,
დედაქალაქის წარმომადგენლობით ორგანოში დოკუმენტს ხელი თბილისის საკრებულოს თავმჯდომარემ, გიორგი ტყემალაძემ და „სპორტის, ტურიზმისა და ახალგაზრდობის საერთაშორისო ფონდის“ პრეზიდენტმა ტარიელ ხეჩიკაშვილმა მოაწერეს.
როგორც საკრებულოს თავმჯდომარემ გიორგი ტყემალაძემ, ღონისძიებაზე განაცხადა, მემორანდუმის გაფორმების შემდეგ დიდი ქართველი სპორტსმენების დაფასების და წარმოჩინების შესაძლებლობა კიდევ უფრო გაიზრდება.
„ჩვენი ხალხი ღვაწლმოსილი და ტიტულოვანი სპორტსმენების მიმართ განსაკუთრებული სიყვარულით და პატივისცემით ყოველთვის გამოირჩეოდა. ამ მემორანდუმის გაფორმების შემდეგ დიდი ქართველი სპორტსმენების დაფასების და წარმოჩინების შესაძლებლობა კიდევ უფრო გაიზრდება. ფონდთან მჭიდრო თანამშრომლობა ხელს შეუწყობს ზოგადად სპორტის და ცხოვრების ჯანსაღი წესის პოპულარიზაციას, ქართული სპორტის ისტორიის უკეთ გაცნობასა და შესწავლას, აგრეთვე ჩვენი სახელოვანი სპორტსმენების მიერ განვლილ გზასა და უდიდეს სპორტულ მიღწევებს გააცნობს მომავალ თაობებს“, - განაცხადა გიორგი ტყემალაძემ.
მემორანდუმის გაფორმების შემდეგ „სპორტის, ტურიზმისა და ახალგაზრდობის საერთაშორისო ფონდის“ პრეზიდენტმა ტარიელ ხეჩიკაშვილმა აღნიშნა, რომ თბილისის საკრებულო თავმჯდომარის, გიორგი ტყემალაძის, ხელმძღვანელობით ძალიან ბევრს აკეთებს ქართული სპორტის განვითარებისა და პოპულარიზაციისთვის, რაც როგორც დამწყები სპორტსმენებისთვის, ისე სპორტის ვეტერანებისათვის ძალიან მნიშვნელოვანია. „მსოფლიოს ბევრი ქალაქი ვერ დაიკვეხნის ისეთი წარმატებით, როგორითაც თბილისი თავისი წარჩინებული და წარმატებული სპორტსმენებით.
ამ მემორანდუმის გაფორმების შემდეგ საკრებულოს მხარდაჭერით შევძლებთ ჩვენი სახელოვანი სპორტსმენების ღვაწლის სათანადო დაფასებას. ყოველივე ეს დამატებით სტიმულს მისცემს ახალგაზრდა სპორტსმენებს. ვფიქრობ, ეს თანამშრომლობა ქართული სპორტის პოპულარიზაციას ფრიად წაადგება“, - განაცხადა ტარიელ ხეჩიკაშვილმა.
ღონისძიებაზე სიტყვით გამოსვლისას საკრებულოს სახელდებისა და სიმბოლიკის კომისიის თავმჯდომარემ, ნინო ვარდოსანიძემ აღნიშნა, რომ თბილისის საკრებულოს სახელდებისა და სიმბოლიკის კომისია წარმატებული სპორტსმენების სახელების უკვდავყოფას აქტიურად ახორციელებს. „ურთიერთთანამშრომლობის მემორანდუმის გაფორმებით ეს პროცესი კიდევ უფრო გააქტიურდება და დარწმუნებული ვარ, რომ ერთობლივად არაერთ საინტერესო პროექტს განვახორციელებთ“, - განაცხადა ნინო ვარდოსანიძემ. მემორანდუმის თანახმად, თბილისის საკრებულო იღებს ვალდებულებას საკრებულოს სახელდებისა და სიმბოლიკის კომისიამ აქტიურად ითანამშრომლოს საერთაშორისო ფონდთან, ღვაწლმოსილი სპორტსმენების შესახებ ინფორმაციის დამუშავებაში გეოგრაფიული ობიექტებისთვის სახელწოდების მინიჭების მიზნით. გარდა ამისა, საკრებულოს შესაბამისი კომისიები აქტიურად ითანამშრომლებენ ფონდთან წარმატებული ქართველი სპორტსმენების ღვაწლის სათანადოდ დაფასების და მათი სახელების უკვდავყოფის მიზნით სხვა სათანადო ღონისძიებების გასატარებლად. თავის მხრივ, „სპორტის, ტურიზმისა და ახალგაზრდობის საერთაშორისო ფონდი“ სპორტსმენების ბიოგრაფიების წარმოდგენისა და შემდგომი ინფორმაციების ერთობლივად დამუშავების ვალდებულებას იღებს.
მემორანდუმი ოთხი წლის ვადით ფორმდება და ძალაში შედის ხელმოწერისთანავე. ურთიერთთანამშრომლობის მემორანდუმის გაფორმების ცერემონიას საკრებულოს წევრები და „სპორტის, ტურიზმისა და ახალგაზრდობის საერთაშორისო ფონდის“ წარმომადგენლები ესწრებოდნენ.
