თბილისის პირველ კლასიკურ გიმნაზიაში სწავლის პერიოდშივე გამაჩნდა ინტერესი ტექნიკური საგნების მიმართ და პროფესიის არჩევისას გადავწყვიტე, ჩემი მომავალი ინჟინერიისთვის დამეკავშირებინა. მიმაჩნდა, რომ ეს იყო სფერო, რომელიც ახალგაზრდა პროფესიონალების ნაკლებობას განიცდიდა და ვფიქრობდი, სწორი პროფესიული განვითარების შემთხვევაში, თანამედროვე მიდგომების და ტექნოლოგიების დანერგვით შევძლებდი როგორც დარგის ხელშეწყობას, აგრეთვე ჩემს წარმატებულ პროფესიულ რეალიზებას.
ჩავაბარე საქართველოს ტექნიკურ უნივერსიტეტში სამშენებლო ფაკულტეტზე და წარჩინებით დავიცავი ბაკალავრის და მაგისტრის ხარისხი. შემდგომში თბილისის თავისუფალი უნივერსიტეტის ბიზნეს სკოლა ESM-ში მომენიჭა ბიზნესის ადმინისტრირების მაგისტრის ხარისხი, წლის ყველაზე მაღალი აკადემიური მოსწრების სტუდენტის სტატუსით.
ტექნიკურ უნივერსიტეტში სწავლისას დავიწყე სამუშაო პრაქტიკა და გავიარე კარიერული წინსვლის მნიშვნელოვანი ეტაპები, დაწყებული რიგითი მენეჯერობიდან, დამთავრებული ტექნიკური მიმართულების ხელმძღვანელობით ერთ-ერთ უმსხვილეს ინფრასტრუქტურულ სამშენებლო კომპანიაში. მონაწილეობა მივიღე ორმოცდაათზე მეტ მნიშვნელოვან პროექტში. ვხელმძღვანელობდი თბილისის და საქართველოს მასშტაბით არაერთი ხიდის, ესტაკადის, გზის, გვირაბის, პარკის, ისტორიული, კულტურული, კომერციული და ადმინისტრაციული შენობების მშენებლობის და რეაბილიტაციის პროექტებს.
გამიმართლა, რომ საწყის ეტაპზევე ჩემი პროფესიული ზრდა ისეთი ხელმძღვანელობის პირობებში ხდებოდა, რომლებიც თავად მაძლევდნენ მაგალითს მათი თვითგანვითარებისკენ სწრაფვით და თან ხელს უწყობდნენ ჩემს ყველა საგანმანათლებლო ინიციატივას. ვმონაწილეობდი არაერთ პროფესიულ ღონისძიებაში საზღვარგარეთ და მიღებული ცოდნის ქართველი კოლეგებისთვის გაზიარებას და მიმდინარე პროექტებში დანერგვას ვცდილობდი. პროფესიულ ზრდასთან ერთად მივხვდი, რომ სამშენებლო პროექტების მართვა-მენეჯმენტი იყო ის, რაც მაინტერესებდა და შემდგომში ამ მიმართულებით ვახდენდი ჩემი კვალიფიკაციის ამაღლებას. იმავდროულად, პროფესიულმა განვითარებამ გამიჩინა ამბიცია გავმხდარიყავი გლობალური ინდუსტრიის ნაწილი. შესაბამისად, მოვიძიე Columbia University in the City of New York, რომელსაც მშენებლობის მენეჯმენტის მიმართულებით ყველაზე გამორჩეული სამაგისტრო პროგრამა აქვს მსოფლიოში. უნივერსიტეტი 2021 წელს წარმატებით დავამთავრე როგორც პირველმა ქართველმა მაგისტრმა ინჟინერიის მიმართულებით.
უნივერსიტეტში სალექციო დრო უფრო მეტად ქეისების გარჩევასა და დარგში მოღვაწე წარმატებული სტუმრების ლექციებზეა აწყობილი, რაც სტუდენტს საშუალებას აძლევს, გარდა სახელმძღვანელო მასალით სწავლისა, რომელიც საკმაოდ ინტენსიურია და დღეში ასეულობით გვერდის კითხვას საჭიროებს, პირადად გაიცნოს ლიდერები, დაუსვას სასურველი შეკითხვა, გაცვალოს კონტაქტები, დამატებით მიიღოს ცოდნა და სასარგებლო ინფორმაცია.
უნივერსიტეტის ერთერთი მთავარი საქმიანობა, გარდა ცოდნის გაცემისა, არის კვლევითი საქმიანობა. კოლუმბიის უნივერსიტეტი ამ მიმართულებითაც ძალიან ცნობილი და გამორჩეულია. უნივერსიტეტში ყველაზე წარმატებული პროფესორები ხელმძღვანელობენ უნივერსიტეტთან არსებულ კვლევით ცენტრებს, რომლებიც კვლევითი და სამუშაო პრაქტიკის გავლის მიზნით თანამშრომლობენ სხვადასხვა სახელმწიფო უწყებებთან და კომპანიებთან. სწავლის პარალელურად ამირჩიეს კოლუმბიის უნივერსიტეტთან არსებული Center for Buildings, Infrastructure and Public Space-ის (CBIPS) მკვლევარად, შემდგომში ასოცირებულ თანამშრომლად და მოგვიანებით უკვე მრჩეველთა საბჭოს წევრად. ცენტრში, სხვადასხვა პროექტებთან ერთად, საშუალება მქონდა ნიუ-იორკის პარკების და რეკრეაციის სამსახურისთვის ერთი წლის მანძილზე მემუშავა კვლევაზე, რომელიც ეხებოდა ნიუ-იორკის წყლისპირა ინფრასტრუქტურის მდგრადობას, რაც ასევე მოიცავდა მათთან სტაჟირებას. პარალელურად გვქონდა არაერთი საინტერესო შეხვედრა სახელმწიფო უწყებებში თუ კერძო კომპანიებში; ვორქშოპები, მათ შორის კემბრიჯის უნივერსიტეტის მაგისტრანტებთან, რომლებსაც სტუმრად ვეწვიეთ დიდ ბრიტანეთში და ა.შ.
სწავლის დამთავრების შემდეგ ვმოღვაწეობ ამერიკულ საინჟინრო კომპანია Gannett Fleming Engineers and Architects-ის ნიუ-იორკის ოფისში, პროექტის მენეჯმენტის გუნდში, პროექტის ინჟინერის პოზიციაზე, სადაც ნიუ-იორკის მერიის საჯარო სააგენტოებს ვუწევთ პროექტის მენეჯმენტს, პროექტირებას და მშენებლობას, რომ მათ განკარგვაში არსებულმა საინჟინრო სისტემებმა მათი საინჟინრო სრულყოფით დააკმაყოფილონ ახალი გარემოს დაცვითი რეგულაციები.
ასევე ვმუშაობ ნიუ-იორკში მოღვაწე საკონსულტაციო კომპანიაში Pena-Alcantara Consultants, Inc. როგორც უფროსი ინჟინერი და კონსულტაციებს ვუწევთ კერძო კომპანიებს და ნიუ-იორკის მერიის საჯარო სააგენტოებს ინფრასტრუქტურული პროექტების მიმართულებით.
აგრეთვე ვარ Columbia University CBIPS-ის ბორდის წევრი, სადაც ახალგაზრდა მკვლევარებს ვუწევ მენტორობას და ბორდის სხვა წევრებთან ერთად, რომელიც შედგება დარგის ლიდერებისგან, ვიხილავთ ინფრასტრუქტურის მშენებლობის სფეროში მიმდინარე სიახლეებს, გამოწვევებს და სხვადასხვა საკითხებს. ვარ American Society of Civil Engineers, Institute for Sustainable Infrastructure და ორგანიზაციის - Engineers Without Borders-ის წევრი, სადაც მესამე წელია, შერჩეული ვარ საერთაშორისო სტუდენტური საინჟინრო კონკურსის ნამუშევრების შემფასებლად.
აშშ-ში ინჟინრად მუშაობა ერთის მხრივ გეხმარება შეძლებისდაგვარად დაიცვა ცხოვრების ბალანსი, მაგრამ ამასთან მოითხოვს არაერთი პროფესიული სერთიფიკატის და ლიცენზიის ფლობას, რაც საკმაო დროს, ენერგიას და რესურს მოითხოვს. წარმატებული კარიერისთვის საჭიროა ყოველდღიური სწრაფვა, ინიციატივები, და პროაქტიული მიდგომა საქმის მიმართ. მშენებლობა, ისევე როგორც სხვა დარგები, მუდმივად განვითარების პროცესშია და თანამედროვე ტექნოლოგიების და სიახლეების ცოდნა კარიერული წარმატების ერთერთი მნიშვნელოვანი პირობაა.
ვთვლი ჩემი საბოლოო მიზანი მაინც არის ის, რომ აშშ-ში მიღებული ცოდნა და გამოცდილება ისევ საქართველოს მოხმარდეს. აშშ-ში ყოფნისას თუ თბილისში ჩასვლისას სიამოვნებით ვერთვები გარკვეულ აქტივობებში, პროფესიულ კონსულტაციებში, თუ სწავლის გაგრძელებასთან დაკავშირებული რჩევების მიცემაში სტუდენტებისთვის. გასულ წელს, ილიას უნივერსიტეტის და სან დიეგოს სახელმწიფო უნივერსიტეტის სტუდენტების მიწვევით, მქონდა პატივი, წამეკითხა საჯარო ონლაინ ლექცია მწვანე შენობებზე და მწვანე ინფრასტრუქტურაზე, რომელიც ჯერ კიდევ სიახლედ რჩება საქართველოსთვის.
მივმართავ სტუდენტებს, უმაღლეს სასწავლებლებს და სხვა დაინტერესებულ მხარეებს, რომ ნებისმიერი კითხვის ან საჭიროების შემთხვევაში დამიკავშირდნენ. მე მხოლოდ მოხარული ვიქნები, თუკი ჩემი გამოცდილების გაზიარების საშუალება მომეცემა მათთვის. მომავალ სტუდენტებს ვურჩევ უნივერსიტეტის არჩევისას ყურადღება გაამახვილონ როგორც უნივერსიტეტის და პროგრამის რეიტინგზე, ასევე იმ აქტივობებზე, რაც სასწავლო პროგრამის პარალელურად ხდება, რადგან ხშირ შემთხვევაში, ასეთი აქტივობები არანაკლებ მნიშვნელოვანია სწავლის პროცესზე და პრაქტიკულ გამოცდილებასთან ერთად შესანიშნავ სანაცნობო წრეს ქმნის შემდგომი დასაქმებისთვის. დამწყებ ინჟინრებს კი ვურჩევ, რომ დაისახონ მიზნები, იარონ მისკენ და აუცილებლად მიაღწევენ მას. ამ გზაზე ხშირად ექნებათ უსამართლობის განცდა, იქნება წინსვლაც და გარკვეული წარუმატებლობაც. თუმცა, თუკი იქნებიან მიზანდასახული, მონდომებული, და დაიცავენ პროფესიულ ეთიკას, აუცილებლად მიაღწევენ საწადელს.
