,
ჰაუპტვახტის შენობა აგებულ იქნა XIX საუკუნის 10-იან წლებში. შენობა მდებარეობდა იქ, სადაც ახლა კინოთეატრი “რუსთაველია”. იგი წარმოადგენდა კლასიციზმის ერთ-ერთ პირველთაგან შენობას თბილისში. შენობა ორსართულიანი იყო, ორივე სართულის სიმაღლის მძლავრი ტოსკანური კოლონადით. მის უკან მიწის პატარა მონაკვეთი ეჭირა კალოუბნის ეკლესიას.
ჰაუპტვახტის შენობის ადგილას, არქიტექტორ ნიკოლოზ სევეროვის პროექტით, 1939 წელს აგებულ შენობაში, კინოთეატრი "რუსთაველი" განთავსდა. ოთხსართულიან ნაგებობას კუბური მოცულობა აქვს. ფასადთა პირველი სართული რუსტირებულია, ზედა სართულები კი გიგანტური კორინთული პილასტრებით არის დანაწევრებული. მეორე სართულის განაპირა თაღოვან ნიშებში ვ. თოფურიძისა (რუსთაველის გამზ. მხარეს) და შ. მიქატაძის (ა. ფურცელაძის ქ. მხარეს) მიერ შესრულებული ქანდაკებებია მოთავსებული.
კინოთეატრი “რუსთაველი” მიხეილ ჭიაურელის ფილმით „დიადი განთიადი“ გაიხსნა. შენობას 1988 წელს ძეგლის სტატუსი მიენიჭა.
კინოთეატრი “რუსთაველი” 2018 წლიდან დაკეტილია და აღარ ფუნქციონირებს. საზოგადოებაში მუსირებს აზრი, რომ “რუსთაველის” ნაცვლად სხვა ობიექტის გახსნა იგეგმება და კინოთეატრი აღარ იფუნქციონირებს.
