სლოვაკეთი 23 თებერვლიდან უკრაინისთვის ელექტროენერგიის საავარიო მიწოდებას წყვეტს. ამის შესახებ სლოვაკეთის პრემიერ-მინისტრმა, რობერტ ფიცომ განაცხადა.

„დღეიდან მოქმედებს წესი: თუ უკრაინული მხარე სლოვაკეთს მიმართავს თხოვნით უკრაინის ენერგოქსელის სტაბილიზაციაში დახმარების შესახებ, ის ასეთ დახმარებას ვერ მიიღებს“, - აღნიშნა სლოვაკეთის მთავრობის მეთაურმა.

„ეს არის პირველი საპასუხო ნაბიჯი, რომლის უფლებაც სლოვაკეთის მთავრობას აქვს ყოველგვარი საერთაშორისო წესებისა და ვალდებულებების დარღვევის გარეშე“, - განაცხადა ფიცომ.

„თუ უკრაინული მხარე გააგრძელებს სლოვაკეთის ინტერესების დაზიანებას სტრატეგიული ნედლეულის მიწოდების სფეროში, სლოვაკეთის მთავრობა ასევე გადახედავს თავის მანამდე არსებულ კონსტრუქციულ პოზიციებს უკრაინის ევროკავშირში გაწევრიანებასთან დაკავშირებით და მოამზადებს შემდგომ ზომებს“, - დასძინა მან.

საუბარია ნავთობის მიწოდების აღდგენაზე სლოვაკეთისთვის ნავთობსადენ „დრუჟბას“ მეშვეობით.

ფიცომ ასევე აღნიშნა, რომ უკრაინის პრეზიდენტმა, ვოლოდიმირ ზელენსკიმ შეაჩერა გაზის ნაკადი სლოვაკეთისკენ, რითაც ქვეყანას წელიწადში 500 მილიონი ევროს ოდენობის ზიანი მიაყენა.