,
დღეს დავამტკიცებთ უკრაინისთვის ახალ სამხედრო დახმარებას. დღეს საჭიროა უკრაინის დახმარება ისე, როგორც არასდროს. ყურადღებით ვადევნებთ თვალს რუსეთში განვითარებულ მოვლენებს, - ამის შესახებ საგარეო პოლიტიკისა და უსაფრთხოების საკითხებში ევროკავშირის უმაღლესმა წარმომადგენელმა, ჟოზეფ ბორელმა განაცხადა.
მისივე თქმით, რაც გასულ დღეებში მოხდა რუსეთში, აჩვენებს, რომ ომი გავლენას ახდენს რუსეთის პოლიტიკურ სისტემაზე და შლის რუსულ სამხედრო ძალას.
„ვაკვირდებით, რაც ხდება და ვაგრძელებთ უკრაინის მხარდაჭერას ისე, როგორც არასდროს და ეს არის ის, რასაც ვაკეთებთ. ყველა ხედავს, რაც ხდება რუსეთში. არ არის კარგი სანახავი, როდესაც ბირთვული ქვეყანა პოლიტიკური არასტაბილურობის ფაზაზეა. ამასაც უნდა მივაქციოთ ყურადღება.ყველაზე მნიშვნელოვანი დასკვნა არის ასეთი - ომი, რომელიც დაიწყო რუსეთმა უკრაინის წინააღმდეგ და ის მონსტრი, რომელიც შექმნა პუტინმა, თავად კბენს პუტინს. მონსტრი მოქმედებს შემქმნელის წინააღმდეგ. პოლიტიკური სისტემა აჩვენებს, რომ მყიფეა და სამხედრო ძალას ბზარი აქვს. ეს არის უკრაინის წინააღმდეგ წარმოებული ომის შედეგი“, - განაცხადა ბორელმა
პრეზიდენტმა ვლადიმირ პუტინმა განაცხადა, რომ 2025 წელს რუსეთის ეკონომიკური ზრდის ტემპი 1%-მდე შენელდა.
მთავრობის სხდომაზე გამოსვლისას მან აღნიშნა, რომ ეს მაჩვენებელი საგრძნობლად ჩამორჩება წინა წლების დინამიკას. კერძოდ, 2023 წელს 4.1%-იანი და 2024 წელს 4.3%-იანი ზრდა დაფიქსირდა, რაც სამხედრო ხარჯების ზრდის ეფექტით იყო განპირობებული.
პრეზიდენტის თქმით, ეკონომიკური აქტივობის ასეთი შენელება მთავრობისთვის მოსალოდნელი იყო და ის დიდწილად ინფლაციის წინააღმდეგ მიმართულმა ხელოვნურმა ზომებმა განაპირობა. ამ შემთხვევაში, პუტინი ცენტრალური ბანკის მიერ განსაზღვრულ რეფინანსირების განაკვეთზე მიუთითებს, რომელიც 16%-იან ნიშნულზეა.
პუტინმა ხაზი გაუსვა, რომ ცენტრალური ბანკის მიზანმიმართულმა პოლიტიკამ შედეგი გამოიღო და ინფლაცია, რომელიც 2024 წელს 9.5%-ს შეადგენდა, წელს 5.6%-მდე შემცირდა. მისივე პროგნოზით, 2026 წლის ბოლოსთვის ეს მაჩვენებელი 5%-იან ნიშნულამდე დაიწევს.
ეკონომიკური ზრდის შენელების მიუხედავად, კრემლი ამტკიცებს, რომ სახელმწიფო ბიუჯეტი სრულად ფარავს სოციალურ ვალდებულებებსა და სამხედრო საჭიროებებს, მიუხედავად იმისა, რომ რეკორდულად მზარდი ბიუჯეტის დეფიციტი სხვა რეალობაზე მიუთითებს.
ექსპერტთა ნაწილი მიიჩნევს, რომ რუსეთის ეკონომიკურ სტაგნაციას სამუშაო ძალის დეფიციტი, მაღალი საპროცენტო განაკვეთები და დასავლური სანქციების კუმულაციური ეფექტი იწვევს, რომლის სრულ მასშტაბებს უფრო მეტად 2026-27 წლებში ვიხილავთ.
ცნობისთვის, 2026 წლისთვის რუსეთის მთავრობა მშპ-ის 1%-1.3%-იან ზრდას პროგნოზირებს, თუმცა საერთაშორისო სავალუტო ფონდი უფრო პესიმისტურ, 0.8%-იან ზრდის მაჩვენებელს ვარაუდობს.
წყარო: https://bm.ge/
