათემატიკის ინსტიტუტში. ვმუშაობ ქართველ სტუდენტებთანაც. მინდა აღვნიშნო, რომ საქართველოში მოღვაწე მეცნიერებს რთულ პირობებში უწევთ სამეცნიერო-კვლევითი მუშაობა. მიმაჩნია, რომ სახელმწიფომ უნდა უზრუნველყოს მათთვის ღირსეული სამუშაო პირობები. ეს იქნება დამატებითი მოტივაცია უცხოეთში მოღვაწე მეცნიერებისთვის, რომ დაბრუნდნენ საქართველოში და ემსახურონ თავის ქვეყანას.
