სპორტდარბაზებისა და აუზების წარმომადგენლებმა რუსთაველის მეტროდან საქართველოს მთავრობის ადმინისტრაციამდე მსვლელობა მოაწყვეს. პროტესტის აქციის მონაწილეები ამ ფორმით, კორონავირუსის გამო, დახურული ფიტნეს ცენტრების და საცურაო აუზების გახსნას ითხოვენ.
„მოგვეცით არსებობის შესაძლებლობა, შეგვხვდით, აგვიხსენით და განგვიმარტეთ, ღირსი არ ვართ ელემენტარული პასუხი, რომ მივიღოთ? რატომ არის სატრენაჟორო დარბაზებში ინფექციის გადადების მაღალი რისკი? თუ ტრანსპორტში და რესტორნებში არ არის ინფიცირების საფრთხე ჩვენთან რატომ არის რისკი?“, - აცხადებენ აქციის მონაწილეები.
პროტესტანტები მთავრობის შესაბამის უწყებასთან შეხვედრას და ახსნა-განმარტებას ითხოვენ, თუ რატომ არის სპორტდარბაზებსა და საცურაო აუზებში ინფიცირების მაღალი რისკი და როდის მიცემენ მათ მუშაობის საშუალებას.