თბილისის მერიის ბიგ-ბენდის ორგანიზებით, სასტუმრო „შერატონ მეტეხი გრანდ პალასში“, ჯაზის საერთაშორისო დღე აღინიშნა.
ღონისძიებას თბილისის მერის მოადგილე ანდრია ბასილაია და მერიის კულტურის, განათლების, სპორტისა და ახალგაზრდულ საქმეთა საქალაქო სამსახურის უფროსი ირაკლი გვილავა დაესწრნენ.
მსმენელის წინაშე წარდგა თბილისის ბიგ-ბენდი, ფრანგი კომპოზიტორი, დირიჟორი და მესაყვირე ჟან-ლუ ლონიონი, თურქი ჯაზ-ვოკალისტი სიბელ კოსე და ბრიტანეთში სვინგის ელჩად წოდებული ჯეისონ ისააკი.
მსოფლიო დონის მუსიკოსებთან ერთად, თბილისის ბიგ-ბენდმა შეასრულა სპეციალურად ამ დღისთვის შექმნილი პროგრამა, რომელიც მოიცავდა არაერთი ცნობილი ჯაზ-კომპოზიტორის ნაწარმოებს და პოპულარულ კომპოზიციებს განახლებული არანჟირებით.
ჯაზის საერთაშორისო დღე UNESCO-ს გენერალური კონფერენციის გადაწყვეტილებით, 2011 წლიდან ყოველ 30 აპრილს აღინიშნება. უკვე 15 წელია, ჯაზის საერთაშორისო დღისადმი მიძღვნილი ღონისძიება საქართველოშიც იმართება.
