თბილისის მერიაში მუნიციპალიტეტის მთავრობის სხდომა გაიმართა. დღის წესრიგით გათვალისწინებული საკითხების განხილვამდე, დედაქალაქის მერმა, კახა კალაძემ რამდენიმე განცხადება გააკეთა და აღნიშნა, რომ ღვიძლის გადანერგვის საჭიროების მქონე პირებისთვის ტრანსპლანტაცია სრულად, 120 ათასი ლარით დაფინანსდება.

მისი თქმით, აღნიშნული ინიციატივით თბილისის მერია უერთდება საქართველოს პრემიერ-მინისტრის გადაწყვეტილებას, რომლის მიხედვითაც, ღვიძლის ტრანსპლანტაციის პროგრამა სახელმწიფოს მხრიდან მთელი ქვეყნის მასშტაბით, 100%-ით დაფინანსდება.

„დედაქალაქის მერიაში ჯანდაცვის მიმართულებით უამრავი პროგრამა ფინანსდება. ერთ-ერთი მთავარია ღვიძლის გადანერგვის პროგრამა, რომელსაც ჯანდაცვისა და სოციალური მომსახურების საქალაქო სამსახური 2018 წლიდან ახორციელებს. პროგრამის დაწყებისას, ღვიძლის გადანერგვის საჭიროების მქონე მოქალაქე მუნიციპალიტეტის მხრიდან, მომსახურებისთვის განსაზღვრული ტარიფის 50%-ით ფინანსდებოდა. მოგვიანებით, დაფინანსება 10 ათასი ლარით გაიზარდა და 70 ათასი ლარი შეადგინა. თუ ღვიძლის გადანერგვის ოპერაცია ღირდა 120 000 ლარი, დედაქალაქის მერია თბილისში მცხოვრებ ადამიანებს აფინანსებდა 70 000 ლარით. იგივე პროგრამა ხორციელდებოდა ბათუმში. რამდენიმე დღის წინ მოვისმინეთ პრემიერის გადაწყვეტილება აღნიშნული პროგრამის დაწყებასთან დაკავშირებით მთელი ქვეყნის მასშტაბით, რაც მისასალმებელია. დაფინანსების ოდენობა სახელმწიფოს მხრიდან განისაზღვრა 100%-ით. ჩვენ პრემიერის გადაწყვეტილებას მივესალმებით და, რა თქმა უნდა, ვუერთდებით მას“, - აღნიშნა კახა კალაძემ.

თბილისის მერის განმარტებით, აღნიშნული ცვლილება მიმდინარე წლის პირველი ივლისიდან შევა ძალაში.

„დედაქალაქის მერიაც 100%-ით, ანუ სრულად დააფინანსებს ტრანსპლანტაციის პროგრამას, რათა აღნიშნული საჭიროების მქონე ადამიანების მიმართ მაქსიმალური თანადგომა და მხარდაჭერა გამოვხატოთ. აქამდე თუ ოპერაცია მხოლოდ 70%-ით ფინანსდებოდა და დანარჩენი თანხების მოძიება თვითონ ამ ადამიანებს უწევდათ, ამიერიდან ეს პრობლემა მთლიანად მოიხსნება“, - განაცხადა დედაქალაქის მერმა.

დედაქალაქის მერმა მთავრობის დღევანდელ სხდომაზე ზონალურ-საათობრივ პარკირებაზეც ისაუბრა და აღნიშნა, რომ ახალი სისტემა 1-ელი ოქტომბრიდან დამატებით რამდენიმე ქუჩაზე ამოქმედდება.

მისი თქმით, ზონალურ-საათობრივი პარკირება უფასოა ადგილობრივი მცხოვრებლების, შშმ პირების, ელექტრომობილების მფლობელებისა და A კატეგორიის ტაქსის მძღოლებისთვის.

„ჩვენი სატრანსპორტო პოლიტიკის ერთ-ერთი მნიშვნელოვანი კომპონენტია ზონალურ-საათობრივი პარკირების სისტემა, რომელიც რამდენიმე წლის წინ ავამოქმედეთ და გვინდა, ეტაპობრივად ყველა რაიონში, ყველა ქუჩაზე დაინერგოს. ზონალურ-საათობრივი პარკირების არეალებში პარკირება უფასოა წინასწარ რეგისტრირებული ადგილობრივი მცხოვრებლებისთვის, შშმ პირებისთვის, ელექტრომობილების მფლობელებისა და A კატეგორიის ტაქსის მძღოლებისთვის. სხვა შემთხვევაში, სტანდარტული ტარიფის ღირებულება უცვლელია და შეადგენს ერთ ლარს ერთი საათის განმავლობაში. ასევე, შეგახსენებთ, რომ მოქალაქეს შეუძლია, დღე-ღამის განმავლობაში, ოთხ სხვადასხვა ლოკაციაზე პირველი 15 წუთით ისარგებლოს უფასოდ“, - აღნიშნა კახა კალაძემ.

მისივე თქმით, 1-ელი ოქტომბრიდან ზონალურ-საათობრივი პარკირება შემდეგ ქუჩებზე ამოქმედდება: ჩუღურეთის რაიონში - ივანე ჯავახიშვილის ქუჩა, ზაარბრიუკენის მოედანი, ნინოშვილისა და უზნაძის ქუჩები და მიმდებარე ტერიტორია; მთაწმინდის რაიონში - ლაპიაშვილის ქუჩა, ჭოველიძისა და ჯანაშიას ქუჩები და მიმდებარე ტერიტორია; ვაკის რაიონში - კუს ტბის ასახვევის მიმდებარე ტერიტორია.

ამასთან, თბილისის მერის განხადებით, ადგილობრივი მცხოვრებლები ზონალურ-საათობრივი პარკირების არეალებში უფასო პარკირებისთვის რეგისტრაციის გავლას და სხვა საჭირო ინფორმაციის მიღებას საინფორმაციო ჯიხურებში პირველი სექტემბრიდან შეძლებენ.

გარდა ამისა, დედაქალაქის მერმა აღნიშნა, რომ თბილისის მერიის 2023 წლის „საზაფხულო პროგრამებზე“ მაღალი ინტერესის გათვალისწინებით, რეგისტრაციის ვადა 3 ივლისამდე გახანგრძლივდა.

მისივე თქმით, ახალგაზრდულ პროგრამებს მუნიციპალიტეტი უკვე რამდენიმე წელია ახორციელებს.

„პირადად ჩემთვის და ჩემი თანაგუნდელებისთვის ჯანსაღი ცხოვრების წესის პოპულარიზაცია, ახალგაზრდების ხელშეწყობა ერთ-ერთი უმნიშვნელოვანესი პრიორიტეტია. ამ მიმართულებით, მუნიციპალიტეტში ბევრი საინტერესო პროგრამა ხორციელდება. რამდენიმე კვირის წინ ვისაუბრეთ საზაფხულო-ახალგაზრდული პროგრამების შესახებ, რომელიც თბილისის მერიის ორგანიზებით, ყოველ ზაფხულს ხორციელდება და ითვალისწინებს ჯანსაღი ცხოვრების წესის ხელშეწყობას, დასვენებისა და გართობისთვის შესაბამისი გარემოს შექმნას. 2023 წლის „საზაფხულო პროგრამის“ ფარგლებში, დაგეგმილია შემდეგი აქტივობები: კარტინგი, მინი გოლფი, სასროლეთი; მუნიციპალური საცურაო აუზი; ჩოგბურთის კორტები; ჯომარდობა; ლაშქრობები თბილისის გარშემო. ეს ყველაფერი უზრუნველყოფილი იქნება კვებით, ეკიპირებით, გამოცდილი სპეციალისტებით, მწვრთნელებით“, - განაცხადა კახა კალაძემ.

მისივე თქმით, აღნიშნულ პროგრამებზე რეგისტრაცია 20 ივნისს დაიწყო და უკვე 4 000-მდე ახალგაზრდაა დარეგისტრირებული.

კახა კალაძემ დღევანდელ სხდომაზე ინფრასტრუქტურულ პროექტებზეც ისაუბრა და აღნიშნა, რომ მშვიდობის ხიდს რეაბილიტაცია ჩაუტარდება, რომლის საჭიროებაც ხიდის მარცხენა სანაპიროს ბურჯის ზედაპირის ბეტონის დაზიანებამ განაპირობა.

„დავიწყეთ მშვიდობის ხიდის სარეაბილიტაციო სამუშაოები. რეაბილიტაციის საჭიროება განაპირობა ხიდის მარცხენა სანაპიროს ბურჯის ზედაპირის ბეტონის დაზიანებამ, რაც საჭიროებს აღდგენას. რეაბილიტირდება სავალ ნაწილზე არსებული დეფორმირებული კიბეები. დასაჭიმია საკიდები დაკიდებულ ხიდზე, რაც იწვევს არათანაბარ დატვირთვას. ხიდის საკიდების ერთგვაროვნად დაჭიმვის მიზნით, მოეწყობა შესაბამისი კონსტრუქციები და ჩაუტარდება რეაბილიტაცია“, - განაცხადა კახა კალაძემ.

მისი თქმით, რეაბილიტაციის პროცესში, გარკვეული პერიოდის განმავლობაში ხიდი ჩაიკეტება.

„სამუშაოების უსაფრთხოდ წარმოების მიზნით, გარკვეული პერიოდის განმავლობაში ჩაიკეტება ხიდი. გადაადგილების შეზღუდვის ვადის შესახებ მოსახლეობას დამატებით ეცნობება. აღნიშნული ხიდით ბევრი ადამიანი სარგებლობს. ამიტომ, სამუშაოების მიმდინარეობისას, მნიშვნელოვანია უსაფრთხოების გათვალისწინება“, - აღნიშნა კახა კალაძემ.

მისივე თქმით, პროექტის ღირებულება 1 400 000 ლარს შეადგენს, სარეაბილიტაციო სამუშაოების დასრულება კი მიმდინარე წლის აგვისტოსთვის იგეგმება.

„ხიდის სიგრძე 200 მეტრამდეა. სამუშაოების ფარგლებში, განათებები მთლიანად შეიცვლება, რადგან დაზიანებულია. პროექტის ღირებულება შეადგენს 1 400 000 ლარს, სარეაბილიტაციო სამუშაოების დასრულებას კი მიმდინარე წლის აგვისტოში ვფიქრობთ“, - განაცხადა კახა კალაძემ.

კიდევ ერთი ინფრასტრუქტურული პროექტი, რომელზეც ყურადღება გამახვილდა, ისნის რაიონში, მახათას აღმართისა და ვაზისუბნის დასახლებაში მდებარე ეშბას ქუჩის დამაკავშირებელი გზის მშენებლობაა.

კახა კალაძის განცხადებით, ახალი გზით სარგებლობა უკვე შესაძლებელია, რაც ვაზისუბნის ქუჩებს განტვირთავს და ერთი უბნიდან მეორეში გადაადგილების დროს შეამცირებს.

„ეს არის სრულიად ახალი გზა, რომელიც ვაზისუბანში, „ჰუალინგის“ ტერიტორიიდან მახათას აღმართს უკავშირდება, რაც საგრძნობლად განტვირთავს ვაზისუბნის ქუჩებს და ერთიდან მეორე უბანში მოხვედრის დროს შეამცირებს. პროექტის ფარგლებში, მოეწყო გზის სავალი ნაწილი, ტროტუარი, გარე განათების ქსელი და დამონტაჟდა LED სანათები. დამეთანხმებით ის ადამიანები, რომლებიც აღნიშნული გზით უკვე სარგებლობთ, რომ გადაადგილება კომფორტულია“, - აღნიშნა კახა კალაძემ.

მისივე თქმით, ახალ გზაზე საგზაო მონიშვნებისა და გამწვანების სამუშაოებია დარჩენილი, რომელიც უახლოეს მომავალში დასრულდება.  

გარდა ამისა, მთავრობის დღევანდელ სხდომაზე აღინიშნა, რომ ერთიანი ეროვნული, საერთო სამაგისტრო, მასწავლებელთა გამოცდებიდან და სტუდენტთა საგრანტო კონკურსიდან გამომდინარე, საგამოცდო ცენტრების მიმართულებით სპეციალური მარშრუტები დაწესდება.

„მიმდინარე წლის 3 ივლისიდან 8 აგვისტომდე, ერთიანი ეროვნული, საერთო სამაგისტრო, მასწავლებელთა გამოცდებიდან და სტუდენტთა საგრანტო კონკურსიდან გამომდინარე, აღნიშნულ პროცესში ჩართული ყველა პირის შეუფერხებელი გადაადგილების მიზნით, ვგეგმავთ, დავაწესოთ სპეციალური მარშრუტები საგამოცდო ცენტრების მიმართულებით“, - განაცხადა კახა კალაძემ.

მისივე თქმით, გლდანისა და მუხიანის დასახლებაში არსებული საგამოცდო ცენტრების მიმართულებით, ავტობუსები იმოძრავებენ მეტროსადგურ „ახმეტელის თეატრის“, კერძოდ, გობრონიძისა და ვეკუას ქუჩების კვეთის მიმდებარე ტერიტორიიდან; მესამე მასივში არსებული საგამოცდო ცენტრის მიმართულებით, ავტობუსი იმოძრავებს მეტროსადგურ „ვარკეთილის“ მიმდებარე ტერიტორიიდან; მეტრომშენის დასახლებაში არსებული საგამოცდო ცენტრის მიმართულებით კი, საზოგადოებრივი ტრანსპორტი იმოძრავებს მეტროსადგურ „სამგორის“ ზედა გასასვლელიდან.

დედაქალაქის მერმა ქალაქში გახშირებულ ვანდალიზმის ფაქტებზეც ისაუბრა და განაცხადა, რომ მეტეხის ხიდის მიმდებარედ ათეულობით სურო ძირშია გადაჭრილი.

მისივე თქმით, გულგრილობის ნაცვლად, ვანდალიზმის გახშირებულ ფაქტებს ყველა ერთად უნდა ებრძოლოს.

„ვანდალიზმის ფაქტები საკმაოდ ხშირია. ეს მძიმეა როგორც ჩვენი თანამშრომლებისთვის, ასევე ყველა იმ ადამიანისთვის, ვისაც ეს ქალაქი უყვარს. ყველაფერი რაც კეთდება, კეთდება თქვენივე ფულით, ჩვენ ამას მხოლოდ ვამენეჯმენტებთ. ასევე, ყველა პროექტში ჩადებულია უამრავი ადამიანის შრომა. ამიტომ, გულდასაწყვეტია, როცა კონკრეტულ სივრცეებს, ინფრასტრუქტურას აზიანებენ, ანადგურებენ. ხშირ შემთხვევაში, ამას პატარები, ახალგაზრდები აკეთებენ, რასაც უფროსები გულგრილად უყურებენ. ეს საერთო პრობლემაა, რომელსაც ერთად უნდა ვებრძოლოთ - ახალგაზრდებს ავუხსნათ, რომ ეს ყველაფერი მათი საკუთრებაა და მოქალაქეების განტვირთვისა და დასვენებისთვის კეთდება“, - განაცხადა კახა კალაძემ.

მისივე თქმით, ქალაქში გამონაბოლქვის თვალსაზრისით არსებული პრობლემის მოსაგვარებლად, თითოეულ გამწვანებულ არეალს უდიდესი მნიშვნელობა გააჩნია.

„რამდენიმე დღის წინ, კიდევ ერთი მსგავსი ფაქტის მოწმენი გავხდით მეტეხის ხიდის მიმდებარედ. მტკვრის მარჯვენა სანაპიროზე, ძირში გადაჭრეს ათეულობით სურო, რომელიც პანდუსის კედელს ალამაზებდა. ქალაქში, დაახლოებით, 600 ათასი ავტომანქანა მოძრაობს, რომელთა დიდი ნაწილი არის ძველი, 15 წლის ზემოთ. ასევე, დიდ ნაწილს კატალიზატორი საერთოდ არ აქვს და გამონაბოლქვის თვალსაზრისით, უდიდესი პრობლემა გვაქვს. შესაბამისად, თითოეულ ხეს, პარკს, რეკრეაციულ სივრცეს, გამწვანებულ არეალს უდიდესი მნიშვნელობა გააჩნია. ამის ფონზე, ვანდალიზმის ფაქტებს რომ ვაწყდებით, ძალიან გულდასაწყვეტია. ყველას მოგიწოდებთ, რომ ერთად ვიზრუნოთ ამ ქალაქზე, გავუფრთხილდეთ მას“, - აღნიშნა თბილისის მერმა.