თბილისის მუნიციპალიტეტის მერიის გარემოს დაცვის საქალაქო სამსახურმა გერმანიის საერთაშორისო თანამშრომლობის საზოგადოების (GIZ) მხარდაჭერით, 20 ჰა-მდე სატყეო ფართობებზე ბუნებრივი განახლების ხელშემწყობი ღონისძიებები განახორციელა.
სამუშაოების ფარგლებში, მწვანე ნარგავების (ტყეების) მართვის გეგმის შესაბამისად, ფიჭვის სახეობებისგან ფორმირებული ტყის ტერიტორიები შემოიღობა, ხმელი და დაავადებული ხეები მოიჭრა, ფართობი გაიწმინდა ეკალ-ბარდებისგან და განხორციელდა ნიადაგის აჩიჩქვნა.
აღნიშნული ღონისძიებების მიზანი, ხელოვნურად გაშენებულ ტყეებში, სამომავლოდ ბუნებრივად წარმოშობილი ფოთლოვანი სახეობების მიღებაა, რომლებსაც მეტი უნარი შესწევთ კლიმატის ცვლილებისა თუ სხვა ნეგატიური ფაქტორების მიმართ რეზისტენტული იყვნენ. ასეთ კორომებში ხანძრისა და მავნებლის გაჩენის შემთხვევაში, მათ მიმდებარე ტყის მასივებზე გადასვლის რისკი საგრძნობლად შემცირებულია.
აღსანიშნავია, რომ შემოღობილ ტერიტორიებზე უკვე ფიქსირდება ბუნებრივად წარმოშობილი, საქართველოს ტყეებისთვის დამახასიათებელი მერქნიანი სახეობების მოზარდ-აღმონაცენი, როგორიცაა კავკასიური რცხილა, ქართული მუხა და მინდვრის ნეკერჩხალი.
ამასთან, უკვე არსებული სხვადასხვა სახეობის მოზარდ-აღმონაცენი ზრდა-განვითარებას შეუფერხებლად განაგრძობს. სამომავლოდ, აღნიშნული მწვანე ნარგავები საქონლის ძოვების შედეგად მიღებული დაზიანებებისგან დაცული იქნება.