4 ივნისს საკონსტიტუციო ცვლილებების პირველი საჯარო განხილვა იწყება. უმრავლესობაში ვარაუდობენ, რომ კანონპროექტს სამივე მოსმენით 29 ივნისისთვის მიიღებენ.

დოკუმენტს მმართველი გუნდის სრული მხარდაჭერა ექნება, თუმცა ოპოზიცია კვლავ არ ცვლის ულტიმატუმს. ხელისუფლების ოპონენტები ამბობენ, რომ დიპლომატების წინაშე 8 მარტს დადებული შეთანხმება სრულად უნდა შესრულდეს და გიორგი რურუა პატიმრობიდან გათავისუფლდეს. საკონსტიტუციო ცვლილებებს მხარდაჭერას ოპოზიციური პოლიტიკური პარტიები მხოლოდ ამის შემდეგ გეგმავენ.

საკონსტიტუციო ცვლილებების კომისიაში ოპოზიციისთვის 4 კვოტაა გამოყოფილი. კომისია პარლამენტის თავმჯდომარე არჩილ თალაკვაძის ხელმძღვანელობით იმუშავებს. საპარლამენტო უმრავლესობიდან პარლამენტის თავმჯდომარის გარდა, კომისიის წევრები არიან მამუკა მდინარაძე და ირაკლი კობახიძე.

დადგენილების მიხედვით ოპოზიციიდან კომისიაში შედიან სერგი კაპანაძე, თინა ბოკუჩავა, ირმა ინაშვილი და დამოუკიდებელი დეპუტატი მარიამ ჯაში.

ამასთან, დადგენილების მიხედვით, საყოველთაო-სახალხო განხილვის საორგანიზაიო კომისიის თავმჯდომარე უფლებამოსილია კომისიის სხდომებზე დასასწრებად სხვა პირებიც მიიწვიოს.

„ევროპულ საქართველოს“ ჯერ არ გადაუწყვიტავს, რა ფორმით ჩაერთვება საყოველთაო-სახალხო განხილვის კომისიის მუშაობაში.

საკონსტიტუციო ცვლილებების პროექტის მიხედვით, 2020 წლის საპარლამენტო არჩევნების შედეგად, უმაღლესი საკანონმდებლო ორგანო პროპორციული წესით არჩეული 120 დეპუტატისგან და 30 მაჟორიტარისგან დაკომპლექტდება.