ინფექციური საავადმყოფოს დირექტორი, თენგიზ ცერცვაძე აცხადებს, რომ საქართველოში, რელიგიურ დღესასწაულებზე ვირუსის ფართოდ გავრცელების ფაქტები არ არსებობს. ამაზე მან აჭარის მაუწყებლის ეთერში, ვახო ხუზმიაშვილის გადაცემა თავისუფალ სივრცეში ისაუბრა. ცერცვაძე ამბობს, რომ დღესასწაულების პერიოდი "მშვიდობიანად ჩავიარეთ".
"არა არ გვაქვს ფაქტი, იყო ერთეული შემთხვევები, მაგრამ ეს ყველგან არის. არ არსებობს ფაქტი, ძალიან კარგი და კეთილგონივრული რეაქცია ჰქონდა მოსახლეობას, მთავრობის რეკომენდაციებზე, თვითონ ეკლესიამაც ძალიან სწორი და კარგი პოზიცია დაიკავა და ფაქტობრივად, ეს საკმაოდ ისეთი პერიოდი, რომელიც შეიძლება გამხდარიყო ეპიდემიის მატების საფუძველი, ჩავიარეთ მშვიდობიანად. არავითარი მატება რელიგიურ დღესასწაულებთან დაკავშირებული არ აღინიშნება", — ამბობს ცერცვაძე.
19 აპრილს სააღდგომო ლიტურგია დიდ ტაძრებში კომენდანტის საათის დროს ჩატარდა, პატარა ტაძრებში კი მეორე დღეს, დილით. აღდგომის ღამეს მრევლი სამების ტაძარში ქალაქის სხვადასხვა კუთხიდან ფეხით მივიდა და სახლში წასვლა მხოლოდ დილით 6 საათზე მოახერხა.
ქვეყნის მთავარმა ინფექციუნისტმა არსებულ სიტუაციაზე და ტურიზმზეც ისაუბრა და აღნიშნა, რომ საზღვრების გახსნა არც ისე ახლო პერსპექტივად ეჩვენება "როგორი მდგომარეობაც დღესაა, ცოტა ძნელი იქნება ტურისტული სეზონის გახსნა. რთული საკითხია ტურისტული სეზონის გახსნა, მაგალითად, იტალია ამბობს, რომ ის წლის ბოლომდე ვერ გახსნის"- განაცხადა თენგოს ცერცვაძემ.