,
თბილისის საკრებულოს დეპუტატმა, პარტია „ხალხისთვის“ წევრმა ნინო წულაძემ, წინააღმდეგობის მიუხედავად, საკრებულოს შენობაზე რუსულენოვანი წარწერის გადახაზვა შეძლო.
როგორც ნინო წულაძემ ჟურნალისტებს განუცხადა, თბილისის საკრებულოს აბრის, სადაც ქართულთან ერთად, წარწერა რუსულად და ინგლისურად იყო დატანილი, ჩამოხსნის თხოვნით საკრებულოს არაერთხელ მიმართა, თუმცა, როგორც თავად ამბობს, უშედეგოდ.
ნინო წულაძემ წარწერის გადაშლა თავდაპირველად ე.წ. პულვიზატორით სცადა, თუმცა მას წინააღმდეგობა გაუწიეს.
მოგვიანებით კი წარწერა წითელი მარკერის საშუალებით გადახაზა და მის ადგილზე „რუსეთი ოკუპანტია“ დააწერა.
„ღირსეული ქვეყნის ადმინისტრაციულ ორგანოს შენობაზე უნდა იყოს რუსული წარწერა? ქართული სახელმწიფო ენაა, ინგლისური საერთაშორისო ენა და ამ რუსულ წარწერას რა საფუძველი აქვს? როგორც ხედავთ, ე.წ. პულვიზატორი წაგვართვეს, ეს ასე არ დარჩება. მერიას აქვს გადაწყვეტილი ეს აბრა, რუსულენოვანი წარწერით არ ჩამოხსნან. რუსულენოვანი წარწერის ადგილი თბილისის საკრებულოს ისტორიულ შენობაზე არ არის. ეს არის სირცხვილი! 14 სექტემბერს გავაგზავნე წერილი, რა მიზანს ემსახურებოდა ეს აბრა და როდის განთავსდა, პასუხი არ გამცეს. ეს წითელი ხაზი არის ოკუპაციის სიმბოლო, რომლითაც მუდმივად უნდა გვახსოვდეს, რომ რუსეთთან არანაირი სახის ურთიერთობა არ შეიძლება, იმიტომ, რომ ეს სახელმწიფო არის აგრესორი, მტერი. ეს არის დროებით გადახაზული წითელი მარკერით, პირობას ვდებ ეს აბრა აუცილებლად მოიხსნება და თუ არ მოიხსნება, ეს რუსული წარწერა მაინც არ იქნება. არავინ ეგებება ხელგაშლილი რუსეთის მოქალაქეებს თბილისის საკრებულოში და არც საქართველოში. ეგღა გვაკლია, ექსკურსიაზე შემოიყვანონ შიგნით და დიმიტრი ყიფიანის დარბაზი დაათვალიერებინონ რუსეთის მოქალაქეებს“, - განაცხადა ნინო წულაძემ.
პრეზიდენტმა ვლადიმირ პუტინმა განაცხადა, რომ 2025 წელს რუსეთის ეკონომიკური ზრდის ტემპი 1%-მდე შენელდა.
მთავრობის სხდომაზე გამოსვლისას მან აღნიშნა, რომ ეს მაჩვენებელი საგრძნობლად ჩამორჩება წინა წლების დინამიკას. კერძოდ, 2023 წელს 4.1%-იანი და 2024 წელს 4.3%-იანი ზრდა დაფიქსირდა, რაც სამხედრო ხარჯების ზრდის ეფექტით იყო განპირობებული.
პრეზიდენტის თქმით, ეკონომიკური აქტივობის ასეთი შენელება მთავრობისთვის მოსალოდნელი იყო და ის დიდწილად ინფლაციის წინააღმდეგ მიმართულმა ხელოვნურმა ზომებმა განაპირობა. ამ შემთხვევაში, პუტინი ცენტრალური ბანკის მიერ განსაზღვრულ რეფინანსირების განაკვეთზე მიუთითებს, რომელიც 16%-იან ნიშნულზეა.
პუტინმა ხაზი გაუსვა, რომ ცენტრალური ბანკის მიზანმიმართულმა პოლიტიკამ შედეგი გამოიღო და ინფლაცია, რომელიც 2024 წელს 9.5%-ს შეადგენდა, წელს 5.6%-მდე შემცირდა. მისივე პროგნოზით, 2026 წლის ბოლოსთვის ეს მაჩვენებელი 5%-იან ნიშნულამდე დაიწევს.
ეკონომიკური ზრდის შენელების მიუხედავად, კრემლი ამტკიცებს, რომ სახელმწიფო ბიუჯეტი სრულად ფარავს სოციალურ ვალდებულებებსა და სამხედრო საჭიროებებს, მიუხედავად იმისა, რომ რეკორდულად მზარდი ბიუჯეტის დეფიციტი სხვა რეალობაზე მიუთითებს.
ექსპერტთა ნაწილი მიიჩნევს, რომ რუსეთის ეკონომიკურ სტაგნაციას სამუშაო ძალის დეფიციტი, მაღალი საპროცენტო განაკვეთები და დასავლური სანქციების კუმულაციური ეფექტი იწვევს, რომლის სრულ მასშტაბებს უფრო მეტად 2026-27 წლებში ვიხილავთ.
ცნობისთვის, 2026 წლისთვის რუსეთის მთავრობა მშპ-ის 1%-1.3%-იან ზრდას პროგნოზირებს, თუმცა საერთაშორისო სავალუტო ფონდი უფრო პესიმისტურ, 0.8%-იან ზრდის მაჩვენებელს ვარაუდობს.
წყარო: https://bm.ge/
