გუშინ საქართველოში ტურიზმის სფეროში დასაქმებულმა პირებმა უსაფრთხო ქვეყნებთან საზღვრების გახსნისა და ფრენების დაწყების მოთხოვნით აქცია -მსვლელობა გამართეს, ბოლოს კი მთავრობის ადმინისტრაციის შენობასთან მოთხოვნები გააჟღერეს. აქციის მონაწილეები რეგულარული ფრენების აღდგენასა და ორკვირიანი სავალდებულო კარანტინის გაუქმებას მოითხოვდნენ.
დღეს ტურისტულ ბიზნესის წარმომადგენელთა მოთხოვნებს გამოეხმაურა ეკონომიკის მინისტრი ნათია თურნავა.
„ყველა ძალიან კარგად ვხედავთ და ვიზიარებთ, რომ ტურისტული ინდუსტრია მეტად დაზარალდა. სწორედ ამიტომაც, ყველა ჩვენი გადაწყვეტილების და პროგრამის სათავეში, მოტივაციაში დევს ტურიზმის დახმარება. ეს ის დარგი იყო, რომელსაც ერთ-ერთ პირველს დავეხმარეთ და ვფიქრობთ, კიდევ როგორ დავეხმაროთ შემდგომშიც, იმიტომ რომ ეს პრობლემა ერთი დღით არ შემოიფარგლება. არ არის საჭირო დემონსტრაციების გზით მოითხოვო რომელიმე ჩემს კოლეგასთან ან პრემიერთან შეხვედრა, იმიტომ რომ ჩვენი კარი ყოველთვის ღიაა. ყველანი ვთანხმებით იმაზე, რომ ჩვენ უნდა ვიყოთ ძალიან ფრთხილად. არ უნდა დავხარბდეთ ერთჯერად, სწრაფ და ეფექტურ გადაწყვეტილებას, რომ გავხსნათ ყველასთან საზღვრები. ამის შესაძლებლობას იძლევა ისიც, რომ ჩვენ 15 ქვეყანაში ვართ მოხვედრილები, თუმცა შეიძლება ისე მოხდეს, რომ ორი-სამი კვირის თავზე მოგვიწიოს ძალიან მასშტაბური საპირისპირო გადაწყვეტილებების მიღება და ისევ დახურვა გარკვეული დარგების, რომელსაც ჩვენი ეკონომიკა ვერ გადაიტანს. ამას სხვათაშორის ტურისტული ინდუსტურია საკმაოდ საღად აფასებს, ხედავს, ნამდვილად არ უნდა რომ ამ რისკში შევიდეთ ჩვენგან გაუფრთხილებელი გადაწყვეტილების გამო. ძალიან ბევრი სიკეთე და ახალი გადაწყვეტილება წარვუდგინეთ ტურისტულ სექტორს. მაგალითად ის, რომ ჩვენ გავხსენით ბიზნეს ვიზიტორებისთვის ჩვენი ბაზარი, მიუხედავად იმისა , თუ საიდან მოდიან ბიზნეს ვიზიტორები. რა თქმა უნდა, ეს არ იქნება მხოლოდ ბიზნეს მიზანი, ისინი ტურისტულადაც იმოგზაურებენ,“ - განაცხადა თურნავამ.
შეგახსენებთ, საქართველო კოვიდვითარების კუთხით უსაფრთხო ქვეყნადაა გამოცხადებული. ქვეყანამ ტურისტების მიღება რამდენიმე თვეა შეწყვიტა და ტურისტებისთვის ახლა იხსნება. საქართველო 5 ქვეყანას - გერმანიას, საფრანგეთს, ლიეტუვას, ლატვიასა და ესტონეთს უპირობოდ უხსნის საზღვრებს. სხვა ქვეყნის წარმომადგენლებმა კი ქვეყანაში მოსახვედრად 14-დღიანი კარანტინი უნდა გაიარონ საკუთარი ხარჯებით.