თეა წულუკიანმა ლენტეხის მუნიციპალიტეტში სპორტული ინფრასტრუქტურა დაათვალიერა.
საქართველოს კულტურის, სპორტისა და ახალგაზრდობის მინისტრმა, თეა წულუკიანმა რაჭა-ლეჩხუმ ქვემო სვანეთის სახელმწიფო რწმუნებულ პაპუნა მარგველიძეს, ლენტეხის მუნიციპალიტეტის მერ გია ონიანსა და ადგილობრივი მუნიციპალიტეტის წარმომადგენლებთან ერთად ლენტეხის მუნიციპალიტეტის სოფლებში მდებარე სპორტული ინფრასტრუქტურისა და აღჭურვილობის შესახებ ინფორმაცია მიიღო.
მინისტრმა, ასევე, დაათვალიერა სპორტული ინფრასტრუქტურა და გაეცნო მასთან დაკავშირებულ პრობლემებს; მოისმინა სხვადასხვა სპორტის სახეობის მწვრთნელებისა და სპორტსმენების საჭიროებები და მათ მხარდაჭერა აღუთქვა.
აღსანიშნავია, რომ სპორტის სამინისტროს ხელშეწყობით, ლენტეხის მუნიციპალიტეტის პრიორიტეტია სპორტული ინფრასტრუქტურის განახლება და მულტიფუნქციური სპორტული სკოლის რეაბილიტაცია, რომელშიც სპორტის არაერთ სახეობას შეეძლება განვითარება.
საგულისხმოა, რომ არა მხოლოდ ლენტეხში, არამედ მუნიციპალიტეტის სოფლებში, ახალგაზრდები წარმატებით ეუფლებიან სპორტის სხვადასხვა სახეობას: რაგბი, ფეხბურთი, ფრენბურთი, მეკლდეურობა, ძიუდო. შესაბამისად, მნიშვნელოვანია სპორტული ინფრასტრუქტურის გაძლიერება, რათა ამ ვაჟებმა და გოგონებმა შეძლონ უკვე მაღალი მიღწევების გაუმჯობესება.
ამრიგად, სპორტის სამინისტრო ლენტეხის მუნიციპალიტეტის განვითარების ფონდთან გააგრძელებს თანამშრომლობას სპორტული ინფრასტრუქტურით აღჭურვისა და გაძლიერების თვალსაზრისით.