თურქმენეთის ხელისუფლებამ აკრძალა სიტყვა ”კორონავირუსი” - იუწყება საერთაშორისო ორგანიზაცია ”რეპორტიორები საზღვრებს გარეშე”. ორგანიზაციის განცხადებით სიტყვა „კორონავირუსის“ გამოყენება ოფიციალურად აიკრძალა სახელისუფლებო მედიაში.
ორგანიზაციის აღმოსავლეთ ევროპასა და ცენტრალურ აზიაის განყოფილების ხელმძღვანელის ჟანა კაველეს განცხადებით ამ გადაწყვეტილებით თურქმენეთის ხელისუფლებამ „გაამართლა თავისი რეპუტაცია“.
მისივე თქმით, კორონავირუსის შესახებ ინფორმაციის დამალვა არამარტო საფრთხეს უქმნის თურქმენეთის მოქალაქეების ჯანმრთელობას, არამედ "აძლიერებს პრეზიდენტ გურბანგული ბერდიმუჰამედოვის მიერ დამკვიდრებულ ავტორიტარიზმს.“
უფრო ადრე „რადიო თავისუფლება“ იტყობინებოდა, რომ თურქმენეთში მოქალაქეებს ეკრძალებათ კორონავირუსზე ლაპარაკი და ამის გამო ისინი შესაძლებელია დაპატიმრებული ყოფილიყვნენ პოლიციის მიერ..
თურქმენეთში, ოფიციალური მონაცემებით, კორონავირუსული ინფექციის შემთხვევები ჯერ არ დაფიქსირებულა.
მარტის დასაწყისში, გურბანგული ბერდიმუჰამედოვმა მოქალაქეებს ურჩია, ვირუსისგან ხალხური საშუალებით - „ჰარმალის მოწევით“ დაეცვათ თავი.
”ჩვენი ბრძენი წინაპრები მტკიცედ იცავდნენ ტრადიციას: მნიშვნელოვანი მოვლენების აღნიშვნა „ჰარმალის“ ბოლის ფრქვევით ხდებოდა, მაგალითად ახალ სახლში საცხოვრებლად გადასვლა, ქორწინება. ასევე გამოიყენებოდა „ჰარმალის“ ბოლი ინფექციური დაავადებების გავრცელების დროს“- განაცხადა მან.