,
საფრანგეთში პნევმონიით დაავადებული ყოფილი პაციენტების ნიმუშების ხელახალი ტესტირების შემდეგ ექიმებმა აღმოაჩინეს, რომ ყოფილი პაციენტებიდან ერთ-ერთს კორონავირუსი ჭირდა. ინფიცირებული პაციენტი პირველად საავადმყოფოში 27 დეკემბერს მიიღეს, საფრანგეთში პირველი დადასტურებული ინფიცირების გამოვლენამდე ერთი თვით ადრე.
ინფორმაცია ამის შესახებ ჟან ვერდიერის სახელობის ჰოსპიტალის რეანიმატოლოგმა ივ კოენმა გაავრცელა. სწორედ მან გამოიკვლია პნევმონიით დაავადებული ძველი პაციენტების ნიმუშები და დაადგინა, რომ ყოფილი პაციენტებიდან ერთ-ერთს კორონავირუსი ჭირდა.
„24 პაციენტის გამოკვლეული ნიმუშიდან ერთ-ერთს კორონავირუსი დაუდასტურდა, პაციენტი 27 დეკემბერს შემოვიდა საავადმყოფოში”,- განაცხადა კოენმა.
მისი თქმით, თითოეული ნიმუში რამდენჯერმე გამოიკვლიეს, უზუსტობის შესამცირებლად.
საფრანგეთში, სადაც კორონავირუსის შედეგად 1 მარტიდან მოყოლებული 25 000-ზე მეტი ადამიანია გარდაცვლილი, ინფიცირების პირველი დადასტურებული შემთხვევა 24 იანვარს გამოვლინდა.
რეანიმატოლოგის აზრით, ჯერ კიდევ ადრეა იმის დადასტურებით თქმა, რომ 27 დეკემბრის პაციენტი პირველი ინფიცირებული ადამიანი იყო საფრანგეთში. თუმცა, ვირუსის გავრცელების დინამიკის კვლევისთვის მნიშვნელოვანია დადასტურებული ინფორმაცია იმის შესახებ, თუ ვინ და როდის დაინფიცირდა ქვეყანაში პირველად კორონავირუსით.
კოენის ცნობით, ინფიცირებული პაციენტი ვირუსს გადაურჩა. ახალი კვლევის შედეგების შემდეგ მედიკოსებმა პაციენტის ინფიცირების წყაროს ძიება დაიწყეს.
„პაციენტი 15 დღის განმავლობაში იყო ავად. მან დაავადება თავის 2 შვილს გადასდო, თუმცა ინფიცირებას გადაურჩა პაციენტის ცოლი, რომელიც სუპერმარკეტში მუშაობს. პაციენტს არ ესმოდა საიდან შეიძლებოდა დაინფიცირებულიყო. მას არ ჰქონდა მოგზაურობის ისტორია. კონტაქტი მას მხოლოდ თავის ცოლთან ჰქონდა”, – განაცხადა რეანიმატოლოგმა.
მისი თქმით, პაციენტის მეუღლე სუპერმარკეტში სუშის ბართან ახლოს მუშაობდა, რომელშიც ჩინელები იყვნენ დასაქმებული. ჯერჯერობით არ არის გამოკვლეული სუშის ბარის თანამშრომლებმა უახლოეს წარსულში იმოგზაურეს თუ არა ჩინეთში, თუმცა, კოენი მიიჩნევს, რომ ადგილობრივმა ჯანდაცვის სისტემის ხელმძღვანელებმა ეს საკითხი აუცილებლად უნდა გამოიკვლიონ.
„ვვარაუდობთ, რომ პაციენტის მეუღლეს ვირუსის ასიმპტომატური ფორმა ჰქონდა”, – განაცხადა რეანიმატოლოგმა.
წყარო: Reuters
ევროკომისიამ ვიქტორ ორბანის მმართველობის პერიოდში გაყინული 35 მილიარდი ევროს განბლოკვის მიზნით პიტერ მადიარს 27 პირობა წაუყენა, - ინფორმაციას Financial Times-ი ავრცელებს.
გამოცემის ინფორმაციით, უნგრეთის საპარლამენტო არჩევნებში გამარჯვების შემდეგ ევროკომისიამ პიტერ მადიარის პარტია „ტისასთან“ მოლაპარაკებები უკვე დაიწყო.
ევროკომისიის მიერ წამოყენებულ პირობებს შორის უნგრეთის მიერ რეფორმების განხორციელება და უკრაინასთან ურთიერთობების გაუმჯობესება შედის.
ევროპელი დიპლომატების განცხადებით, ევროკავშირის წევრი სახელმწიფოები ელიან, რომ პიტერ მადიარის მთავრობა ვიქტორ ორბანის მიერ უკრაინისთვის 90 მილიარდი ევროს სესხის გამოყოფასა და რუსეთის წინააღმდეგ სანქციების ახალ პაკეტზე დაწესებულ ვეტოს მოხსნის.
ასევე, ევროკომისიის წარმომადგენლის ცნობით, 35 მილიარდი ევრო გაყინულია უნგრეთის მოქმედი პრემიერ-მინისტრის ვიქტორ ორბანის მიერ აუცილებელ რეფორმებზე უარის, ასევე, კანონის უზენაესობის დარღვევისა და კორუფციის გაზრდის გამო.
გამოცემა წერს, რომ გაყინული თანხების განბლოკვის მიზნით უნგრეთის ახალ მთავრობას ისეთი წარსული გადაწყვეტილებების გაუქმება მოუწევს, რომლებსაც ევროკავშირი მისი წესების დარღვევად მიიჩნევს.
