ამერიკულ გაზეთ „უოლ სთრით ჯორნელში“ (The Wall Street Journal) გამოქვეყნებულია სტატია სათაურით „ფოლადის კედელი“: უკრაინის არმია შეტევის პირველივე დღეებში მძიმე სიტუაციაში მოექცა“ (ავტორები - იენ ლოვეტი და მარკუს უოთერი), რომელშიც გადმოცემული და მიმოხილულია უკრაინის შეიარაღებული ძალების მოქმედება რუსეთის პოზიციებზე შეტევის დროს, რაც საკმაოდ მძიმედ მიმდინარეობს და კიევმა მნიშვნელოვანი დანაკარგები განიცადა. ავტორები ერთ-ერთი ქვედანაყოფის ბრძოლის განზოგადებას ახდენენ.

გთავაზობთ პუბლიკაციას მცირე შემოკლებით:

„შეტევა ზაპოროჟიედან ხუთშაბათს, გვიან ღამით დაიწყო, მასში 100-მდე უკრაინელი ჯარისკაცი მონაწილეობდა, ორი გერმანული ტანკი „ლეოპარდი-2“ და რამდენიმე ამერიკული ქვეითთა საბრძოლო ჯავშანმანქანა „ბრედლი“. ერთ-ერთი ჯარისკაცის თქმით, გეგმა შემდეგში მდგომარეობდა: ქვედანაყოფი სამხრეთით წინ უნდა წასულიყო, მიახლოებოდა რუსების მიერ დაკავებულ პატარა ქალაქ ტოკმაკს და იქ შეუერთდებოდა მეორე-მესამე მხრიდან ტოკმაკისაკენ წამოსულ კიდევ ორ ქვედანაყოფს და გაერთიანებული ძალებით ქალაქში შეიჭრებოდნენ.

ჯარისკაცი, რომელიც დაახლოებით 28 წლის იქნება, ჰყვება, რომ როგორც კი რაზმმა გამთენიისას ქალაქ ტოკმაკთან ახლოს გზატკეცილი გადაკვეთა, რუსებმა მას „გრადებიდან“ (რეაქტიული ზალპური ცეცხლის სისტემიდან) სროლა აუტეხეს. გარდა ამისა, გზის გასწვრივ მინდორი დანაღმული აღმოჩნდა. ჰაერში უცებ გამოჩნდნენ ვერტმფრენები და რეაქტიული ავიაცია. „მართალია, ქალაქს სამ კილომეტრზე მივუახლოვდით, მაგრამ ერთი „ლეოპარდი“ რუსებმა აგვიფეთქეს. შეიქმნა ისეთი შთაბეჭდილება, რომ ისინი გველოდებოდნენ. რუსებს ყველგან პოზიციები ჰქონდათ გამაგრებული, ჩვენ თითქოს ფოლადის კედელს წავაწყდით. საშინელება იყო“, - ჩივის უკრაინელი ჯარისკაცი.

კონტრშეტევის დაწყებიდან, რომლის მეშვეობით უკრაინას რუსების მიერ დაკავებული ტერიტორიების დაბრუნება სურს, მხოლოდ რამდენიმე დღე გავიდა, მაგრამ უკრაინელი სამხედროები უკვე პრობლემების წინაშე დგანან.

რუსები თვეების განმავლობაში ემზადებოდნენ სამხრეთში უკრაინის არმიის სავარაუდო შეტევის შესაჩერებლად, სადაც კიევი ვარაუდობს ყირიმ-დონბასის სახმელეთო დერეფნის გადაჭრას და აზოვის ნაპირზე გასვლას.

სოციალურ ქსელებში გამოქვეყნებული ვიდეოჩანაწერების მიხედვით თუ ვიმსჯელებთ, უკრაინის არმიამ უკვე დაკარგა რამდენიმე გერმანული ტანკი „ლეოპარდი“ და ამერიკული ჯავშანმანქანა „ბრედლი, ზაპოროჟიეს ოლქის სამხრეთ ნაწილში, სადაც გაშლილ სტეპში შემტევი ძალა პრაქტიკულად თავს ვერსად ვერ შეაფარებს, ისინი მოწინააღმდეგისათვის ხელისგულივით მოჩანან.

უკრაინელი ჩინოვნიკები თითქმის არაფერს არ ამბობენ მიღწეულ პროგრესზე და განმარტავენ, რომ კონტრშეტევის შედეგების გამოვლენას დრო ჭირდება და რომ შეტევის დროს დანაკარგები გარდაუვალია.

ეს კონტრშეტევა, ალბათ, იმის განმსაზღვრელი იქნება, შეუძლია თუ არა კიევს დასახული მიზნის მიღწევა და რუსეთის არმიის ჯერ შევიწროვება, შემდეგ კი გაძევება უკრაინის ტერიტორიიდან. ამჟამად რუსეთი უკრაინის სამხრეთ და აღმოსავლეთ ნაწილის ფართობის 20%-ს აკონტროლებს.

დასავლეთმა უკრაინას მილიარდობით დოლარის სამხედრო შეიარაღება მიაწოდა და ათობით ათასი უკრაინელი ჯარისკაცი გაწრთვნა კონტრშეტევის განხორციელებისათვის. ახლა, თავის მხრივ, კიევმაც უნდა აჩვენოს დასავლელ მფარველებს, თუ რის გაკეთება შეუძლია ბრძოლის ველზე, რამდენად გადააქცევს გამარჯვებად გაწეულ დახმარებას.

სამხედრო ანალიტიკოსები ამბობენ, რომ უკრაინის არმიის ძირითადი კონტრშეტევა ჯერ არ დაწყებულა და დასავლური იარაღის დიდი ნაწილი ჯერაც გამოუყენებელია.

ტოკმაკის რაიონში, ზაპოროჟიეს ოლქის აღმოსავლეთ ადმინისტრაციული საზღვრის ახლოს, უკრაინის არმიის რამდენიმე ქვედანაყოფის ჯარისკაცებმა თქვეს, რომ წინ მიდიან, „მაგრამ რუსების განუწყვეტელი ცეცხლის ქვეშ არიან“.

საველე-სადაზვერვო რაზმის ორი მებრძოლი, რომლებიც თავიანთ ნამდვილ სახელს არ ამხელენ, ღამის ბრძოლიდან დაბრუნდნენ და ამბობენ, რომ იმ რუსებს შორის, რომლებთანაც შეტაკება ჰქონდათ, არიან პროფესიონალებიც და არიან მობილიზებულებიც, რომლებთაც, უკრაინელებთან შედარებით, მორალური სულისკვეთებისა და დისციპლინის ბევრად უფრო დაბალი დონე აქვთ. მათი თქმით, უკრაინის არმია დღეისათვის ყველაზე კარგად არის აღჭურვილი, ვიდრე ოდესმე ყოფილა.

მნაღმავთა ქვედანაყოფის მეთაური, რომელსაც მეტსახელად „ფინელს“ ეძახიან, ამბობს, რომ „შეტევის დროს, რასაკვირველია, დანაკარგები გვექნება, მაგრამ ვცდილობთ, რომ ჩვენი დანაკარგები, რუსებთან შედარებით, ნაკლები იყოს“.

„ფინელის“ განმარტებით, დასავლური ტექნიკისათვის პრობლემას ადგილობრივი უკრაინული ნიადაგი წარმოადგენს, რომელიც ბოლო დღეების წვიმების გამო გაუვალ ტალახად გადაიქცა: „ამერიკული ჯავშნიანი მანქანები - MaxxPro-ები - მიწაში იფლობიან და „იძირებიან“. ისინი ქალაქის ქუჩებში და მშრალ ადგილებში - უდაბნოში - ბრძოლებისთვის არიან შექმნილი. ჩვენთანაც შეუძლიათ მოძრაობა, მაგრამ ძლივ-ძლივობით“.

„ფინელის“ თქმით, უკრაინელი სამხედროების კიდევ ერთი პრობლემაა ზოგიერთო ოფიცრის არასაკმარისი მომზადებისა დონე და სამხედრო გამოცდილების არქონა. „სტრესული და კრიზისული სიტუაციების დროს ისინი იბნევიან და არ იციან, როგორ უნდა მოიქცნენ“, - აღნიშნავს მნაღმავთა ქვედანაყოფის მეთაური.

რაც შეეხება უშუალოდ დასავლურ შეიარაღებას, ის არასაკმარისია და ყველა უკრაინული სამხედრო ნაწილი არ არის უზრუნველყოფილი. არის შემთხვევები, როცა მებრძოლები საკუთარი ფულით ყიდულობენ სამოქალაქო ავტომანქანებს, რომლებსაც საბრძოლო სახის მანქანებად გადააკეთებენ ხოლმე.

უკრაინელი მებრძოლების თქმით, სამხრეთის ფრონტზე ამჟამინდელი კონტრშეტევა რთული და მძიმე იქნება - უფრო მძიმე, ვიდრე გასული წლის შეტევა. „რუსებმა კარგად გაამაგრეს თავიანთი პოზიციები’, - ამბობს ვეტერანი უკრაინელი ჯარისკაცი, რომელსაც მეტსახელად „ბაბუას“ ეძახიან, - ისინი ჩვენ გველოდებიან“.

ტოკმაკთან ახლოს მომხდარი ბრძოლის მონაწილე ორმა უკრაინელმა ჯარისკაცმაც თქვა, რომ შარშან რუსები ისე სწრაფად იხევდნენ უკან, რომ ყველაფერს ტოვებდნენ და მირბოდნენ, ახლა კი უკრაინელებმა ტოკმაკთან ბრძოლაში ფაქტიურად მარცხი განიცადეს - გერმანული ტანკებიც დაკარგეს.  9 ივნისს დილის ექვს საათზე უკრაინელებს დაზიანებული“ ლეოპარდი“, რუსებს რომ არ ჩავარდნოდათ ხელში, უკან უნდა გაეთრიათ, მაგრამ როგორც კი ტანკთან ახლოს მივიდნენ, ნაღმებს წააწყდნენ. ერთი ნაღმი აფეთქდა და ჯარისკაცს ფეხი მოაგლიჯა.

წყარო: https://www.wsj.com/articles/ukraine-achieves-mixed-success-in-counteroffensives-early-battles-says-u-k-e0b40334