„ევროპული საქართველოს“ საარჩევნო შტაბის ხელმძღვანელის, სერგი კაპანაძის თქმით, შეზღუდვები „საარჩევნო კოდექსში“ უკვე არსებობს, ხოლო ამგვარი ცვლილებით „ქართული ოცნება“ ცდილობს საერთაშორისო დამკვირვებლებს მოაჩვენოს, რომ ხელისუფლება შეზღუდავს ამომრჩეველზე რაიმე ტიპის გავლენას.

როგორც სერგი კაპანაძე ამბობს, ამგვარი შეზღუდვები არ მოქმედებს „ქართული ოცნებისთვის“ და მასთან დაახლოებულ პირებზე და „ამის მრავალი მაგალითი უკვე არსებობს“.

„აი, ამ ინიციატივაზე შეიძლება ითქვას ზუსტად, „ფიცი მწამს, ბოლო მაკვირვებს“. ეს ყველაფერი ისედაც დასჯადი იყო და როგორც ჩანს, უნდა გამოჩნდნენ თეთრი და ფუმფულა საერთაშორისო დამკვირვებლებთან, რომ აი, თურმე კანონში შეაქვთ ცვლილება. მთავარი პრობლემა არის, თუ ამ კანონის შემდეგ როგორ ასრულებენ და ვის მიმართ ასრულებენ. აქამდე არცერთი შემთხვევა არ ყოფილა, რომ „ქართული ოცნების“ მიერ დაშინებული, მოსყიდული ან ამომრჩევლის იძულების გამო მომხარი რაიმე ფაქტი დასჯილიყო. არცერთი შემთხვევა არ ყოფილა, რომ რომელიმე საჯარო მოხელე, ან „ქართული ოცნების“ თანამდებობის პირი ყოფილიყო დასჯილი. ჩვენ გვახსოვს ისეთი დიდი საქმეები, როგორებიცაა მაგალითად, კერძაიას საქმე, როგორიცაა ძალადობა წინასაარჩევნო პერიოდში და არავინ დასჯილა. ალბათ, არც ახლა იზამენ ამას, დარწმუნებული ვარ ამაში, იმიტომ, რომ ეს არის უბრალოდ თვალში ნაცრის შეყრა, რომ რაღაცის გაკეთება ვითომ უნდათ და აპირებენ. რეალური პრობლემა იქნება ამის შემდეგში აღსრულება და ამას ნამდვილად არ აღასრულებენ“, - განაცხადა სერგი კაპანაძემ.

ცნობისთვის, „ქართული ოცნება“ გამოდის ინიციატივით, „საარჩევნო კოდექსში“ შევიდეს ცვლილება, რომლის თანახმადაც, მკაცრი სანქციები განისაზღვრება ამომრჩევლის იძულების, დაშინების და ხმის მიცემის ფარულობის დარღვევის შემთხვევებზე.

ინიციატივის მიხედვითვე, კოდექსში ასევე მითითებული იქნება, რომ მსგავსი დარღვევის შემთხვევაში პირს სისხლის სამართლის პასუხისმგებლობა დაეკისრება.