- დღეს ინფორმაცია კიდევ უფრო შეზღუდული გახდა უკრაინული შეტევის შესახებ. რუსული წყაროების მიხედვით უკრაინელებმა კურსკის ოლქში კიდევ ერთ წერტილში გადალახეს საზღვარი და დაიკავეს დასახლებული პუნქტი ტეტკინო. რუსებს ეშინიათ, რომ ასეთი სასაზღვრო იერიში კურსკის ოლქში კიდევ სხვა მიმართულებითაც არ განვითარდეს, რაც დაამძიმებს რუსების მდგომარეობას.
- სუჯას სამხრეთით უკრაინელებმა დილიდან მოყოლებული ხელთ იგდეს ორი დასახლება პლეხოვო და მახნოვკა. ამ ფაქტზე უშუალოდ უკრაინელებიც მიანიშნებენ.
- უკრაინულმა დანაყოფებმა დილით ბელგოროდის ოლქში დაიკავეს ორი დასახლება: 1. პოროზი; 2. მოკრაია ორლოვკა. პოროზის კადრები ვიხილეთ კიდეც. შემოგარენში კი რა სიტუაციაა და რამდენად ღრმად არიან უკრაინელები შესულები არაა ცნობილი. თუმცა ერთი საინტერესო ფაქტი მაინც ისაა, რომ ბელგოროდის ოლქში 2023 წელს უკრაინელებმა რამდენიმე რეიდი მოაწყვეს, რის შემდეგაც რუსებმა საზღვრის გამაგრება გადაწყვიტეს. მაგრამ დღეს დადასტურდა რომ საზღვარი გამაგრებული სულაც არ ჰქონიათ, რადგან კორუფციის პირობებში ფორტიფიკაციების ნაწილი მხოლოდ ფურცელზე არსებობს ხოლმე. საინტერესოა უკრაინელები შეეცდებიან ბელგოროდში პოზიციების შენარჩუნებას და გაფართოებას თუ დატოვებენ მათ (პრიორიტეტიზაცია თუ მოხდა რომელიმე მიმართულებისა). ამასთან, დღევანდელი იერიშები ნიშანია იმისა, რომ უკრაინელები ომის რუსეთის ტერიტორიაზე გადატანას მაქსიმალურად ბევრ მონაკვეთში ცდილობენ,
- რუსები ე.წ. "მეგობრულ ცეცხლს" არაერთხელ მიმართავენ და აგერ დღესაც იყო შემთხვევა, როდესაც სუჯა-კურსკის გზაზე საკუთარი დანაყოფი ჩაცხრილეს.
- რუსები ცდილობენ სუჯა-კურსკის გზაზე დასახლება მარტინოვკას დაბრუნებას. ბრძოლა დასახლებაში მიმდინარეობს. რუსები ჩივიან, რომ კონტრშეტევაზე გადასულ რუსებს უკრაინელებმა ქიმიური იარაღის გამოყენებით უპასუხესო, რაც ცხადია აბსურდულია, მაგრამ შესაძლოა იმაზე მიუთითებდეს, რომ ამ ამბის შეთხზვით რუსები საკუთარი წარუმატებლობის გამართლებას ცდილობდნენ, ან სულაც ისინი იყენებენ ქიმიურ იარაღს (მაგალითად ზარინის გაზს, რომელსაც რუსეთი და მისი მოკავშირე ასადის რეჟიმი სირიაში მიმართავდა ხოლმე). ზოგადად, ამ ომში ქიმიური იარაღის გამოყენება რუსების მხრიდან არაერთხელ განხორციელდა.
- რუსების სასოწარკვეთაზე ისიც მიუთითებს, რომ რუსი პროპაგანდისტები და სამხედრო მიმომხილველები თავს იმშვიდებენ, უკრაინულ მცირე ჯგუფებს რამდენიმე მილიონი დოლარის ღირებულების ბალისტიკურ რაკეტებს ვესრვითო. მცირე მოძრავ ჯგუფს რომ ბალისტიკურ რაკეტას ესვრი უკვე არასერიოზულია, მაგრამ ამაში რომ რესურსს გახარჯავ ესე იგი მძიმე მდგომარეობაა.
- ამ ეტაპზე რუს დევნილთა რაოდენობა 70 ათასამდეა გაზრდილი. ჰუმანიტარული დახმარება ჭირს. რუსეთი ეკონომიკური რესურსების 40%-ს სამხედრო მოქმედებებზე ხარჯავს (ე.წ. სამხედრო ეკონომიკით მოქმედებენ). ჰუმანიტარული დახმარება მოულოდნელობის პირობებში კი ადვილი არ არის.
- უკრაინელებს მეტი და მეტი ტყვეები აჰყავთ და გადაჰყავთ უკრაინაში. რამდენიმე კადრი ამის შესახებ გავრცელდა. ვარაუდობენ, რომ დატყვევებული რუსების საერთო რაოდენობა 500 სამხედრო უნდა იყოს.
- უშუალოდ უკრაინაში დონეცკის ოლქში რუსებმა შეტევა განაახლეს პოკროვსკის მიმართულებაზე. როგორც ჩანს ისინი ფიქრობენ, რომ უკრაინელებმა შესაძლოა რუსეთში შექმნილი კრიზისითა და დონეცკიდან მოხსნილი ჯარებით შექმნილი შემსუბუქებული ვითარებით ისარგებლონ და შეტევაზე გადმოვიდნენო. რუსები ამის პრევენციას ახდენენ განახლებული შეტევით. თუმცა ბოლო 24 საათში მსხვერპლი ბევრად გაზრდილი აქვთ სწორედ ამავე მიმართულებაზე.
- უკრაინელებმა საავიაციო დარტყმა განახორციელეს ნოვა კახოვკას იახტკლუბზე, მდინარე დნეპრზე. რუსებს იქ სახელდახელო სამეთაურო პუნქტი ჰქონდათ მოწყობილი.
- ვრცელდება ინფორმაცია, რომ რუსეთის ხელისუფლების წარმომადგენლები აშშ-სთან დაკავშირებას ცდილობენ, თუმცა ამერიკელები კონტაქტზე უარს აცხადებენ. ეს რეალურად ხდება თუ არა ასე დაზუსტებით რთულად გახდება ცნობილი.
პ.ს. შეგახსენებთ, რომ ინფორმაცია მეტწილად რუსული წყაროებიდან მოდის, უკრაინელები ინარჩუნებენ სტრატეგიულ სიჩუმეს. რეალური სურათი როგორია არ ვიცით.
რუკაზე:
წითლით - უკრაინელთა მიერ 10 აგვისტოს დაკავებული ტერიტორია
ლურჯით - უკრაინელთა მიერ 6-9 აგვისტოს დაკავებული ტერიტორია
