,
აშშ-ის პრეზიდენტმა, დონალდ ტრამპმა „ტესლას“ მოდელის ავტომობილი შეიძინა და ამით კომპანია SpaceX-ისა და „ტესლას“ დამფუძნებლის, ილონ მასკისადმი მხარდაჭერა გამოხატა.
ბოლო პერიოდში, ილონ მასკის ქონების შეფასებამ $150 მილიარდით იკლო, რაც, დიდწილად, მილიარდერის პოლიტიკურ კარიერას უკავშირდება. მსოფლიოს უმდიდრეს ადამიანს გადამრჩენელად ამერიკის შეერთებული შტატების პრეზიდენტი, დონალდ ტრამპი მოევლინა, რომელმაც Tesla Model S Plaid-ი იყიდა და მისი საჯარო პრეზენტაცია თეთრი სახლის ეზოში გამართა.
დონალდ ტრამპმა TESLA-ს წინააღმდეგ დაწყებული ნეგატიური კამპანია დაგმო და ბოიკოტს უსამართლო უწოდა. პრეზიდენტმა TESLA-ს დიდებული ამერიკული კომპანია უწოდა, ხოლო ადამიანებს, რომლებიც მის წინააღმდეგ გამოდიან — ნაგავი. მისივე თქმით, თუკი ხელისუფლება ამ ადამიანებს დააკავებს, ისინი ჯოჯოხეთს გამოივლიან. პარალელურად, დონალდ ტრამპმა ილონ მასკიც შეაქო და ჭეშმარიტი პატრიოტი უწოდა.
თეთრი სახლის წინ Tesla-ს ხუთი ავტომობილი განთავსდა, ხოლო დონალდ ტრამპთან და ილონ მასკთან ერთად სანახაობას მილიარდერის შვილი დაესწრო. დონალდ ტრამპმა ამერიკული წარმოების ელექტრომობილების მისამართით ქება არ დაიშურა და პირობა დადო, რომ შვილიშვილს Tesla Cybertruck-ს უყიდის. თავისთვის კი, როგორც გითხარით, პრეზიდენტმა $90,000-იანი Tesla Model S Plaid-ი, რომელიც წითელ ფერში იყო გადაწყვეტილი.
თეთრი სახლის ტერიტორიაზე გამართულ ამ საინტერესო სანახაობას ინვესტორები დადებითად შეხვდნენ. ბოლო სავაჭრო სესიაზე TESLA-ს აქციები 3.8%-ით გაძვირდა, ხოლო დღეს, ვაჭრობის გახსნამდე აქციებმა დამატებით 3%-იანი ზრდა დააფიქსირა. ბოლოდროინდელი მოკლევადიანი ზრდის მიუხედავად, TESLA მაინც მკვეთრადაა გაუფასურებული.
პრეზიდენტმა ვლადიმირ პუტინმა განაცხადა, რომ 2025 წელს რუსეთის ეკონომიკური ზრდის ტემპი 1%-მდე შენელდა.
მთავრობის სხდომაზე გამოსვლისას მან აღნიშნა, რომ ეს მაჩვენებელი საგრძნობლად ჩამორჩება წინა წლების დინამიკას. კერძოდ, 2023 წელს 4.1%-იანი და 2024 წელს 4.3%-იანი ზრდა დაფიქსირდა, რაც სამხედრო ხარჯების ზრდის ეფექტით იყო განპირობებული.
პრეზიდენტის თქმით, ეკონომიკური აქტივობის ასეთი შენელება მთავრობისთვის მოსალოდნელი იყო და ის დიდწილად ინფლაციის წინააღმდეგ მიმართულმა ხელოვნურმა ზომებმა განაპირობა. ამ შემთხვევაში, პუტინი ცენტრალური ბანკის მიერ განსაზღვრულ რეფინანსირების განაკვეთზე მიუთითებს, რომელიც 16%-იან ნიშნულზეა.
პუტინმა ხაზი გაუსვა, რომ ცენტრალური ბანკის მიზანმიმართულმა პოლიტიკამ შედეგი გამოიღო და ინფლაცია, რომელიც 2024 წელს 9.5%-ს შეადგენდა, წელს 5.6%-მდე შემცირდა. მისივე პროგნოზით, 2026 წლის ბოლოსთვის ეს მაჩვენებელი 5%-იან ნიშნულამდე დაიწევს.
ეკონომიკური ზრდის შენელების მიუხედავად, კრემლი ამტკიცებს, რომ სახელმწიფო ბიუჯეტი სრულად ფარავს სოციალურ ვალდებულებებსა და სამხედრო საჭიროებებს, მიუხედავად იმისა, რომ რეკორდულად მზარდი ბიუჯეტის დეფიციტი სხვა რეალობაზე მიუთითებს.
ექსპერტთა ნაწილი მიიჩნევს, რომ რუსეთის ეკონომიკურ სტაგნაციას სამუშაო ძალის დეფიციტი, მაღალი საპროცენტო განაკვეთები და დასავლური სანქციების კუმულაციური ეფექტი იწვევს, რომლის სრულ მასშტაბებს უფრო მეტად 2026-27 წლებში ვიხილავთ.
ცნობისთვის, 2026 წლისთვის რუსეთის მთავრობა მშპ-ის 1%-1.3%-იან ზრდას პროგნოზირებს, თუმცა საერთაშორისო სავალუტო ფონდი უფრო პესიმისტურ, 0.8%-იან ზრდის მაჩვენებელს ვარაუდობს.
წყარო: https://bm.ge/
