USD 2.7599
EUR 3.0569
RUB 3.2807
Tbilisi
ია მჭედლიშვილი-ამერიკაში მოღვაწე ქართველი მხატვარი
Date:  1030
უცნაური იყო ამერიკაში ჩემი წამოსვლა. 1999 წელს მეუღლესთან ჩამოვედი, რომელიც ვირჯინიის უნივერსიტეტის ეპილეფსიის ნეიროფიზიოლოგიური საფუძვლების ლაბორატორიაში მუშაობდა. სამ პატარასთან ერთად ვიყავი. ვისაც ახსოვს 90-იანების საქართველო, ჩვენი ქვეყნისთვის უმძიმესი პერიოდი იყო - ნაომარი, მძიმე ეკონომიკური მდგომარეობა, კორუფცია, კრიმინალი, უშუქობა. სერიოზული პრობლემების წინაშე ვიდექით თითოეული ადამიანი და სწორედ ამ პერიოდში მომიწია წამოსვლა. სულაც არ ვფიქრობდი, რომ ქვეყანას ვტოვებდი, რაღაცნაირი ინერცია იყო. არეული და ქაოსური სიტუაციიდან უცბად მოვხვდი დალაგებულ, მშვიდ და გაბრდღვიალებულ პატარა საუნივერსიტეტო ქალაქში, ჩარლოტსვილში. თითქოს ყოველდღიური პრობლემები უკან დარჩა, მაგრამ ასეც არ იყო.
 
კულტურული განსხვავება ახალი გამოწვევების წინაშე გაყენებს ადამიანს. ქვეყანაში რაც უფრო მაღალია ცხოვრების დონე, უფრო მეტის სწავლა გიწევს სამოქალაქო კუთხით, რაც ავტომატურად მოიცავს ელემენტარულ ადამიანურ ურთიერთობებს და თითქოს ახლიდან ყალიბდება კომუნიკაციის ჩვევები. ეს არ არის უმტკივნეულო, მაგრამ, თამამად ვიტყოდი, ძალიან სასარგებლო პროცესია, რაც ბევრ რამესთან ერთად გასწავლის საკუთარ თავთან კომფორტულად ყოფნას და ჩვეულებრივ ადამიანს მოქალაქედ გადაგაქცევს. ეს უწყვეტი პროცესია. ჩამოსვლიდან მალევე გავიცანი არაჩვეულებრივი ადამიანი, მხატვარი-კოლექციონერი რიჩარდ ფრიმანი. დავიწყე მის სახელოსნოში მუშაობა, სადაც რესტავრაცია უკეთდებოდა ანტიკურ ნახატებს და არა მარტო ნახატებს, სხვადასხვა მასალით შესრულებულ დაზიანებულ ნამუშევრებს.. შეუფასებლად ბევრი მასწავლა მისტერ ფრიმანმა და ასევე ძალიან გამომადგა საქართველოში მიღებული ჩემი ადრეული გამოცდილება, როცა ხელოვნების მუზეუმში ვმუშაობდი ქსოვილების რესტავრატორ შესანიშნავ კატო კაცაძესთან. სერიოზული ნამუშევრები შემოდიოდა, თვალებს არ ვუჯერებდი, პოულ ქლის (Poul klee) ნამუშევარი რომ დამიდეს წინ. თავიდან ხელი მიკანკალებდა. პიკასოს მოზრდილ გრაფიკას უკვე გამოცდილი შევხვდი.
 
პარალელურად საკვირაო სკოლაში ვმუშაობდი ხატვის მასწავლებლად და შემდეგ ბავშვებისთვის გავაკეთე კერძო კლასები. ვასწავლიდი არა ხატვას, არამედ ხედვას. რადგან ვფიქრობ, სანამ ხელში აიღებ ფუნჯს, მანამდე უნდა დაინახო, რა დახატო. დანახვა კი პროცესია აღმოჩენის, შესწავლის, შეყვარების, გაბრაზების, იმედგაცრუების, საკუთარ თავთან კამათის და კრიზისისაც კი, რაც შანსს გვაძლევს, თუ სწორად გამოვიყენებთ, წავალთ წინ. მოკლედ, ხედვის უნარი ანალიზთან ერთად ყველანაირ ემოციას მოიცავს და ძალიან საინტერესოს ხდის ჩვენს ცხოვრებას . საოცარი გრძნობაა, როცა სხვას აძლევ შენს გამოცდილებას და კიდევ უფრო საოცარია, როცა ეს გაცემა ამართლებს. 2006 წელს გადავედი პიცბურგში. ქალაქში, სადაც დაიბადა ენდი უორჰოლი, მდიდარი ისტორიით და მუზეუმებით - ყოფილი ინდუსტრიული ქალაქი, რომელიც ნელ-ნელა გადაქცეულიყო არტქალაქად. შეჩერებულ, მიტოვებულ ქარხნებში გამოფენები ეწყობოდა. ძალიან გამიჭირდა რესტავრაციის მიტოვება, მაგრამ სწორედ ამ პერიოდმა მაინც საკუთარ სურვილებთან მიმიყვანა. აქტიურად დავიწყე ხატვა, მივიღე მონაწილეობა ჯგუფურ გამოფენებში ატლანტაში - Gertcev Gallery და პიცბურგში - Iron City Brewery. მერე იყო ფოტოგრაფიით გატაცება და ეს გატაცება ისეთ ადიქციაში გადაიზარდა, წყლის თემაზე საერთაშორისო ფოტოკონკურსში მივიღე მონაწილეობა. სხვადასხვა ქვეყნიდან წარდგენილი მრავალი ათასი ფოტოდან მხოლოდ ასი ფოტო დატოვეს და ამ ასიდან მე-11 ადგილი მერგო. ეს ფოტოები გამოეფინა ქალაქ კამპინასში(ბრაზილია) და შემდეგ ნიუ-იორკის ექსპო-ცენტრში. პროექტის სახელწოდება იყო World Water Imege Exhibit (WWIC).
 
ამავე წელს პორტუგალიურმა ფოტო ჟურნალმა - “HSOT! Magazine”-მა 2013 წლის პირველ ნომერში შეიტანა ჩემი ფოტო, რომელზეც საქართველოს პარლამენტის ყოფილი შენობის (ქუთაისში) ინტერიერია გამოსახული. მაგრამ ყველა ჩემი გაფრთხიალება მაინც თითებთან ჩერდება. ფუნჯი, გრაფიტი, ბურღი, მაკრატელი, სანთელი, სულ ერთია რით, მთავარია ზედაპირზე - ტილო, ფურცელი, ქვიშა, მინა..- კვალი დავტოვო. ჩემი თემაა- ემოცია. თავს ვთვლი პორტრეტისტად. მე მგონი, სხვები ექსპრესიონისტად მთვლიან, ალბათ ასეც არის. ყველა პორტრეტი მე ვარ, მაშინაც როცა სხვას ვხატავ. სამ ნაწილად ვყოფ ჩემს პორტრეტებს - როგორი მინდა ვიყო, როგორი ვარ და როგორი არ მინდა ვიყო. მიუხედავად სხვადასხვა მიმართულებისა და სხვადასხვა მასალით მუშაობისა, ჩემთვის სახის ემოციის ხატვა ყველაზე საინტერესოა. ემოციას შევადარებდი ნოტების, ბგერების უსასრულო კომბინაციას , რომელიც მუსიკის გარდა ვიღაცისთვის აბსტრაქტული, გადღაბნილი ხმაურიცაა, მაგრამ ეს ხმაური ზოგჯერ უფრო საინტერესო და ინფორმაციულია, ვიდრე დალაგებული და სისტემური .
 
არასოდეს ვმალავდი ჩემს დამოკიდებულებას ზღვარს გადასული ტრადიციების მიმართ, მაგრამ არ ვთვლი, რომ ქართული კონტექსტიდან ამოვვარდი, უბრალოდ მიმაჩნია , სპეციფიკური კულტურა და ტრადიციები არ უნდა ათამაშებდნენ ადამიანებს. პირიქით, ადამიანები უნდა მართავდნენ მათ. ასეც ვიტყოდი, ტრადიციები კი არ უნდა გვაკონტროლებდეს, ჩვენ უნდა ვაკონტროლებდეთ ტრადიციებს. დღეს განვითარებული ქვეყნების წარმატება, ადამიანური რესურსების გამოყენების თვალსაზრისით, სწორედ ამ ფუნდამენტზეა დაშენებული - ერთი, როგორც ცალკე, რიგითი ადამიანის უნიკალურობაზე. ასეთ ქვეყნებში სწორედ ამიტომ ეძლევა პრიორიტეტი განათლებას. ვგულისხმობ არა მხოლოდ საგანმანათლებლო სისტემას, არამედ ეს არის მთელი პროცესი მშობლის ბავშვთან ურთიერთობებიდან დაწყებული, სახლის გარეთ სოციუმში დამოკიდებულების, როგორც ფენომენის, ტოლერანტობის, კრიტიკული აზროვნების, უფრო შეფასების ვიდრე განსჯის და ბოლო-ბოლო ზრდილობის ჩვევები. ამიტომ ასეთ ქვეყნებში რთულია ადამიანებით თამაში, მათით მანიპულირება. სწორედ ამიტომ არ სრულდება ჩემში ის აქტი, დავტოვე ქვეყანა და რაღაც ასეთი. მინდა საქართველოშიც ასე იყოს. მართალია ძალიან ნელა, მაგრამ მაინც ამისკენ მივდივართ . ვფიქრობ, ბოლო თაობის ემიგრაციას ძალიან გაუმართლა. ციფრულმა ხანამ , ახალმა ტექნოლოგიებმა უამრავ ადამიანს მისცა საშუალება, შეიძლება გეოგრაფიულად მოწყვეტილი იყო , მაგრამ არა სოციალურად ან პოლიტიკურად ან და თუნდაც კულტურულ ასპექტში. ეს ძალიან დიდი პრივილეგიაა . მეც არ ვარ გამონაკლისი და ვიყენებ ამ შესაძლებლობას. რაც აქ ვარ, საქართველოში დაახლოებით ათამდე გამოფენაში მივიღე მონაწილეობა. ვცდილობ ყველა პროექტი კონკრეტულ, ვიტყოდი, პრობლემურ კონცეფციაზე ავაგო. ხოლო გამოფენა , რომელიც ხელოვნების მუზეუმში იყო წარმოდგენილი, ძალიან ემოციური იყო ჩემთვის. დაარქივებული დაკითხვის ოქმი ხელში შემთხვევით ჩამივარდა და ეს ამბავი, კონკრეტულად კი ჩემი პაპის ტრაგიკული ცხოვრება, გახდა ამ თემაზე მუშაობის ინსპირაცია. 22 წლის უნიჭიერესი ბიჭი, რომელიც ბერიას ბრძანებით დახვრიტეს. ექსპოზიცია სამ ნაწილად იყო წარმოდგენილი - ინსტალაცია, ფერწერა და ვიდეო. ამ სამ ვექტორში ავსახე საკუთარი ხედვა, პერსონალური წარმოსახვა და ჩემეული ფორმა მივეცი ისტორიულ ტრაგედიას . პირველადი რეფლექსიით ჩვენ ვხედავთ იმას, რასაც ზედაპირზე მონოტონური ცხოვრება გვთავაზობს, მაგრამ სინამდვილე არასოდესაა ზედაპირზე. პროექტს დავარქვი “მიგდებული მეხსიერება” ( Neglected Memory)
 
ზოგადად, ამ კითხვებზე პასუხებით დაუსრულებლად შეიძლება საუბარი, ამიტომ მინდა ერთი წინადადებით დავასრულო - ფიქრი, ანალიზი და უწყვეტი კამათი საკუთარ თავთან.
culture
«Frankfurter Allgemeine Zeitung» (გერმანია): „ქართული სამზარეულოს მრავალფეროვნება: ტრადიციული სუფრის თავისებურებები“

„სუფრა - ასე ჰქვია ქართულ მოლხენა-დროსტარებას, რომელიც სტუმართმოყვარეობისა და მხიარულების განსახიერებას წარმოადგენს. რომელი კერძებს მიირთმევენ ქართველები სტუმრებთან ერთად? ჩვენი კორესპონდენტი შეეცადა ქართული სუფრის დიდებულება ეჩვენებინა და დარწმუნდებით, რომ ეს მართლაც კარგად გამოუვიდა“, - ასე იწყება გერმანულ გაზეთ „ფრანკფურტერ ალგემაინე ცაითუნგში“ (Frankfurter Allgemeine Zeitung) გამოქვეყნებული სტატია სათაურით „ქართული სამზარეულოს მრავალფეროვნება“ (ავტორი - მაიკე ფონ გალენი).

გთავაზობთ პუბლიკაციას შემოკლებით:

„როცა მივედით, მაგიდა უკვე გაშლილი დაგვხვდა: თეფშებზე დაწყობილი ყველით და ლორით, ნიგვზის ფარშიანი ბადრიჯნით, მხალეულობით, მწვანილით, კიტრით და პომიდორით... მათ შორის ჩადგმულია გრაფინები მოცხარის წვენით და ტარხუნის ლიმონათის ბოთლებით. ოფიციანტი წითელ ღვინოს ბოკალებში ასხამს. გარეთ თბილისური საღამოა, რესტორან „რიგის“ დარბაზში გაშლილ გრძელ მაგიდაზე კი ქართული სუფრა - ქართული ქეიფი იწყება.

ისინი, რომლებიც ქართულ სამზარეულოს არ იცნობენ, მადააღძრულები სწრაფად მიირთმევენ სიმინდის ფქვილისაგან გამომცხვარ თბილ მჭადებს, სალათებს და ყველს. მაგრამ ვინც იცის, ის ნელ-ნელა ჭამს და მთავარს ელოდება...

ქართველი ქალბატონი თიკო ტუსკაძე, რომელიც ლონდონში ცხოვრობს, მაგრამ ახლა სამშობლოში იმყოფება, ჩვენი გიდის როლს ასრულებს და ქართულ სუფრას გვაცნობს როგორც „გემრიელი საჭმელების უსასრულო რიგს“. იგი კულინარული წიგნის ავტორია და გვიხსნის, თუ რომელი საჭმელი როგორ მივირთვათ.

ზოგიერთმა უკვე საკმაო რაოდენობის სალათა მიირთვა, რომ მაგიდაზე ახალი კერძები მოაქვთ - მოხრაკულ-მოთუშული სოკო, ხაჭაპური, ხორცით მომზადებული კერძები... საჭმლით სავსე თეფშები სულ უფრო მრავლდება და მაგიდაზე თავისუფალი სივრცე მცირდება, თუმცა ახალ-ახალი ნუგბარისათვის ადგილი მოიძებნება.

„სტუმართმოყვარეობა - ქართული კულტურის განუყოფელ ნაწილს წარმოადგენს, რაც კარგად არის გამოხატული ქართულ სუფრაში, როცა მაგიდას ეროვნულ სამზარეულოს კერზები ამშვენებს“, - განმარტავს მაკა თარაშვილი. რა თქმა უნდა, იგი ახალბედა სუფრის წევრებისაგან განსხვავებით, შეცდომებს არ უშვებს და ყველაფერს ერთად არ მიირთმევს. მან კარგად იცის, რა როდის უნდა მიირთვას და უცხოელ სტუმრებს ჭამის საიდუმლოებას ასწავლის: როდის დგება მწვადის, „ჩაქაფულის და საჭმელების მიღების დრო...

ქართული ტრადიციის თანახმად, სუფრაზე იმდენი საჭმელი უნდა იყოს, რომ სტუმრების წასვლის შემდეგაც საკმაო რაოდენობით უნდა დარჩეს: „სუფრა, რომელზეც არაფერი აღარ რჩება, საქართველოში არ არსებობს“, - ამბობს მაკა თარაშვილი, - მასპინძლები იფიქრებენ, რომ სტუმრები მშივრები დარჩნენ. ამიტომ ყველაფერი უამრავია“.

რესტორანი „ქეთო და კოტე“ ძველი თბილისის უბანში, შემაღლებულ ადგილზე მდებარეობს. დარბაზში მყუდრო გარემოა შექმნილი. მაგიდები ყოველთვის მდიდრულადაა გაშლილი - ტრადიციული კერძები თანამედროვე სტილითაა გაფორმებული. თავდაპირველად თვენ მოგართმევენ ცივ და ვეგეტარიანულ კერძებს, ბოსტნეულს, შემდეგ გამომცხავარს, ცომეულს, ბოლოს კი ხორცით მომზადებულ საჭმელებს.

ქართული სუფრის ტრადიციაა თამადა, ანუ დროსტარების ხელმძღვანელი. იგი სუფრის თავში ზის და სადღეგრძელოებს ამბობს. რესტორან „შატო მუხრანში“, სადაც ჩვენ ვიყავით (თბილისიდან ერთი საათის სავალზე), მეღვინე პატრიკ ჰონეფმა ჩვენი სტუმრობის სადიდებელი სადღეგრძელო წარმოსთქვა. გერმანელი მეღვინე უკვე მრავალი წელია საქართველოში ცხოვრობს, ოჯახიც აქ ჰყავს. პატრიკი მადლობას გვიხდის სტუმრობისათვის, რომ გერმანელი ტურისტები საქართველოთი დაინტერესდნენ და კავკასიურ ქვეყანას ეწვივნენ.

მასპინძელი გვიხსნის, რომ სუფრის თამადა ყურადღებით ისმენს სტუმრების საუბარს  სადღეგრძელოებისათვის იმპულსის მისაცემად. იგი დისკუსიას ზომიერ მიმართულებას აძლევს და განწყობას ამაღლებს. ამიტომაც თამადა ისეთი პიროვნებაა, რომელიც ცნობილია თავისი კეთილი ხასიათით, გონებამახვილობით და ინტელექტით.

თუ როგორ მზადდება კლასიკური ქართული კერძები, ამას თქვენ თბილისიდან საკმაოდ მოშორებით, კახეთში გაიგებთ, სადაც ღვინის კომპანია „შუმის“ რესტორანი მდებარეობს. აქ სტუმარი საკუთარი თვალით ხედავს, თუ როგორ ცხვება ქართული თონის პური, როგორ კეთდება ხინკალი, რომელიც ქართული სამზარეულოს ერთ-ერთ დიდებულ და გემრიელ კერძს წარმოადგენს.

See all
Survey
ვინ გაიმარჯვებს რუსეთ - უკრაინის ომში?
Vote
By the way