- ღამით უკრაინელებმა სარაკეტო იერიში მიიტანეს ზაპორიჟიას ოლქის ოკუპირებულ ქალაქებში მდგომ რუსულ ნაწილებზე მელიტოპოლში, ბერდიანსკში, პრიმორსკსა და ტოკმაკში. მელიტოპოლის შემთხვევაში სამიზნე იარაღის საწყობი იყო, რომლის აფეთქებამაც შემდგომი დეტონაციაც გამოიწვია. ჭურვების დეფიციტის შექმნა მნიშვნელოვანი უპირატესობის წინაპირობა გახდება.
- გამთენიიდან უკრაინელები ბომბავენ ოკუპირებულ დონეცკთან მომიჯნავედ მდებარე იასინუვატას, რომელშიც 2014 წლიდან რუსული იარაღის საწყობები და სამხედრო ბაზებია განთავსებული. როგორც კი ადგილის აღმოჩენა ხდება იწყება საარტილერიო დაბომბვა, რომელიც სიახლოვიდან გამომდინარე ძალიან ეფექტურია მოწინააღმდეგის გასანადგურებლად.
- ბახმუტთან უკრაინელები ინტენსიურად უტევენ კლიშჩიივკასა და კურდიუმივკას. კლიშჩიივკაში ბევრია რუსი ტყვეც. შეტევა რამდენიმე მიმართულებიდან ვითარდება და თუკი მიზანს მიაღწია და რუსებმა ევაკუაცია არ მოახდინეს, სავარაუდოა, რომ რუსები იქ ალყაშიც შეიძლება აღმოჩნდნენ. ამასთან, რუსებმა შესაძლოა ბახმუტიდანაც კი მოხსნან რეზერვები დასახლების შესანარჩუნებლად. მაგრამ, თავის მხრივ, ეს გამოიწვევს ამ მიმართულების მოშიშვლებას.
- დონეცკის ოლქში, სამხრეთში, ზაპორიჟიას ოლქის სიახლვოვეს, რუსული თავდაცვის მთავარი ზღუდის მომიჯნავედ, უკრაინელები რუსულ პოზიციებს სტარომაიორსკესთან უტევენ. მოწინავე სპეციალური რაზმები კი კვლავ ჩანან უფრო სამხრეთით, სტარომლინივკასთან. სავარაუდოა, რომ რუსები სწორედ სტარომლინივკასთან შეეცდებიან სიტუაციის დასტაბილურებას. ეს მონაკვეთი ველიკა ნოვოსილკას სამხრეთით, მარიუპოლისაკენ მიმავალ გზაზე მდებარეობს. ზოგადად, საკმაოდ მწირი ინფორმაცია ვრცელდება უკრაინელთა მხრიდან. თუკი უკრაინელებმა სტარომლინივკას მონაკვეთზე რუსული თავდაცვა გაარღვიეს შემდგომ, მარიუპოლის გზაზე დიდი დასახლებები ნაკლებადაა წარმოდგენილი, ხოლო სოფლები ერთმანეთისაგან დაახლოებით 3-დან 6 კილომეტრამდე მონაკვეთში მდებარეობს. ამასთან, გზად პატარა მდინარე მოკრი იალი მიუყვება, რომლის დატბორვაც რუსებმა უკვე სცადეს.
- საინტერესო განცხადება გააკეთა ჩინეთის წარმომადგენელმა ევროკავშირში. მან აღნიშნა, რომ ჩინეთს არავითარი საფუძველი არ აქვს მხარი არ დაუჭიროს უკრაინის 1991 წლის საზღვარს და რომ საერთოდაც ჩინეთი ემხრობა სხვა ქვეყნების ტერიტორიულ მთლიანობასაც.
- "ვაგნერის" შესახებ პუტინმა უკმაყოფილოდ აღნიშნა, რომ რუსეთის მხრიდან ორგანიზაციას 1 მილიარდი დოლარი დაახარჯა (ეს ოფიციალურად). ეს არადა ძალიან უცნაური განცხადებაა, რადგან ამ შემთხვევაში პუტინი ირიბად პასუხისმგებელი გამოდის ყველა იმ მხეცურ დანაშაულზე, რაც "ვაგნერის" მიერ იქნა ჩადენილი მსოფლიოს სხვადასხვა სახელმწიფოში.
- "ვაგნერი" თავისი ნაწილებით ბელარუსში განთავსდება და ლუკაშენკას დაცვის უმთავრეს წყაროდ გადაიქცევა. "ვაგნერი" ესვრის ყველას, რადგან მათ მხოლოდ ერთ რამესთან აქვთ ლოიალობა - ფულთან. რეალურად, ლუკაშენკას სურს საკუთარი პრეტორიანული გვარდია შექმნას, მაგრამ იდეაში პუტინისათვისაც როსგვარდიასთან ერთად "ვაგნერი" იყო ერთ-ერთი ასეთი დასაყრდენი, მაგრამ როგორც ვხედავთ არ გაამართლა.
ბელარუსში "ვაგნერის" განთავსება პოლონეთისათვის საკმაოდ საგანგაშო სიგნალია. ამიტომაა, რომ პოლონეთის ხელისუფლება განსაკუთრებულ ზომებს მიიღებს საზღვრის გამაგრების საკითხთან მიმართებით და აქტიური დაკვირვების რეჟიმზე იქნება გადასული. პოლონეთისათვის ბელარუსის მოქმედი ხელისუფლება ყველაზე არასანდო და თაღლითური ინსტიტუციაა მთელს აღმოსავლეთ ევროპაში, ხოლო როდესაც ამ ყველაფერს "ვაგნერიც" ემატება იქ საფრთხეების ანალიზი სხვა დონეზე ავა.
- დღეს დღის განმავლობაში ვრცელდებოდა დაუდასტურებელი ინფორმაცია რომ უკრაინაში რუსული საოკუპაციო არმიის ყოფილი ხელმძღვანელი და სირიის ყასბად წოდებული სუროვიკინი დაკავებულია. მას შესაძლოა გადატრიალებაში თანამონაწილეობას ან გადატრიალების წინასწარ ცოდნას ედავებოდნენ (დასავლური მედია ამას განიხილავს). თუკი ეს ამბავი მომდევნო დღეებში (ან საერთოდაც) დადასტურდა, გამოდის რომ ჯარის შიგნით წმენდა დაიწყო. თუმცა წმენდა რომც არ იყოს დაწყებული, უკვე ერთმანეთისადმი ნდობის არარსებობა და ეჭვი თავისას იზამს.
