რუსულ მედიაში გაჩნდა ინფორმაცია, რომ თავდაცვის სამინისტროს ეგიდით მშენებარე რუსეთის შეიარაღებული ძალების  მთავარი ტაძრის კედლებზე ვლადიმერ პუტინი  გამოსახეს. აღნიშნული ტაძარი მეორე მსოფლიო ომში გამარჯვების დღის აღსანიშნავად შენდება.  

რუსული მართლმადიდებლური ეკლესია განმარტებას აკეთებს ამ ფაქტთან დაკავშირებით. ტაძრის წინამძღოლი ეპისკოპოსის განცხადებით, ეკლესიის ტრადიცია ითვალისწინებს კედლებზე ისტორიული პერსონაჟების გამოსახვას; ხოლო ყირიმის ნახევარკუნძულის რუსეთის შემადგენლობაში შესვლა სწორედ ასეთი რანგის ისტორიული მოვლენაა. ეპისკოპოსმა განმარტება გააკეთა ტაძრის კედლებზე სტალინის გამოსახულებასთან დაკავშირებითაც. „ეს ტაძარი ფაშიზმზე გამარჯვების დღის აღსანიშნავად შენდება, ამიტომ მის კედლებზე აუცილებლად უნდა ყოფილიყო ყველა მნიშვნელოვანი პერსონა და ასევე  სცენები ტრადიციული 9 მაისის აღლუმიდან, მოზაიკური გამოსახულებები პარტიზანების და მეორე მსოფლიო ომის მონაწილეებით. "

ტაძრის მშენებლობის სამხატვრული საბჭოს თავმჯდომარის განცხადებით, ვლადიმერ პუტინისა და რუსეთის თავდაცვის მინისტრის სერგეი შაიგუს გამოსახულებების გაჩენა ტაძრის კედლებზე მასთან შეთანხმებული არ ყოფილა.

ამ ფაქტთან დაკავშირებით კომენტარი გააკეთა რუსეთის პრეზიდენტის პრეს-მდივანმა დიმიტრი პესკოვმაც და განაცხადა, რომ ზუსტად არ იცის, რა გამოსახულებებია მშენებარე ტაძრის კედლებზე.

წყარო: gazeta.ru