კახა კალაძემ 2024 წელს 66 ბიტკოინი იყიდა, რაშიც 4 645 315,07 დოლარი გადაიხადა. ამის შესახებ თბილისი მერის ქონებრივ დეკლარაციაშია აღნიშნული.

6-თვიანი "ტექნიკური ხარვეზის" შემდეგ ქონებრივი დეკლარაციები გაიხსნა.

2025 წლის 31 იანვარს ჩაბარებული დეკლარაციის თანახმად, კალაძის სახელზეა ორი ბინა კიევში, კერძოდ გამარჯვების გამზირზე მდებარე 220 კვ.მ. ბინა 1997 წელს 150 000 დოლარად აქვს შეძენილი, ხოლო შევჩენკოს გამზირზე 250 კვ.მ. 2005 წელს, 700 000 დოლარად.

კალაძე ასევე 2 ბინას ფლობს თბილისში - ჭავჭავაძის გამზირზე 364,1 კვ.მ ბინა 2022 წელს 71 280 ლარად იყიდა, ხოლო მიხეილ ბურძგლას ქუჩაზე 396 კვ.მ 2012 წელს, ჩუქების გზით მიიღო.

2012 წელს, ჩუქების გზით აქვს მიღებული დაბა წყნეთში ორი მიწის ნაკვეთი, 1058 კვ.მ და 1060 კვ.მ. 1139 კვ.მ მიწის ნაკვეთი კი 298 000 დოლარად შეიძინა.

2012 წელს კალაძემ ჩუქებით მიიღო სამტრედიაში 2482 კვ.მ მიწის ნაკვეთი. 2013 წელს კი სამტრედიაში 93,9 კვ.მ არასაცხოვრებელი ფართი 60 000 დოლარად, ხოლო 76,2 კვ.მ 55 000 დოლარად იყიდა.

კალაძე თბილისში სამ ავტოფარეხს ფლობს, რომლებიც 2018 წელს, ჯამში 240 549 ლარად იყიდა.

კახა კალაძის მეუღლის, ანა არეშიძის სახელზე კი 4 ბინაა რეგისტრირებული. აქედან თბილისში მდებარე ორი ბინა 2022 წელს ჩუქების გზით მიიღო, ხოლო დუშეთის რაიონში, სოფელი კაიშაურებში ორი ბინა ჯამურად 223 830 დოლარად იყიდა.

კახა კალაძე ფლობს ლადო გუდიაშვილის 3 და ელენე ახვლედიანის 3 ფერწერულ ტილოს.

მის მფლობელობაშია 5 მოტოსატრანსპორტო საშუალება, ასევე 3 მსუბუქი ავტომანქანა. კალაძემ PORSCHE 911 გასულ წელს იყიდა, რაშიც 170 000 დოლარი გადაიხადა, ანა არეშიძემ კი 2024 წელს MERCEDES-BENZ AMG შეიძინა 150 000 დოლარად.

კალაძეს დანაზოგის სახით აქვს: 50 000 დოლარი, 70 000 ევრო, ხოლო ანა არეშიძეს: 65 000 ლარი და 45 000 ევრო.

კალაძეს, მერის თანამდებობაზე ანაზღაურების სახით გასულ წელს მიღებული აქვს 84 902,4 ლარი. ანა არეშიძეს შპს გლობალ ბიუთის დირექტორის პოზიციაზე 130 735 ლარი აქვს მიღებული.

კახა კალაძემ გასულ წელს ქველმოქმედებაზე 85 000 ლარი დახარჯა, გადახდილმა გადასახადებმა 73 408,73 ლარი შეადგინა, დაცვის პოლიციის მომსახურებაში კი 24 200 ლარი გადაიხადა.