მსოფლიოში შაქრის უმსხვილესი ექსპორტიორი ბრაზილიაა. საქართველოც შაქარს ძირითადად ბრაზილიიდან ყიდულობს. 2021 წელს საქართველოში 60.4 მილიონის ღირებულების 120.7 ათასი ტონა შაქარი შემოვიდა.

საქართველომ შესყიდული შაქრის თითქმის ნახევარი 57 ათასი ტონა ($28.2 მლნ) ბრაზილიიდან მიიღო, იმპორტში შემდეგ ადგილებზე თურქეთი ($14.3 მლნ) და პოლონეთი ($10.6 მლნ) არიან.

რაც შეეხება უკრაინას, უკრაინა საქართველოს შაქრის იმპორტში მერვე ადგილზეა ($0.1 მლნ), ხოლო რუსეთი - მეთორმეტეზე ($0.1 მლნ).

დღეს ლონდონის საფონდო ბირჟაზე შაქრის ღირებულებამ ტონაზე 536 დოლარს მიაღწია, რაც ერთწლიან ჭრილში 17%-იან გაძვირებას წარმოადგენს. შაქრის ღირებულება ასეთი მაღალი ბოლოს 2016 წელს იყო.

შაქრის ფასი რუსეთის მიერ უკრაინაში ომის დაწყების შემდეგ, 5%-ით გაიზარდა.

საქსტატის თანახმად, 2021 წლის განმავლობაში საქართველო ერთ ტონა შაქარს საშუალოდ 499 დოლარად ყიდულობდა.

დღეს ცნობილი გახდა, რომ პირველი აპრილიდან საქართველოში არსებული შაქრის ერთადერთი ადგილობრივი ქარხანა "აგარის შაქარი" საქმიანობას განაახლებს. ქარხანა იმპორტირებული ნედლეულით აწარმოებს შაქარს.