დღეს თბილისის საკრებულოში გაიმართა ახალი უნიკალური გამოცემის - „თბილისური რეტროსპექტივა“ - პრეზენტაცია. გამოცემის რედაქტორია თბილისის საკრებულოს თავმჯდომარის მრჩეველი კულტურის საკითხებში მარიკა დარჩია. ღონისძიება გახსნა გამოცემის ერთ-ერთმა ავტორმა, არქიტექტურის დოქტორმა მამუკა სალუქვაძემ, რომელმაც ალბომის შექმნის შესახებ ისაუბრა.  პრეზენტაციაზე თბილისის საკრებულოს თავმჯდომარე გიორგი ტყემალაძე  სიტყვით გამოვიდა.

გიორგი ტყემალაძემ მადლობა გადაუხადა ყველას, ვინც გამოცემაზე იმუშავა.

„ეს გამოცემა ნამდვილად დიდი საჩუქარია თბილისელებისთვის,  თბილისის სტუმრებისთვის, ახალგაზრდა თაობისთვის და ყველა იმ ადამიანისთვის, ვისთვისაც საინტერესოა ჩვენი ქალაქის  მდიდარი ისტორია და მრავალფეროვანი კულტურა. მადლობა ყველა ადამიანს, ვინ იმუშავა და ხელი შეუწყო ამ ალბომის გამოცემას“, - განაცხადა თბილისის საკრებულოს თავმჯდომარემ.

ღონისძიებაზე სიტყვით გამოვიდნენ ასევე ალბომის ავტორი, ეთნოლოგიის დოქტორი მირიან ხოსიტაშვილი, გამოცემის რედაქტორი მარიკა დარჩია და საზოგადოების წარმომადგენლები.

ალბომზე მუშაობისას გამოცემის ავტორებმა, მამუკა სალუქვაძემ  და ეთნოლოგიის დოქტორმა მირიან ხოსიტაშვილმა, თავი მოუყარეს, აღრიცხეს და დაამუშავეს ეროვნულ ბიბლიოთეკაში დაცული მდიდარი საარქივო მასალა. ამავე დროს, გამოცემის სრულყოფის მიზნით, მათ იზრუნეს თბილისის სხვა საცავებსა და არქივებში არსებული ისტორიული დოკუმენტების, მათ შორის თბილისის ისტორიული რუკების მოპოვებაზე. შედეგად გამოიცა უნიკალური, ორენოვანი (ქართული, ინგლისური) ალბომი, რომელშიც ქრონოლოგიურად, სხვადასხვა პერიოდის ისტორიული რუკების, გრავიურების, ნახატების, ფოტოების მეშვეობით ასახულია ქალაქ თბილისის ზრდისა და განვითარების ეტაპები, ქალაქის ფორმირება მე-18 საუკუნის ვახუშტისეული  პერიოდიდან დღევანდლამდე.

პრეზენტაციის ორგანიზატორი საქართველოს პარლამენტის ეროვნული ბიბლიოთეკა და  კომპანია „სითი ინსტიტუტი საქართველოა“, მხარდამჭერები - ქალაქ თბილისის მუნიციპალიტეტის საკრებულო და მერია.

პრეზენტაციას დაესწრნენ  პარლამენტისა და თბილისის საკრებულოს წევრები, საქართველოს მეცნიერებათა აკადემიის, სამეცნიერო წრეების და უმაღლესი სასწავლო დაწესებულებების წარმომადგენლები, აგრეთვე სპეციალისტები და ექსპერტები, რომლებიც მუშაობენ არქიტექტურის, ურბანისტიკის, ისტორიისა და კულტურის, ხელოვნებათმცოდნეობის და ტურიზმის სფეროებში.