სირიის რუსეთის მიერ მხარდაჭერილი მთავრობის საჰაერო თავდასხმებს იდლიბის პროვინციაში სულ მცირე 33 თურქი სამხედრო ემხვერპლა, ხოლო 36 დაჭრილია.
„რა სირცხვილია, რომ დღეს მიწევს იმის თქმა, რომ დაღუპულთა რაოდენობა 33-მდე გაიზარდა“, - აცხადებს ქვეყნის სამხრეთ პროვინციის, ჰატაის გუბერნატორი სატელევიზიო მიმართვის დროს.
თურქეთის პრეზიდენტის, რეჯეფ ტაიფ ერდოღანის მიერ ეროვნული უშიშროების საბჭოს სხდომის გამართვის შემდეგ, საგარეო საქმეთა მინისტრი, მევლუთ ჩავლუშოღლუ ნატოს გენერალურ მდივან, იენს სტოლტენბერს ესაუბრა.
რუსული მედიის ცნობით, ამ დროისთვის თურქეთის არმია, სირიის სამთავრობო ჯარების წინააღმდეგ ინტენსიურ შეტევებს ახორციელებს.
ცნობისთვის, იდლიბის პროვინციის ძირითად პოზიციებზე რუსეთის დახმარებით სირიის მთავრობის ჯარებმა კონტროლი რამდენიმე დღის წინ დაამყარეს. მას შემდეგ თურქეთმა ოპოზიციის მხარდასაჭერად რეგიონში საკუთარი სამხედრო ყოფნა გააძლიერა. რამდენიმე საათის წინ, არაოფიციალურად ვრცელდებოდა ინფორმაცია, რომ თურქეთისა და სირიის აჯანყებულების ჯარებმა იდლიბის პროვინციის საკვანძო ქალაქზე, სარაქიბზე კონტროლი ხელახლა მოიპოვეს და ალეპოდან დამასკოსკენ მიმავალი გზატკეცილი გადაკეტეს.
ერდოღანსა და თურქ მაღალჩინოსან პოლიტიკოსებს შორის კონსულტაციის შედეგად მიღებული იქნა გადაწყვეტილება, რომლის თანახმადაც ანკარამ ოფიციალურად გადაწყვიტა სირიელი ლტოლვილები არ შეაკავოს და გზა გაუხსნას ევროპისკენ. ამის შესახებ წერს არაბული მედია.
თურქული მხარე 72 საათის განმავლობაში თავის სამხრეთის საზღვრებს ხსნის, რომლის შემდეგაც სირიელ ლტოლვილებს შეეძლებათ ევროპისკენ გადაადგილება.
თურქი მაღალჩინოსნების თქმით, ოფიციალურმა ანკარამ უბრძანა პოლიციის, ჟანდარმერიის, საზღვრისა და სანაპიროს დაცვის სამსახურებს, ხელი არ შეუშალონ სირიელი ლტოლვილების მანქანების კოლონებს, რომელთაც ევროპაში სურთ გადასვლა.
ბოლოდროინდელი მონაცემებით დასტურდება, რომ თურქეთმა სამხედრო მდგომარეობა გამოაცხადა, რომლის ფონზეც სპეცსამსახურები, ჟანდარმერია და პოლიცია სამხედრო მდგომარეობისთვის მოემზადონ უნდა. ასევე თურქ ადგილობრივ მაღალჩინოსნებზე დაყრდნობით არსებობს ცნობები იმის შესახებ, რომ ხვალ პარლამენტი იმსჯელებს ასადის რეჟიმისთვის ომის გამოცხადების საკითხზე, რაც იმას ნიშნავს, რომ ახლო აღმოსავლეთში შესაძლოა, ახალი ფართომასშტაბიანი რეგიონალური კონფლიქტი ვიხილოთ.
მიმდინარე დაძაბული სიტუაციის ფონზე ერთ-ერთ ტელევიზიაში ერდოღანის მრჩეველმა მესუტ ჰაკინ ქასინმა განაცხადა, რომ თურქეთი მზადაა რუსეთთან ომისთვის.
„რუსეთი, სადაც 25 მილიონი მუსლიმი ცხოვრობს შიგნიდან დაინგრევა. ჩვენ ადრე 16-ჯერ ვიომეთ რუსეთთან და ახლაც იმავეს გაავაკეთებთ, ჩვენი შურისძიება ძალზე სასტიკი იქნება“ - განაცხადა ქასინმა.