,
უკრაინის შეიარაღებულმა ძალებმა კონტრშეტევის ახალი ეტაპი დაიწყეს. ინფორმაციას ამის შესახებ გაზეთი The New York Times-ი პენტაგონის ორ წარმომადგენელზე დაყრდნობით ავრცელებს.
წყაროების ინფორმაციით, უკრაინის თავდაცვის ძალების ძალისხმევა მიმართულია ქვეყნის სამხრეთ-აღმოსავლეთით მდებარე ტერიტორიების დეოკუპაციისკენ, თუმცა ძირითადი ძალები, რომლებიც კონტრშეტევაში ჩაერთვებიან, კვლავ რეზერვში რჩებიან.
ამერიკელი ოფიციალური პირები აღნიშნავენ, რომ უკრაინის შეიარაღებული ძალების გაძლიერებული ქვედანაყოფები შეეცდებიან წინ წასვლას სამხრეთით.
გაზეთი აღნიშნავს, რომ უკრაინელი სამხედროებისთვის მთავარ პრობლემად რჩება დანაღმული ველები, საარტილერიო დაბომბვა და საოკუპაციო ძალების საჰაერო დარტყმები.
მაშინ, როდესაც უკრაინაში კონფლიქტი ესკალაციის ახალ ფაზაში შევიდა, კვლავ გააქტიურდა დისკუსიები უკრაინის ტერიტორიაზე დასავლური ჯარებისა და კერძო თავდაცვითი კომპანიების გაგზავნის შესახებ, - წერს ფრანგული გაზეთი Le Monde-ი წყაროებზე დაყრდნობით.
„დიდ ბრიტანეთსა და საფრანგეთს შორის მიმდინარეობს დისკუსიები თავდაცვის სფეროში თანამშრომლობასთან დაკავშირებით, განსაკუთრებით ევროპაში მოკავშირეთა ძირითადი ჯგუფის შექმნის მიზნით, რომელიც ორიენტირებულია უკრაინასა და უფრო ფართო ევროპულ უსაფრთხოებაზე“, - განუცხადა Le Monde-ს ბრიტანულმა სამხედრო წყარომ.
ფრანგული გაზეთი აღნიშნავს, რომ უკრაინაში დასავლური ჯარების ან კერძო კომპანიების გაგზავნის შესახებ დისკუსიები 2023 წლის ბოლოდან შორ მანძილზე მოქმედი იარაღის მიწოდების გაზრდის ფონზე განახლდა.
წყაროების განცხადებით, უკრაინელებს არ შეუძლიათ ამ ტიპის რაკეტების გამოყენება ადგილზე დასავლური მხარდაჭერის გარეშე.
