USD 2.7067
EUR 3.1230
RUB 3.3103
Tbilisi
«BBC» (დიდი ბრიტანეთი): „სიტუაცია რთულია, მაგრამ სული ჯერ არ ამოგვსლია...“
Date:  342

უკრაინის პრემიერ-მინისტრმა დენის შმიგალმა ინტერვიუ მისცა დიდი ბრიტანეთის სამაუწყებლო კომპანიას „ბი-ბი-სი“-ს (BBC) რუსულ სამსახურს, რომელიც გამოქვეყნებულია სათაურით „სიტუაცია რთულია, მაგრამ სული ჯერ არ ამოგვსლია...“.

გთავაზობთ პუბლიკაციას მცირე შემოკლებით:

როგორც უკრაინის პრემიერ-მინისტრმა დენის შმიგალმა განაცხადა ინტერვიუში, რუსეთთან ომში დამარცხება მესამე მსოფლიო ომის დაწყებას ნიშნავს. მან მოუწოდა აშშ-ის კონგრესს რაც შეიძლება სწრაფად მიიღოს კანონპროექტი უკრაინის დახმარების თაობაზე, რომელიც ჯერ კიდევ გასული წლის ბოლოდან დაბლოკილი რჩება.

დენის შმიგალმა აღნიშნა, რომ იგი „ფრთხილი ოპტიმიზმით“ უყურებს საკანონმდებლო პაკეტის მხარდაჭერას, რომელიც უკრაინისათვის 61 მილიარდი დოლარის გამოყოფას ითვალისწინებს.

„დაგვეხმარეთ! თუ დავმარცხდებით, მესამე მსოფლიო ომი დაიწყება“

ამას წინათ კონგრესის წარმომადგენელთა პალატის სპიკერმა, რესპუბლიკელმა მაიკ ჯონსონმა განაცხადა, რომ უკრაინის შესახებ კანონპროექტის კენჭისყრა შაბათს, 20 აპრილს გაიმართება. პრეზიდენტმა ჯო ბაიდენმა უკვე განაცხადა, რომ იგი კანონპროედქტს მხარს მტკიცედ უჭერს. თეთრი სახლის მეთაურმა განაცხადა, რომ იგი დაუყონებლივ ხელს მოაწერს წარმომადგენელთა პალატის მიერ მიღებულ კანონპროექტს, რომ დოკუმენტი რაც შეიძლება სწრაფად შევიდეს ძალაში: „ამით ჩვენ მთელ მსოფლიოს ვაჩვენებთ, რომ ჩვენს უკრაინელ მეგობრებს მხარს ვუჭერთ!“.

როგორც დენის შმიგალი ამბობს ინტერვიუში, „ჩვენ ამ საკითხზე კონგრესმენებს ვესაუბრეთ და ყველა ოპტიმისტურად თვლის, რომ კანონპროექტი მიღებული იქნება. რასაკვირველია, ჩვენც ვიზიარებთ ასეთ განწყობას. ეს ფული დიდი ხანია გვჭირდება, რადგან ფრონტზე რთული მდგომარეობაა შექმნილი. გვჯერა, რომ ჩვენი მთავარი მოკავშირის სამხედრო დახმარებით სიატუაცია გამოსწორდება“.

„თუ უკრაინა დაეცემა, უსაფრთხოების მსოფლიო სისტემაც დაინგრევა და კაცობრიობას უსაფრთხოების ახალი სისტემის შექმნა-ძიება მოუწევს. წინააღმდეგ შემთხვევაში მსოფლიოში უამრავი კონფლიქტი გაჩნდება და საბოლოო ჯამში მესამე მსოფლიო ომის წინაშე აღმოვჩნდებით“, - თვლის უკრაინის პრემიერ-მინისტრი, - „ჩვენი საერთო ამოცანაა დავიცვათ დემოკრატიული ფასეულობები, დავიცვათ მეორე მსოფლიო ომის შემდეგ ცამოყალიბებული უსაფრთხოების გლობალური სისტემა, რომ ევროპაში გრძელვადიანი და მდგრადი მშვიდობა შენარჩუნდეს“.

უკრაინას ადრეც ბევრჯერ გაუკეთებია გამაფრთხილებელი განცხადება, რომ თუ რუსეთი ომს მოიგებს, შემდეგ კრემლი პოლონეთში შეიჭრება, რაც მესამე მსოფლიო ომის დაწყების მანიშნებელი იქნება. მსგავს ვარაუდებს გამოთქვამენ აშშ-ისა და ევროპული ქვეყნების წარმომადგენლებიც.

კრემლი ასეთ განცხადებებს „სასაცილოდ“ თვლის. მარტის თვეში რუსეთის პრეზიდენტმა ვლადიმერ პუტინმა კიეველი და დასავლელი პოლიტიკოსების ვარაუდს, რომ „ერთ მშვენიერ დღეს რუსეთის არმია აღმოსავლეთ ევროპის ქვეყნებში შეიჭრებაო“, „სრული აბდაუბდა“ უწოდა.

უკრაინის სამი პრიორიტეტი

უკრაინა მნიშვნელოვნად არის დამოკიდებული იარაღის მიწოდებაზე აშშ-დან და დასავლეთის სხვა ქვეყნებიდან, რომლის გარეშე კიევისათვის ძალიან რთული იქნება ბრძოლის გაგრძელება რუსეთთან - მოწინააღმდეგესთან, რომელსაც უპირატესობა აქვს როგორც ცოცხალ ძალაში (მოსახლეობის ბევრად მეტი რაოდენობის გამო), ასევე საბრძოლო მასალებში და სამხედრო ტექნიკაში.

სამშაბათს პრეზიდენტმა ვოლოდიმირ ზელენსკიმ ამერიკული მაუწყებლისათვის - PBS-სისათვის მიცემულ ინტერვიუში ხაზი გაუსვა, რომ უკრაინას აშშ-ის დახმარების გარეშე მტერზე გამარჯვების შანსი არ აქვს. „მე სრულიად გულახდილად ვამბობ, რომ ამერიკული დახმარების გარეშე ვერ გავიმარჯვებთ. ომში აუცილებელია მტერზე ძლიერი ვიყოთ. დღეს რუსეთი ჩვენ რომ 10 საარტილერიო ჭურვს გვესვრის, ჩვენ მხოლოდ ერთის გასროლა შეგვიძლია. განა ასეთ სიტუაციაში თავდაცვას შევძლებთ? ვერ შევძლებთ. ჩვენ გვინდა, რომ შეფარდება იარაღში ათი ათზე იყოს“.

ეს პოზიცია გამოხატა პრემიერმა დენის შმიგალმა BBC-სთან ინტერვიუშიც. მან დაასახელა სამი მთავარი პრიორიტეტი უკრაინისათვის, დასავლელი მოკავშირეების დახმარების თვალსაზრისით.

„პირველ რიგში ჩვენ გვჭირდება ჰაერსაწინააღმდეგო დაცვის საშუალებები, რაც ძალიან მნიშვნელოვანია უკრაინული ქალაქებისა და სამოქალაქო ინფრასტრუქტურის დასაცავად. ცვენ არ უნდა მივცეთ რუსებს ჩვენი ეკონომიკის დანგრევის გაგრძელების შესაძლებლობა. მეორე პრიორიტეტი - საარტილერიო ჭურვები. ჩვენი მებრძოლები მოუთმენლად ელოდებიან მიწოდებას და გვეუბნებიან, რომ თუ ჭურვები მოგვცემთ და ამ მხრივ რუსეთთან პარიტეტი აღდგება, აუცილებლად გავიმარჯვებთო.

და მესამე მნიშვნელოვანი მომენტი: ავიაგამანადგურებელი „ფალკონი“ - F-16. ჩვენ გვჭირდება უკრაინის ცის დაცვა. დღეს რუსეთი ავიაციაში უპირატესობას ფლობს. ისინი 300 თვითმფრინავს იყენებენ, ჩვენ კი არცერთი აღარ გვაქვს. ამიტომ F-16-ები ჰაერივით გვჭირდება“.

რთული სიტუაცია ფრონტზე

უკრაინის პრემიერ-მინისტრმა აღნიშნა, რომ ფრონტზე ვითარება უკრაინის არმიისათვის მძიმე რჩება.

თებერვლის თვეში უკრაინულმა სამხედრო ქვედანაყოფებმა ქალაქი ავდეევკა დატოვეს, რომელსაც ისინი 2014 წლიდან იცავდნენ. გენერალმა ალექსანდრე ტარნავსკიმ, რომელიც უკრაინის არმიის უკანდახევას ხელმძღვანელობდა, აღნიშნა, რომ საარტილერიო საბრძოლო მასალებში თანაფარდობა, რუსებთან შედარებით, ერთი ათზეა. მისი აზრით, რამდენიმეთვიანი მძიმე ბრძოლების შემდეგ განხორციელებული „ორგანიზებული უკანდახევა ერთადერთი სწორი გადაწყვეტილება იყო შექმნილ სიტუაციაში“.

ქალაქ ავდეევკის დაკარგვა უკრაინისათვის ყველაზე მძიმე დანაკარგი იყო ბახმუტის შემდეგ, საიდანაც კიევმა ჯარი 2023 წლის მაისში გაიყვანა.

დიდი ბრიტანეთის შეიარაღებული ძალების ყოფილმა მთავარსარდალმა, გენერალმა  სერ რიჩარდ ბარონსმა ამას წინათ განაცხადა, რომ თუ უკრაინა იარაღითა და საბრძოლო მასალებით არ იქნება უზრუნველყოფილი, ამ ზაფხულს კიევი დამარცხდება: „ჩვენ ვხედავთ, რომ რუსეთი ფრონტზე უპირატესობა აქვს თითქმის ყველანაირ იარაღში - არტილერიაში, ავიაციაში, საბრძოლო მასალებში და ცოცხალ ძალაშიც. უკრაინელებს განწყობა უფუჭდებათ და ჰგონიათ, რომ ვერ გაიმარჯვებენ. და როცა ეს მოხდება, ვიღას მოუნდება ბრძოლა და დაღუპვა?“.

„ომს არ წავაგებთ“

თუმცა დენის შმიგალი მაინც დარწმუნებულია, რომ უკრაინა გაუძლებს და გადარჩება: „ფრონტზე მძიმე მდგომარეობაა შექმნილი, მაგრამ ყველაზე მთავარი ისაა, რომ ჩვენ ჯერ ცოცხლები ვართ და სული ჯერ არ ამოგვსვლია. დიახ, დავიღალეთ და ეს გასაგებია - ომი უკვე მესამე წელია მიმდინარეობს, მაგრამ ველოდებით იარაღს, საბრძოლო მასალებს, რომ ბრძოლა გავაგრძელოთ“.

„ჩვენ ვიბრძვით ჩვენი სიცოცხლისათვის, ჩვენი მიწისათვის და ოჯახების გადასარჩენად. მე ვერ წარმომიდგენია, რომ ჩვენ ამ ომს წავაგებთ““, - ასკვნის დენის შმიგალი ინტერვიუში.

წყარო: https://www.bbc.com/russian/articles/c0w0zrkg3y1o

 

analytics
კრემლს ომის შეწყვეტის მზაობა ჯერ კიდევ არ აქვს და რუსეთის ეკონომიკის შეწირვასაც არ ერიდება - გიორგი კობერიძე
დღევანდელი რუსული ბეჭდური პრესა ივლისის თვეში ეკონომიკური ვითარების დამძიმებაზე საუბრობს - რაც რუსეთის დახურული სისტემის პირობებში საკმაოდ იშვიათი მოვლენაა. გაზეთები აღნიშნავენ, რომ: საშუალოდ 12%-ით მოხდა რუსეთში კომუნალურები გადასახადების ზრდა. გაძვირდა პურის ფასიც, არადა ხორბლის ფასი გაიაფდა. მშენებლობის ბიზნესი დაეცა და ქარხნები იხურება.
 
მიზეზი? მუშახელის კატასტროფული დეფიციტი ბაზარზე, რასაც ადამიანური რესურსების კლების ხარჯზე ემატება მოთხოვნის ბუნებრივი შემცირება - რუსების ნაწილი ფრონტზე კვდება, ნაწილი კი ქვეყნიდან გარბის. დარჩენილი კვალიფიციური მუშახელი კი სამხედრო ინდუსტრიაშია მობილიზებული. იაფ ხორბალს რუსეთი თავის მოკავშირეებს საბითუმო ფასებში ყიდის, ხოლო ბაზარზე შემოსავლის შესანარჩუნებლად კრემლთან დაახლოებული პურის მსხვილი მეწარმეები მის ფასს ზრდიან.
 
ამას კი ემატება სანქციები. დღეს ევროპის მხრიდან სანქციების მე-18 პაკეტი დამტკიცდა, რომელიც რუსეთის ნავთობისა და გაზის ინდუსტრიას ურტყამს. 47.6 დოლარი - ესაა ის თანხა, რომელზე ძვირადაც ნავთობს არ შეიძენს ევროკავშირი და ბრიტანეთი რუსეთისაგან, რომელსაც გათვლა 60 დოლარზე ჰქონდა. კრემლს რომ მყარი მოგება ჰქონდეს 70 დოლარად უნდა ჰყიდდეს ბარელს. სანქციების მიხედვით ნორდ სტრიმების გაზსადენები აღარ ამუშავდება. ამას ემატება რუსულ ჩრდილოვან ფლოტზე დევნაც, რომელიც სხვა ქვეყნების დროშის ქვეშ მცურავი ხომალდების დახმარებით ცდილობდა რუსული ნავთობის ევროპაში გაყიდვას და სანქციების გვერდის ავლას.
 
ამ ფონზე მნიშვნელოვანია ისიც, რომ რუსეთში ტოტალიტარული მმართველობა კიდევ უფრო უჭერს მოსახლეობას: ქვეყანაში 5500 აკრძალული საიტი, მუსიკა, საინფორმაციო საშუალება, კოდური სიტყვა, ფილმი და გამოთქმაა, რისი მოძიებაცა და ნახვაც არ შეიძლება, მათ შორის არც VPN-ის გამოყენებით. თუ ნახავ ჯერ დაგაჯარიმებენ, შემდეგ ჯერზე კი პასუხისგებაში მისცემენ შენს თავს.
 
მზარდი ინფლაციისა და ძირითადი რესურსების სამხედრო წარმოებასა თუ ფრონტზე მობილიზების ფონზე ეკონომიკური პერსპექტივა კარგად არ გამოიყურება. არსებობს ვარაუდი, რომ გვიანი შემოდგომიდან რუსეთი კიდევ უფრო მეტი ბანკნოტების დაბეჭდვას აპირებს.
 
მუშახელის დეფიციტის ფონზე ინდური პრესა საუბრობდა პოტენციურ გეგმაზე, რომლის მიხედვითაც რუსეთი წლის ბოლომდე მილიონი ინდოელი მუშახელის რეკრუტირებას აპირებს, თუმცა ამ ამბავმა რუსეთში დადებითი რეაქცია არ გამოიწვია, რის გამოც რუსეთის შრომის მინისტრმა აღნიშნული ინფორმაცია უარყო. მიუხედავად ამისა, მარტო წელს რუსეთში 71,817 ინდოეთის მოქალაქეზე გაიცა ოფიციალური სამუშაო ნებართვა. ეს რაც ლეგალურად ჩანს, და რაც არა ის კიდევ სხვაა. ინდოელების გარდა რუსეთში დიდი რაოდენობით არიან შუა აზიელები და ჩინელები.
 
ამ ვითარებაში ფრონტზე რუსეთის ვითარება არასახარბიელოა. დონეცკის მონაკვეთზე მომარაგების გზას უკვე ეწოდა "სიკვდილის ხაზი", სადაც უკრაინული დრონები ყველაფერს ბომბავენ რაც კი გადაადგილდება. მიუხედავად ამისა, რუსეთი არ წყვეტს ცოცხალი ძალის მობილიზებას და დონეცკის ოლქის დასავლეთ ნაწილში, პოკროვსკის სექტორზე დაწოლას. რუსეთის მხრიდან ყველა გათვლა ისეთი იყო, რომ პოკროვკი ჯერ 2024 წლის ბოლომდე უნდა აეღოთ, შემდეგ 2025 წლის მარტამდე, ახალი თარიღი 2025 წლის 9 მაისი იყო, შემდეგ კი ამ სექტორზე დაწყებული შეტევის ერთი წლის თავი, ანუ ივლისი. მაგრამ ერთი წლის თავზე რუსები ჯერ კიდევ არ არიან ქალაქის ფარგლებში შესულები. ზოგადად პოკროვკისაკენ გაჭრას რუსები 2024 წლის თებერვლიდან ცდილობენ, ავდიივკას დაცემის შემდეგ.
 
დასავლური მედია ამბობს, რომ რუსული ზაფხულის შეტევის მხოლოდ პირველი ფაზა ვიხილეთ ჯერ და რომ მეორე ფაზა ჯერ კიდევ წინააო. ისინი 150 ათას დამატებით რუს, კორეელ და სხვა ქვეყნებიდან დაქირავებულ სამხედროებზე საუბრობენ და ახალი მიმართულებით გაჭრას არ გამორიცხავენ, ან ძველ სექტორებზე მათ გადანაწილებასა და უკრაინულ პოზიციებზე დაწოლის გაძლიერებას.
 
კრემლი ტრამპის მიერ მიცემულ 50 დღიან ვადას მაქსიმალური შეტევისათვის გამოიყენებს და ამაში უცნაური არაფერია. მთავარია რამხელა იქნება მსხვერპლი და გამოფიტვა. როგორც ამერიკის სახელმწიფო მდივანმა აღნიშნა, მხოლოდ წელს რუსეთს 100 ათასი მოკლული ჰყავს. მან ხაზი გაუსვა ფაქტს, რომ საუბარია მოკლულ სამხედროებზე და არა დაჭრილებზე, დაშავებულებზე ან ტყვეებზე. რუსეთი წლებია იმით პოზიციონირებს, რომ თითქოს ბოლო სამხედრომდე და ბოლო საკვებამდე შეუძლია იომოს. ასეთი რამ არცერთ სახელმწიფოს არ შეუძლია, მაგრამ კრემლს რომ ომის შეწყვეტის მზაობა ჯერ კიდევ არ აქვს და რუსეთის ეკონომიკის შეწირვასაც არ ერიდება - ეს უკვე ვნახეთ. და ისიც ნათელია, რომ ახლა ომს სერიოზული გამოფიტვის სახე აქვს მიღებული, რის გამოც დამატებითი მოთამაშეებისა და სახელმწიფოების ირიბი ჩართვა კიდევ უფრო მზარდია.
 
პუტინმა ისიც კარგად იცის, რომ ომის შეწყვეტა სხვა მიზეზითაცაა საშიში - ამდენი სამხედროსა და ციხეებიდან გამოსული, თუ მობილიზებული კრიმინალის რესოციალიზაცია ძალიან რთული იქნება, მით უფრო გართულებული ეკონომიკური ვითარებიდან გამომდინარე. თუმცა ყველაფერს აქვს თავისი ზედა ზღვარი - ეკონომიკის გამძლეობასაც, მსხვერპლის რაოდენობასაც და გამარჯვების რწმენასაც.
 
See all
Survey
ვინ გაიმარჯვებს რუსეთ - უკრაინის ომში?
Vote
By the way