- ზაპორიჟიას ოლქში უკრაინული შეტევა გრძელდება. მიმართულებები უცვლელია - მდინარე დნეპრის სიახლოვეს - ლობკოვეს მონაკვეთზე, ორიხივი-ტოკმაკის გზაზე - რობოტინეს სიახლოვეს, ტოკმაკი-პოლოჰის გზაზე და ველიკა ნოვოსილკას სამხრეთით რამდენიმე პოზიციაზე ერთდროულად. უკრაინელთა მხრიდან საბრძოლო მოქმედებების შესახებ ინფორმაცია პრაქტიკულად არ არსებობს ან მხოლოდ რამდენიმე ძალიან ზოგადი ვიდეოთი შემოიფარგლება. ეს ამ ეტაპზე სრულიად ლოგიკურია, რადგან რამდენიმე მონაკვეთზე ვითარდება კონტრშეტევა და ისიც სულ რამდენიმე დღეა. ახლა ნებისმიერი ინფორმაციის გაჟღერება მხოლოდ მათ პოზიციებსა და მდგომარეობას გაამხელს, რაც არასასურველია. ამასთან, რაიმე წერტილის აღების დაანონსება და შემდგომ მისი ვერ გათავისუფლება დემორალიზებასაც შეუწყობს ხელს. ამიტომაა, რომ იერიში მიმდინარეობს მრავალ ნაცნობ თუ უცნობ მონაკვეთზე - სხვადასხვა მასშტაბით (თუმცა ჯერჯერობით არცერთია განსაკუთრებით დიდი - ძალების დივერსიფიკაცია მნიშვნელოვანია).

რა ვიცით რუსული წყაროების მიხედვით?

ლობკოვე, რომელიც გუშინ უკრაინელებმა გაათავისუფლეს, წუხელ რუსული კონტრშეტევის შემდეგ კვლავ საბრძოლო მოქმედების ზონად იქცა. თუ ვინ აკონტროლებს დასახლებას - უცნობია. სავარაუდოდ, ისევ შეტაკებები მიმდინარეობს იქ.

რუსები ამბობენ რომ რობოტინეს სიახლოვეს და მალა ტოკმაჩკასთან უკრაინული ტექნიკა დაბომბეს. მათ შორის "ლეოპარდ 2" ტანკები და "ბრედლი" საბრძოლო მანქანა. სავარაუდოდ, სამხედროები გადარჩნენ. ტექნიკის ნაწილი განადგურდა, ნაწილი გარემონტებას ექვემდებარება. რა ოდენობაზე გვაქვს საუბარი? 1-4-მდე Leopard 2 ტანკზე, 4-6-მდე Bradley-ზე. არაფერი საგანგაშო ამ ტექნიკის დაკარგვაში არ არის. მთავარია მოწინააღმდეგის თავდაცვის სამშრიანი ზღუდის გარღვევა მოხდეს. რეალურად არც Leopard 2 არ არის გარდამტეხი და კრიტიკული მნიშვნელობის ტანკი და არც Bradley-ს საბრძოლო მანქანა ე.წ. "საოცარი იარაღი". მათი დაკარგვა ჩვეული მოვლენაა. ომია და ხან ტანკს დაკარგავ და ხან საბრძოლო მანქანას - მით უფრო თუკი ცოცხალი ძალა რჩება ცოცხალი. ერთადერთი პრობლემა ისაა, რომ ამ ეტაპზე ცოტა აქვთ ასეთი დასავლური შეიარაღება უკრაინელებს. მაგრამ აუფეთქებელი ტანკი არ არსებობს, ისევე როგორც გადაულახავი წინააღმდეგობა.

სხვა მხრივ თავად რუსი პროპაგანდისტებიც სიტუაციის შესაფასებლად იყენებენ ტერმინებს "რთული", "სერიოზული" და "პრობლემური". ამასთან, საინტერესოა რომ რუსები თავდაცვის პირველივე ხაზის შენარჩუნებაზე ძალიან დიდ ფსონს დებენ. ელიტური რაზმებიდან დაწყებული მობილიზებულებით დასრულებული იქ არიან განთავსებულნი. ამასთან, ვიცით ისიც, რომ რუსული თავდაცვის ზღუდეების შენარჩუნებაში არამხოლოდ არტილერია და ნაღმები, არამედ საბრძოლო შვეულმფრენებიც აქტიურად მონაწილეობენ. ეს კი მართლაც გამოწვევაა ამ ეტაპზე.

უკრაინელებისაგან მხოლოდ ის ვიცით, რომ წარმატებულად ვითარდება შეტევა ველიკა ნოვოსილკას სამხრეთით, სადაც რუსებმა პოზიციები მიატოვეს და გაიქცნენ.

ასევე ვიცით, რომ რუსების მხრიდან ზაპორიჟიას ოლქში რამდენიმე ადგილას მიატოვეს ფრონტის ხაზი და ქაოტურად დაიხიეს უკან.

ასევე ვიცით ისიც, რომ ორიხივის დაჯგუფების წინააღმდეგ დაძრული რუსული ჯავშანტექნიკის კოლონა უკრაინული არტილერიის ცეცხლქვეშ მოჰყვა და უკუიქცა. პროცესში ორი ერთეული ტექნიკა იქნა განადგურებული.

სხვა ნებისმიერი ინფორმაცია არის ძალიან შეზღუდული და ბუნდოვანი. ამასთან, რუსების მხრიდან 10+ უკრაინული ჯავშანტექნიკის განადგურების ზეიმად გამოცხადება უმწიფრობა და არასერიოზულია. ტექნიკის დაუკარგავად საბრძოლო მოქმედებები არ არსებობს. ასობით კილომეტრზე გადაჭიმულ საბრძოლო მოქმედებების ზონაში შეტევაზე მყოფი ძალა ტექნიკას რომ დაკარგავს ამაში უცნაურობა არაფერია - დაუკარგავად რომ ვითარდებოდეს იერიში ეს უფრო საოცარი იქნებოდა.

საინტერესოა ისიც, რომ აშკარაა უკრაინელები ფსონს ერთ მონაკვეთზე არ დებენ და რამდენიმე ადგილს ირჩევენ იერიშისათვის. მაღალი ალბათობით მუშაობენ უკრაინული დივერსიული და სპეციალური დანაყოფებიც, რომლებსაც მტრის ზურგში სწრაფად შეეძლებათ გადაადგილება. და შესაძლებელია ისიც, რომ უკრაინელების მხრიდან ზაპორიჟია არ იყოს შეტევის ძირითადი მიმართულება.

ახლა მთავარია დაველოდოთ საინფორმაციო ბურუსის გაფანტვას და ვნახოთ გაირღვევა თუ არა რუსული თავდაცვის ხაზი ისე, რომ რუსებს უკუსვლა მოუწიოთ ტოკმაკისაკენ. ზოგადად ომში საინფორმაციო ბურუსი - ე.წ. "ომის ბურუსი" (Fog of War/Nebel des Krieges) - სრულიადაც არაა გასაკვირი.

- უფრო ნათელი სიტუაციაა ბახმუტის მიმართულებით. უკრაინელები ბახმუტის სამხრეთით კურდიუმივკასა და კლიშჩიივკას სიახლოვეს შეტევას აგრძელებენ. არის ვერსიაც, რომ უკრაინული ძალების მოწინავე ჯგუფები ქალაქის სამხრეთით, ოპიტნესთანაც გამოჩნდნენ. ზუსტი ადგილმდებარეობების დადგენა საკმაოდ ცვალებად ვითარებაში ძალიან რთულია, მაგრამ ცხადია, რომ ამ მიმართულებით უკრაინელებს ინიციატივა აქვთ მოპოვებული. ეს კი უმნიშვნელო რამ არ არის.

- ჰენიჩესკი ყირიმიდან გამოსასვლელ ერთ-ერთ მონაკვეთში მდებარეობს, ხერსონის ოლქში, აზოვის ზღვაზე. დღეს უკრაინული რამდენიმე რაკეტა მიფრინდა რუსულ პოზიციებზე. ჰენიჩესკი რუსული მომარაგების ერთ-ერთი წერტილია და მასთან დაკავშირება არამარტო საგზაო და სარკინიგზო ინფრასტრუქტურითაა შესაძლებელი, არამედ ზღვითაც. ამასთან, ჰენიჩესკი რუსებმა ხერსონის ოლქის დროებით დედაქალაქად გამოაცხადეს.

ამასთან, საინტერესოა რომ ჰენიჩესკის გარდა ხერსონის ოლქის იმ მონაკვეთებზე, სადაც აპრილში პუტინი იმყოფებოდა და სამეთაურო პუნქტები მოინახულა ახლა უკრაინელები ზუსტი დარტყმებით ანადგურებენ მათ.

- ინტენსიურად იბომბება ბელგოროდის ოლქი, ქალაქი შებეკინო და მისი შემოგარენი. აფეთქებებია ოლქის სხვადასხვა ტერიტორიაზე, მათ შორის უშუალოდ ბელგოროდშიც. დაიბომბა ვორონეჟიც.

- დახმარების ახალი პაკეტი მზადდება აშშ-ს მხრიდან. ივლისში მეტი დეტალი გახდება ცნობილი. ამჯერად აშშ საარტილერიო ამუნიციის სწრაფ შევსებაზეა ორიენტირებული.

მიყევით ბმულს - გიორგი კობერიძე