თბილისს სამხრეთით, მტკვრის მარჯვენა მხარეს, თაბორის მთა ეკვრის, რომელიც თრიალეთის ქედის ერთ-ერთი განშტოებაა. თბილისის საოცარი ლანდშაპტის უნიკალური ნაწილი - თაბორის მთა, ქალაქისთვის დიდ მნიშვნელობას ატარებს. განიავება მასზე გაშენებული მრავალწლოვანი ფიჭვნარის წყალობით ხდება. ფიჭვის ტყეების მთავარი დანიშნულებაა ასევე ქალაქის ფერდობების ძლიერი წვიმებით გამოწვეული ეროზიისგან დაცვა და წყლის რეჟიმისა და მიკროკლიმატის დაბალანსება.

ამ მთის უნიკალურობას კიდევ მრავალი ფაქტორი განაპირობებს, მათ შორის: ვინაიდან უფალმა ფერი თაბორის მთაზე იცვალა, მთისა და მონასტრის სახელწოდებაც ამ მოვლენას უკავშირდება; ამასთან, თაბორის მთაზე მდებარე ფერისცვალების მონასტერი დაახლოებით, XIII – XIVსს-ში დემეტრე თავდადებულს აუგია, საუკუნეების წინ აშენებული მონასტრის ნაშთები კი ახლაც არის შემორჩენილი თაბორის მთაზე.

1995 წელს საპატრიარქოს დაკვეთით თაბორის მთაზე დაიწყო ახალი „ნახევრადთავისუფალი ჯვრის“ გეგმის მქონე ტაძრის მშენებლობა, რომლის საძირკველი 1996 წლის 19 აგვისტოს (ფერისცვალების დღესასწაულზე) აკურთხა სრულიად საქართველოს კათოლიკოს-პატრიარქმა, უწმინდესმა და უნეტარესმა ილია II-მ. მშენებლობა 2001 წელს დამთავრდა. დღეს, მონასტრის კომპლექსის შემადგენლობაში შედის რამდენიმე ტაძარი: დიდი ტაძარი ფერისცვალების სახელობისაა, მეორე ტაძარი – მოსესა და ილიას სახელობის, ხოლო მის ქვეშ გახლავთ მესამე ტაძარი, რომელიც მოციქულების სახელზეა აგებული.

არქიტექტურული თვალსაზრისით, ფერისცვალების სახელობის ტაძარი ნახევრად ჯვრული ნაგებობაა. ტაძრის უკანა ნაწილი არ არის ჯვრული, ხოლო წინა ნაწილი, სადაც სტოა მდებაროებს, ჯვრულია. ტაძარი დახურულია, ჭიათურის რაიონში მდებარე კაცხის მონასტრის გადახურვის მსგავსად.

საინტერესოა, როგორ შევინარჩუნებთ ამ ყველაფერს ახალი განაშენიანების ფონზე? $130-მილიონიანი სასტუმრო Paragraph Tabori-სა და გოლფ კლუბის მშენებლობა ხომ უკვე აქტიურ ფაზაშია.

თაბორის მთაზე სასტუმრო „PARAGRAPH GOLF & SPA RESORT TABORI HILL”-ის მშენებლობა, რომელიც 2017 წელს დაიწყო 402 009 კვ/მ რეკრეაციულ ზონას, ლანდშაფტთან შერწყმულ 9-ფოსოიან გოლფის მოედანს, ხელოვნურ ტბასა და ჩოგბურთის კორტებს, ასევე 177-ნომრიან სასტუმროს, საცურაო აუზს, სპა ცენტრს, სავარჯიშო დარბაზსა და რესტორანს მოიცავს.

აღნიშნული პროექტი საბაგირო საშუალებით სოლოლაკის ქედზე მდებარე მასშტაბურ პროექტს და თავისუფლების მოედანზე არსებულ სასტუმრო „პარაგრაფ თბილისს“ დაუკავშირდება. პროექტის სრულად დაგეგმარებას და საბაგირო დანადგარებით აღჭურვას ავსტრიულ-შვეიცარიული კომპანია „Doppelmayr”-ი უზრუნველყოფს. 34-გონდოლიან საბაგიროს საზოგადოებრივი ტრანსპორტის ფუნქცია ექნება.

თაბორის მთაზე სასტუმრო Paragraph Tabori-სა და გოლფ კლუბის გახსნა მესამედ გადავადდა და ახლა უკვე 2024 წლის ბოლოსთვის იგეგმება. თავდაპირველად კომპლექსი 2021 წელს უნდა გახსნილიყო, 2022 წლის ინფორმაციით კი Paragraph Tabori პირველი სტუმრები 2023 წლის შემოდგომისთვის უნდა მიეღო, თუმცა გასული წლის დასაწყისში ეს თარიღიც დაკორექტირდა და ეს ალბათ იმიტომ, რომ მთელი ყურადღება „პარაგრაფ თბილისის“ გახსნაზე იყო მიმართული.

„The Luxury Collection“-ის კლასის სასტუმრო „პარაგრაფ თბილისი“ გასული წლის 21 ნოემბერს თავისუფლების მოედანზე გაიხსნა, რომელიც Marriott International-ის ბრენდის ეგიდით ოპერირებს.

Luxury Collection-ის ბრენდი Marriot International-ის უმაღლესი კატეგორიის ბრენდია, რომელიც გულისხმობს ყველაზე მაღალ სტანდარტებს, როგორც კომფორტის, დიზაინის, ხარისხის ასევე მომსახურების ნაწილში.

„პარაგრაფ თბილისი“ სტუმრებს სთავაზობს უმაღლესი კატეგორიის 220 ოთახს პანორამული ხედებით თბილისზე, სხვადასხვა სახის რესტორნებს, 3 სართულზე განლაგებულ სპა ცენტრს, მულტიფუნქციურ საკონფერენციო სივრცეებს და რაც ყველაზე მთავარია უმაღლესი ხარისხის მომსახურებას.

პარაგრაფ თბილისის სასტუმროს დიზაინზე ფრანგულმა კომპანია „HAT Design Paris“-მა იმუშავა, მათ მიერ შექმნილი სასტუმროს ინტერიერი შთაგონებას საქართველოს მდიდარი მემკვიდრეობისა და ძირძველი ისტორიიდან იღებს. სასტუმროს სხვადასხვა სივრცეში სტუმრებს ხვდებათ ვაზისა და თბილისის არქიტექტურით ნაკარნახევი დეტალები, ასევე ინტერიერის დიზაინში აქტიურად არის გამოყენებული ქართული სამოსელისთვის დამახასიათებელი ელემენტები და უნიკალური ქართული ორნამენტების ასლები. სასტუმროში წარმოდგენილია ხუთი განსხვავებული კონცეფციის რესტორანი და ბარი.

3 სართულზე განლაგებული უმაღლესი კატეგორიის პარაგრაფ სპა, ბრიტანული ბრენდის „ESPA“-ს ოფიციალური წარმომადგენელია საქართველოში. სპაში დამსვენებლებს ხვდებათ დახურული და ღია აუზი პანორამული ხედებით თბილისზე, სხვადასხვა ტიპის საუნები, ფიტნეს და იოგას დარბაზი, 5 მულტიფუნქციური საპროცედურო ოთახი-ინდივიდუალური ტერასით. სპაში ასევე ფუნქციონირებს სარელაქსაციო სივრცე, სპა, კაფე და საქართველოში პირველი ინდივიდუალური მომზადების მაღალტექნოლოგიური „Prama“ სტუდია.

„The Luxury Collection” არის ბრენდი, რომელიც შედგება უმაღლესი ხარისხის სასტუმროებისა და კურორტებისგან. 2023 წლის ნოემბრიდან „The Luxury Collection”-ის სასტუმროების რუკაზე უკვე თბილისიც გამოჩნდა – „Paragraph Freedom Square, a Luxury Collection Hotel”-ის სახელით.

„პარაგრაფ თბილისი“ ტურიზმის განვითარების ფონდის, რიგით მეორე პარაგრაფის ბრენდის სასტუმროა შეკვეთილის შემდეგ. სასტუმროს საინვესტიციო ჯამური მოცულობა კი 150 მლნ აშშ დოლარს შეადგენს.

წყარო:https://kalaki.ge/