თბილისის მერიის სსიპ თბილისის ტრანსპორტისა და ურბანული განვითარების სააგენტო ძველი შუქნიშნების ჩანაცვლებისთვის და უსაფრთხოების კუნძულების მოწყობისთვის 3 652 585 ლარის ღირებულების ტენდერს აცხადებს.

სატენდერო დოკუმენტაციის მიხედვით, შესყიდვის ფარგლებში იგეგმება დედაქალაქის ადმინისტრაციულ საზღვრებში შუქნიშნის ძველი ობიექტების ახლებით ჩანაცვლების ან ახალი ობიექტების მოსაწყობად შუქნიშნების, სატრანსპორტო დეტექტორების, ვიდეოკამერების, საგზაო კონტროლერების და უსაფრთხოების კუნძულების მოწყობა.

წინადადების მიღება 26 იანვარს დაიწყება და 31 იანვრის ჩათვლით გაგრძელდება.

ტენდერის მიხედვით, იგეგმება 187 სატრანსპორტო, 202 - ფეხით მოსიარულეთა და 15 - ველოსიპედით მოსიარულეთა შუქნიშნის შესყიდვა მონტაჟით. ამასთან, გათვალისწინებულია ბორდიურების და კუნძულის მოწყობაც. ადგილები დაკონკრეტებული არ არის.

სატენდერო დოკუმენტაციის მიხედვით, პრეტენდენტს 2022 წლის 01 იანვრიდან უნდა გააჩნდეს არანაკლებ 3 შუქნიშნის ობიექტის მონტაჟისა და მათი მართვის ცენტრთან მიერთების გამოცდილება.

რაც შეეხება ვადებს, ტენდერის მიხედვით, შუქნიშნის ობიექტის მიწოდება უნდა განხორციელდეს მოთხოვნის შესაბამისად, მოთხოვნიდან არაუმეტეს 165 კალენდარული დღის ვადაში, 2025 წლის 25 დეკემბრის ჩათვლით.