საქართველოს რკინიგზა ფოთი-თბილისი-ფოთის მიმართულებით კვირაში ოთხჯერ რეგულარულ საკონტეინერო ბლოკ მატარებლებს ნიშნავს.

საქართველოს რკინიგზის ინფორმაციით, ბლოკმატარებლები წინასწარ განსაზღვრული გრაფიკით იმოძრავებენ - ფოთიდან 21:30 საათზე გამოვა და თბილისში 09:47-ზე ჩამოვა. შედეგად ტვირთმფლობელები კონტეინერის პორტიდან თბილისში ჩამოტანას უმოკლეს დროში შეძლებენ კონტეინერებით ბლოკ მატარებლის შევსების მიუხედავად. ტვირთმფლობელს წინასწარ ეცოდინება კონტეინერის გამოგზავნის და ტერმინალში მიწოდების დრო.

პირველი ბლოკმატარებელი დღეს ,,თბილისი დრაი პორტში" შევიდა. ადგილზე მას საქართველოს რკინიგზის გენერალური დირექტორი, სატვირთო გადაზიდვების ხელმძღვანელი, "დრაი პორტის" დამფუძნებელი და კომპანია "ემ ეს სი ჯორჯიას" დირექტორი დახვდნენ.

მხარეებმა აღნიშნეს, რომ ეს არის გამარტივებული ლოგისტიკური სერვისი ტვირთმფლობელებისთვის, რომლებიც განსაზღვრულ დროში კონტეინერებს თბილისში და ფოთში შეფერხებების გარეშე მიიღებენ.

"ეს სერვისი არსებითად მნიშვნელოვანია საქართველოს რკინიგზის მომხმარებლებისთვის, რადგან საზღვაო ხაზები მომხმარებლებს აძლევენ კონკრეტულ ვადას რა დროშიც უნდა მოხდეს კონტეინერის უკან დაბრუნება.

ახალი სერვისი ხელს შეუწყობს ფოთიდან თბილისში მომავალი და უკან ცარიელი კონტეინერების ტრანსპორტირების გადმორთვას მანქანებიდან რკინიგზაზე, რაც ერთის მხრივ, სერიოზულად განტვირთავს საავტომობილო გზებს, მეორეს მხრივ კი ნაკლებ ზიანს მიაყენებს გარემოს", - აცხადებენ საქართველოს რკინიგზაში.