იტალიაში ფეხბურთის სიყვარულმა ჩამომიყვანა. ბავშვობიდან წარმატებული მეკარე ვიყავი, მაგრამ უმძიმესი ტრავმა მივიღე და ვერ შევძელი თამაშის გაგრძელება. ყოველთვის მაინტერესებდა იტალიური ფეხბურთის ტაქტიკის ახლოს გაცნობა. პროფესიული დონე ავიმაღლე და გავხდი UEFA-ს დიპლომის მქონე მწვრთნელი. იტალიაში თითქმის ყველა პროფესიონალი ფეხბურთელია, აქ არ არის ადვილი იყო მწვრთნელი. რთული გზა გავიარე, მეცადინეობაში ღამეებს ვათენებდი. შეუპოვარი და ძლიერი ხასიათი დამეხმარა თავის დამკვიდრებაში.

ამჟამად ვარ საფეხბურთო კლუბ ROMA-ს აკადემიის მწვრთნელი და მის ფილიალში TRASTEVERE CALCIO - ს მწვრთნელი, ასევე U 12 - ის კორდინატორ - ხელმძღვანელი. კინო ინდუსტრიაში შემთხვევით აღმოვჩნდი. ვარჯიშის დროს ორმა ახალგაზრდამ მთხოვა, ჩემთვის ფოტო გადაეღოთ და მეც დავთანხმდი. გაირკვა, რომ რეჟისორი PAOLO SORRENTINO სერიალისთვის THE NEW POPE ახალ სახეებს ეძებდა. ასე მოვხვდი კასტინგზე და დამამტკიცეს JUDE LAW-ს და JOHN MALKOVICH-ს პირადი მცველის როლზე. საინტერესო იყო გადაღებების პროცესი.

JUDE LAW მხიარული ადამიანია და ბევრი გვახალისა. მისით ბევრი ქალბატონი იხიბლებოდა და შეძახილებიც ისმოდა გადასაღებ მოედანზე. რა თქმა უნდა, არც JUDE LAW აკლებდა მათ კომპლიმენტებს და ძალიან გავერთეთ. რეჟისორი PAOLO SORRENTINO კი სულ გვეჩხუბებოდა, რომ სიჩუმე შეგვენარჩუნებინა გადაღებებისას. ის ძალიან ძლიერი პროფესიონალია. ხშირად გგონია, რომ სხვა განზომილებაშია. უცნაური, მძიმე და გაურკვეველი გამოხედვით გამოირჩევა.

ერთხელ შემომხედა და მეგონა როლი კარგად ვერ შევასრულე, ის კი ამ დროს მომიახლოვდა და კომპლიმენტები მითხრა. JOHN MALKOVICH თან ერთად გადაღება VATICANO ს წინ, მოედანზე საკმაოდ სერიოზული იყო, იგრძნობოდა მისი განსაკუთრებული დამოკიდებულება როლისადმი. ვარსკვლავებთან ერთად მუშაობამ დიდი გამოცდილება შემძინა, არა მხოლოდ პროფესიულად, არამედ ცხოვრებისიული თვალსაზრისითაც.

შემდგომ კიდევ ორ ფილმში გადამიღეს. რეჟისორ GABRIELE MUCCINO-ს ფილმში GLI ANNI PIU BELLI (საუკეთესო წლები), რომელიც შარშან გამოვიდა და დიდი მოწონება დაიმსახურა კინო კრიტიკოსებისგან. სრული ანშლაგი იყო კინო-თეატრებში. ასევე რეჟისორმა NANNI MORETTI-მ გადამიღო ფილმში TRE PIANI ( სამი სართული), რომელიც ჯერ არ გამოსულა. ვიღებ მონაწილეობას სხვადასხვა კასტინგში. სამწუხაროდ, როლზე დამტკიცებამდე ფილმის დასახელების უფლება არ მაქვს.

ვინც იტალიაში ფიქრობს საქმიანობის გაგრძელებას, მინდა ვუთხრა, რომ საკმაოდ რთული გზის გავლა მოუწევთ. დაიმახსოვრონ, შეუძლებელი არაფერია. აუცილებელია ისწავლოთ ეს ლამაზი იტალიური ენა, რაც დააჩქარებს თქვენს იტალიაში დამკვიდრებას. რაც მთავარია, იყავით მხიარულები! არ დაიბნეთ სიახლეებით, იამაყეთ თქვენი ქართველობით. დაიცავით თქვენი იდეები, არასდროს თქვათ, რომ ეს შეუძლებელია. გქონდეთ მიზანი და იყავით შეუპოვრები!

წყარო:Speech • სფიჩი