,
აშშ-ის პრეზიდენტმა, დონალდ ტრამპმა კომენტარი გააკეთა ვოლოდიმირ ზელენსკის წინადადებაზე ამერიკული იარაღის შესზაძლო შეძენის თაობაზე.
„ის ყოველთვის ცდილობს შეიძინოს რაკეტები. როცა ომს იწყებ, უნდა იცოდე, რომ მისი მოგება შეგიძლია, ხომ ასეა? არ შეიძლება ომი დაიწყო იმის წინააღმდეგ, ვინც შენზე ოცჯერ დიდია, და იმედი გქონდეს, რომ ხალხი რაკეტებს მოგაწვდის“, - აღნიშნა დონალდ ტრამპმა.
დონალდ ტრამპმა ასევე გაიხსენა, თუ როგორ მიაწოდა უკრაინას „ჯაველინები“ ჯერ კიდევ მისი პირველი საპრეზიდენტო ვადის დროს.
მისი თქმით, სწორედ ასე მოიგეს უკრაინელმა სამხედროებმა „თავიანთი პირველი დიდი ბრძოლა ტალახში ჩარჩენილი ტანკების წინააღმდეგ“.
„ქალაქები განადგურებულია. და რაც მთავარია, მილიონობით ადამიანი დაიღუპა. მილიონობით ადამიანი დაიღუპა სამი ადამიანის გამო. პირველი, ეს პუტინის. მეორე, ბაიდენი, რომელსაც წარმოდგენა არ ჰქონდა, რას აკეთებდა. და ზელენსკი. და ყველაფერი, რისი გაკეთებაც შემიძლია, არის ამის შეჩერების მცდელობა. მე მსურს მკვლელობების შეჩერება“, - დასძინა მან.
ირანისკენ კიდევ ერთი მშვენიერი არმადა მიემართება, - ამის შესახებ აშშ-ის პრეზიდენტმა, დონალდ ტრამპმა აიოვას შტატში, მხარდამჭერების წინაშე სიტყვით გამოსვლისას განაცხადა.
„ივნისში, ირანის ბირთვული პოტენციალი გავანადგურეთ. ამას ხალხი 22 წელი ელოდა. მათ ბირთვულ იარაღამდე დაახლოებით ერთი თვე აშორებდათ. ეს უნდა გაგვეკეთებინა“, - განაცხადა ტრამპმა.
დონალდ ტრამპმა იმედი გამოთქვა, რომ ირანი აშშ-სთან შეთანხმებას გააფორმებს.
„ახლა ირანისკენ კიდევ ერთი მშვენიერი არმადა მიემართება. დიდი იმედი მაქვს, რომ შეთანხმებას გააფორმებენ. შეთანხმება პირველივე ჯერზე უნდა გაეფორმებინათ“, - აღნიშნა აშშ-ის პრეზიდენტმა.
ცნობისთვის, ავიამზიდ „აბრაამ ლინკოლნის“ დამრტყმელი ჯგუფი ახლო აღმოსავლეთში ორშაბათს ჩავიდა. აშშ-ის ცენტრალურმა სარდლობამ განაცხადა, რომ დამრტყმელი ჯგუფი სამხედრო მზადყოფნის შემოწმების მიზნით წვრთნებს ჩაატარებს.
ინფორმაციისთვის, აშშ-ის პრეზიდენტის, დონალდ ტრამპის განცხადებით, ირანმა აშშ-სთან ახალი ბირთვული შეთანხმება უნდა დადოს, რომლის ფარგლებშიც თეირანი ურანის გამდიდრებას ვეღარ შეძლებს. 2025 წლის გაზაფხულზე აშშ-ის პრეზიდენტმა ირანის უზენაეს ლიდერს, აიათოლა ალი ხამენეის წერილი გაუგზავნა და მოლაპარაკებებისკენ მოუწოდა. წერილის თანახმად, დონალდ ტრამპმა ირანს ორი თვე მისცა, რათა ბირთვული პროგრამა შეეჩერებინა. 2025 წლის აპრილში, ომანში აშშ-ისა და ირანის დელეგაციებს შორის მოლაპარაკებები დაიწყო, რომელიც ივნისამდე გაგრძელდა. ირანმა ბირთვული პროგრამის შეჩერების შესახებ აშშ-ის მოთხოვნას მიუღებელი უწოდა და განაცხადა, რომ აშშ-ს ახალ წინადადებას წარუდგენდა. გასული წლის 13 ივნისს ისრაელმა ირანში რამდენიმე სამხედრო ობიექტს დაარტყა, ხოლო ისრაელის იერიშების დაწყებიდან ერთი კვირის შემდეგ, აშშ-მა ირანში ბირთვული ობიექტები დაბომბა.
