,
თბილისს ტრანსპორტის გენერალური გეგმა უკვე აქვს. 80-გვერდიანი დოკუმენტი ტრანსპორტისა და ურბანული განვითარების სააგენტოსთვის დანიურმა საკონსულტაციო კომპანია "რამბოლმა", აზიის განვითარების ბანკის ფინანსური მხარდაჭერით მოამზადა.
მათ შორის, დოკუმენტში საუბარია, რომ თბილისის 2 ცენტრალური ქუჩა - თავისუფლების მოედანი და რუსთაველის გამზირი ადამიანზე მორგებულ ადგილად უნდა გადაიქცეს.
„თავისუფლების მოედანი თბილისის ცენტრში ისტორიული და ეროვნული მნიშვნელობის ღირსშესანიშნაობაა. იგი ძველი ქალაქის კიდეზე მდებარეობს და როგორც მაცხოვრებლები, ისე ტურისტები ხშირად გადაკვეთენ მას. მიუხედავად ღირსშესანიშნავი მდებარეობისა, თავისუფლების მოედანი ხელს უწყობს ავტომობილების თავისუფალ მოძრაობას. ფეხით, ველოსიპედით სიარული ან უბრალოდ გარეთ ჯდომა, და მოედნით ტკბობა უმეტესად ნაკლებ უსაფრთხო და სასიამოვნო საქმიანობად მიიჩნევა. სხვა ქალაქები თავიანთ მთავარ მოედნებს ადამიანებს უბრუნებენ. ბოლო ოცი წლის განმავლობაში ნიუ-იორკში ტაიმზ-სკვერი და ლონდონში ტრაფალგარის მოედანი ნახევრად საფეხმავლო გახდა.
რუსთაველის გამზირი, ალბათ, თბილისის ყველაზე მნიშვნელოვანი ქუჩაა. ის ჩრდილოეთით რესპუბლიკის მოედანსა და სამხრეთით თავისუფლების მოედანს შორის გადის. გარდა იმისა, რომ რუსთაველის გამზირი საგრძნობი მოცულობის ავტოტრანსპორტს ატარებს ყოველდღიურად, ქვეითთა ნაკადით თბილისის ერთ-ერთ ყველაზე დატვირთულ ქუჩებს შორისაა. მიუხედავად ამისა, რუსთაველის გამზირის უმეტესი ნაწილი ავტომობილებს ეთმობა, ხოლო ქვეითები ტროტუარზე დადიან გასწვრივ. რუსთაველის გასწვრივ შუქნიშნების გარეშე ავტომობილები დიდი სიჩქარით მოძრაობენ და ქვეითები იძულებულნი არიან გამზირი არასასიამოვნო და ხშირად მიუწვდომელი მიწისქვეშა გადასასვლელებით გადაკვეთონ. გამზირზე არ არსებობს ველობილიკები.
ეს პროექტი თავისუფლების მოედნისა და რუსთაველის გამზირის ადამიანზე მორგებულ ადგილად გადაქცევას ისახავს მიზნად. თავისუფლების მოედანზე არსებული წრიული მოძრაობის სქემა შეიცვლება ჩვეულებრივი ორმხრივი ქუჩებით ველობილიკებით კიდეებზე და ნაკადების საკონტროლო შუქნიშნებით, და ბევრად უსაფრთხო ქვეითთა გადასასვლელებით. მოედნის ცენტრალური ნაწილი მთლიანად დაეთმობა ადამიანებს. ეს მოიცავს მეტ მოსასვენებელ ადგილს, მწვანე სივრცეს და უკეთეს ქუჩის განათებას.
რუსთაველის გამზირზე არსებული ჩქაროსნული არტერია თანამედროვე საერთაშორისო ქალაქზე მორგებულ გამზირად გადაიქცევა. უმეტეს გზაჯვარედინზე უზრუნველყოფილი იქნება შუქნიშნები და ქუჩის დონის გადასასვლელები. დიზაინი ასევე მოიცავს ველოსიპედისა და ავტობუსის ზოლებს.
ორივე დიზაინი ამჟამინდელი სქემით შესაბამისობაშია თბილისის სატრანსპორტო გეგმის ხედვასა და მიზნებთან, ისევე როგორც ქუჩის დიზაინის სახელმძღვანელო პრინციპებთან,“- აღნიშნულია გეგმაში.
პრეზიდენტმა ვლადიმირ პუტინმა განაცხადა, რომ 2025 წელს რუსეთის ეკონომიკური ზრდის ტემპი 1%-მდე შენელდა.
მთავრობის სხდომაზე გამოსვლისას მან აღნიშნა, რომ ეს მაჩვენებელი საგრძნობლად ჩამორჩება წინა წლების დინამიკას. კერძოდ, 2023 წელს 4.1%-იანი და 2024 წელს 4.3%-იანი ზრდა დაფიქსირდა, რაც სამხედრო ხარჯების ზრდის ეფექტით იყო განპირობებული.
პრეზიდენტის თქმით, ეკონომიკური აქტივობის ასეთი შენელება მთავრობისთვის მოსალოდნელი იყო და ის დიდწილად ინფლაციის წინააღმდეგ მიმართულმა ხელოვნურმა ზომებმა განაპირობა. ამ შემთხვევაში, პუტინი ცენტრალური ბანკის მიერ განსაზღვრულ რეფინანსირების განაკვეთზე მიუთითებს, რომელიც 16%-იან ნიშნულზეა.
პუტინმა ხაზი გაუსვა, რომ ცენტრალური ბანკის მიზანმიმართულმა პოლიტიკამ შედეგი გამოიღო და ინფლაცია, რომელიც 2024 წელს 9.5%-ს შეადგენდა, წელს 5.6%-მდე შემცირდა. მისივე პროგნოზით, 2026 წლის ბოლოსთვის ეს მაჩვენებელი 5%-იან ნიშნულამდე დაიწევს.
ეკონომიკური ზრდის შენელების მიუხედავად, კრემლი ამტკიცებს, რომ სახელმწიფო ბიუჯეტი სრულად ფარავს სოციალურ ვალდებულებებსა და სამხედრო საჭიროებებს, მიუხედავად იმისა, რომ რეკორდულად მზარდი ბიუჯეტის დეფიციტი სხვა რეალობაზე მიუთითებს.
ექსპერტთა ნაწილი მიიჩნევს, რომ რუსეთის ეკონომიკურ სტაგნაციას სამუშაო ძალის დეფიციტი, მაღალი საპროცენტო განაკვეთები და დასავლური სანქციების კუმულაციური ეფექტი იწვევს, რომლის სრულ მასშტაბებს უფრო მეტად 2026-27 წლებში ვიხილავთ.
ცნობისთვის, 2026 წლისთვის რუსეთის მთავრობა მშპ-ის 1%-1.3%-იან ზრდას პროგნოზირებს, თუმცა საერთაშორისო სავალუტო ფონდი უფრო პესიმისტურ, 0.8%-იან ზრდის მაჩვენებელს ვარაუდობს.
წყარო: https://bm.ge/
