12 წელზე მეტია რაც იტალიაში ვმოღვაწეობ. თავდაპირველად მილანში ჩამოვედი სასწავლებლად. მოულოდნელად აღმოვჩნდი უცხო ქვეყანაში, რთული გზის გავლა დამჭირდა. რეპერტუარის რადიკალურად შეცვლა მომიწია.
ახალ მუსიკოსებთან და დირიჟორებთან დავიწყე მუშაობა, ამავე დროს “შერკინება”. პირველი კონტრაქტი ლა სკალას თეატრში გავაფორმე. უცხოეთში მუშაობა ბევრად განსხვავებული აღმოჩნდა იმისგან, რასაც საქართველოში ვიყავი შეჩვეული. იტალიაში სოლისტებთან ერთჯერად კონტრაქტს აფორმებენ, აქ არ არის საშტატო სისტემა. მომიწია საკუთარ თავზე დამოუკიდებლად მუშაობის სწავლა. პასუხისმგებლობა ბევრად მეტია, გავათვიცნობიერე, რომ მაქსიმალურად მომზადებული თუ არ მივიდოდი რეპეტიციაზე, იქ ჩემს ადგილს სხვა დაიკავებდა, ან უბრალოდ, თეატრი მეორედ აღარ ისურვებდა ჩემთან თანამშრომლობას. იტალიაში თითქმის ყველა დიდი თეატრის სცენაზე მაქვს ნამღერი. ყველა გამოსვლას ჩემთვის ერთნაირი დატვირთვა აქვს, ვერ გამოვყოფ ვერც ერთ ჩემს სპექტაკლს ან კონცერტს.
გარდა სიმღერისა, რამდენიმე წლის წინ შევქმნი მუსიკალური ონლაინ ჟურნალი www.iteatridellest.com, რომლის მიზანიც თავდაპირველად იყო იტალიელი მკითხველისთვის გაგვეცნო აღმოსავლეთ ქვეყნების თეატრების სპექტაკლები. საბოლოოდ კი ჟურნალმა დაიპყრო ევროპის მუსიკალური საინფორმაციო ბაზარი. ამჟამად ვთანამშრომლობთ სხვადახვა იტალიელ და უცხოელ მუსიკლურ კრიტიკოსთან. ყოველწლიურად ასევე ვაწყობ საერთაშორისო კონკურსს ახალგაზრდა ვოკალისტებისთვის Salice d'oro, რომლის მიზანიც ახალგაზრდა ნიჭიერი მომღერლების აღმოჩენაა. ჟიურის წევრები წამყვანი თეატრების სამხატვრო ხელმძღვანელები და თეატრალური მენეჯერები არიან. სამწუხაროდ, პანდემიის გამო შარშან კონკურსი ვერ ჩატარდა. იმედია, წელს მოვახერხებთ განხორციელებას და 11-ე გამოშვება გვექნება. პანდემიამ თეატრს განსაკუთრებული ზიანი მოუტანა. ცოტა თეატრი ახერხებს სტრიმინგის საშუალებით სპექტაკლის გადაცემას. სადაც სპექტაკლის ბოლოს აპლოდისმენტის ნაცვლად სამარისებული სიჩუმე ისმის.
მუსიკაში წარმატების განსაზაღვრა რთულია. ალბათ სანამ მოთხოვნადი და სასურველი ხარ მაყურებლისთვის, მანამდე შენი მოღვაწეობა წარმატებულად შეიძლება ჩაითვალოს. ახალგაზრდა მომღერლებს მინდა ვურჩიო, რომ არასდროს დაკარგონ რწმენა. გააგრძელონ საკუთარ თავზე და ტექნიკაზე მუშაობა, როცა შესაძლებლობა მიეცემათ, მზად იყვნენ წარმატებისთვის.
