,
თბილისის მერია მყარი ნარჩენების პოლიგონის დიდი ლილოდან გადატანას გეგმავს - ამის შესახებ კახა კალაძემ მერიის მთავრობის დღევანდელ სხდომაზე განაცხადა. მისი თქმით, მიმდინარეობს კონკრეტული არეალების შესწავლა სადაც მყარი ნარჩენების ახალი პოლიგონი უნდა მოეწყოს. პროექტი EBRD-ის დაფინანსებით სრულდება. ჯერჯერობით უცნობია თუ სად შეიძლება გადაინაცვლოს ნაგავსაყრელმა.
თუმცა, იქამდე სანამ ახალი პოლიგონი მოეწყობა, მერია არსებული ნაგავსაყრელის რეაბილიტაციას გეგმავს. კახა კალაძის თქმით, დღეს ხელი მოეწერება 6.5 მილიონი ევროს შესყიდვას, რაც ნაგავსაყრელის ჩამდინარე წყლების ახალი გამწმენდი ნაგებობის მშენებლობას ითვალისწინებს.
"აღნიშნულ ნაგავსაყრელზე მთელი რიგი პრობლემები არსებობს. ასევე, ხაზი მინდა გავუსვა იმას, რომ დაწყებული გვაქვს ახალი არეალის მოძიება, სადაც შესაძლებელი იქნება ნაგავსაყრელის გადატანა. ამაში ჩართულია შესაბამისი კომპანიები, რათა ქალაქიდან მოშორებით განხორციელდეს ახალი პროექტი. რა თქმა უნდა, არსებული ნაგავსაყრელის იმ პირობებში დატოვება, რა პირობებშიც ის დღეს არის, წარმოუდგენელი და ძალიან მძიმეა.
აქტიურად ვთანამშრომლობთ ევროპის რეკონსტრუქციისა და განვითარების ბანკთან (EBRD), რადგან უცხოელი ექსპერტების ჩართულობის გარეშე, რთულია ამ ტიპის სამუშაოების ჩატარება. ჩვენ ამ მიმართულებით არ გვყავს ძლიერი სპეციალისტები. პროექტის ღირებულება 6,5 მლნ ევროს შეადგენს“, - განაცხადა დედაქალაქის მერმა.
კალაძემ ასევე აღნიშნა, რომ სამუშაოებს შპს „თბილსერვის ჯგუფის“ დაკვეთით, შპს „გუმბათი ჰოლდინგი“ შეასრულებს.
„კონტრაქტორი კომპანია პროექტის მომზადებას ხვალიდან დაიწყებს. შესაბამისი ინფრასტრუქტურის მოწყობის შემდეგ, ლილოს პოლიგონზე ყველაზე დიდი გარემოსდაცვითი პრობლემა მოგვარდება და შემცირდება ის აუტანელი სუნი, რაც წლების განმავლობაში აწუხებს მოსახლეობას. ნაგავსაყრელი ეტაპობრივად გაიწმინდება წლების განმავლობაში დაგროვებული ნაჟური წყლებისგან, ახალი განთავსებული ნარჩენებისგან წარმოქმნილი სითხე ავტომატურად გაიფილტრება და ის პრობლემა, რაც სუნს უკავშირდებოდა, მთლიანად მოიხსნება. აღნიშნული კომპანია, „გუმბათი ჰოლდინგი“ მაქვს მხედველობაში, ბერძნულ საპროექტო და გერმანულ მწარმოებელ კომპანიებთან ერთად იმუშავებს. პროექტირებისა და სამუშაოების განხორციელების ვადა 12 თვეა“, - განაცხადა კახა კალაძემ.
დიდი ლილოს მყარი ნარჩენების პოლიგონი ექსპლოატაციაში 2010 წელს შევიდა. იქამდე, თბილისის მყარი ნარჩენების მთავარი პოლიგონი გლდანში მდებარეობდა.
თბილსერვის ჯგუფის ინფორმაციით, დიდი ლილოს პოლიგონი ყოველდღიურად საშუალოდ 1000 ტონა საყოფაცხოვრებო ნარჩენებს იღებს, ამასთან ზაფხულის განმავლობაში ნარჩენების რაოდენობა დღეში საშუალოდ 1200 ტონამდე იზრდება, ზამთარში კი პოლიგონს დღიურად 800 ტონა ნარჩენების მიღება უწევს. თბილსერვის ჯგუფის დაკვეთით ჩატარებული სკოპინგის ანგარიშის თანახმად, არსებულ პოლიგონს აქვს მნიშვნელოვანი ტექნიკური ნაკლოვანება, რადგანაც ნაგავსაყრელიდან გამოჟონილი სითხის გამწმენდი სისტემა ექსპლოატაციიდან არის გამოსული და აუცილებელია მისი ჩანაცვლება.
ირანის ხელისუფლებამ შუამავლებისგან აშშ-ის სამშვიდობო შეთანხმების პუნქტების ჩამონათვალი მიიღო, რომელთა განხილვას იწყებს. ინფორმაციას BBC ავრცელებს.
„ჩვენ შუამავლების მეშვეობით აშშ-გან მივიღეთ პუნქტები და მათ განვიხილავთ“, - ციტირებს BBC ირანის საგარეო საქმეთა სამინისტროს ერთ-ერთ მაღალჩინოსანს.
როგორც ბრიტანული ტელეარხის CBS-ზე დაყრდნობით წერს, აღნიშნული წარმოადგენს მოლაპარაკებების წინა ეტაპს და ამ მომენტისთვის დიალოგი მხარეებს შორის ჯერ არ იმართება.
ცნობისთვის, გუშინ აშშ-ის პრეზიდენტმა, დონალდ ტრამპმა განაცხადა, რომ აშშ-მა და ირანმა ომის დასრულების შესახებ მოლაპარაკებები გამართეს, თუმცა ირანული მხარე ამას უარყოფს.
