,
მოსკოვი თბილისს მოუწოდებს, აფხაზეთისა და სამხრეთ ოსეთის მიმართ ძალის გამოუყენებლობის გარანტიები უზრუნველყოს და მათთან საზღვრის დელიმიტაციის პროცესი დაიწყოს. ეს მოწოდება რუსეთმა ჟენევის მოლაპარაკებების 62-ე რაუნდზე გააკეთა, რომლის დეტალებს რუსეთის საგარეო საქმეთა სამინისტრო აქვეყნებს.
სამინისტროს განცხადებაში აღნიშნულია, რომ 5-6 ნოემბრის შეხვედრაზე, რუსულმა მხარემ, შერიგებაზე თბილისიდან გაჟღერებული სიგნალების, პრაქტიკაში განხორციელების აუცილებლობაზე ისაუბრა. მოსკოვი აღნიშნავს, რომ ხელმოწერა მნიშვნელოვანია მაშინ, როდესაც, სწორედ საქართველოს მთავრობა აღიარებს, რომ კონკრეტულ პოლიტიკურ ძალებს აფხაზეთსა და სამხრეთ ოსეთში "მეორე ფრონტის" გახსნა სურთ. ამასთან, საქართველოს კონსტიტუციაში არსებული პრინციპების გამო, რაც ევროკავშირსა და NATO-ში გაწევრიანებას ითვალისწინებს, ეს შეთანხმებები მნიშვნელოვანია.
"რაც შეეხება "ადგილზე" უსაფრთხოების მდგომარეობას. დისკუსიის მონაწილეთა უმრავლესობის აზრით, ის ზოგადად შედარებით მშვიდია. სასაზღვრო ზონაში სტაბილურობა დიდწილად, შეიძლება, უზრუნველყოფილი იყოს საერთაშორისო დისკუსიების ეგიდით შექმნილი ურთიერთქმედების არხების სტაბილური ფუნქციონირებით. გაეროს გენერალური ასამბლეის უკიდურესად პოლიტიზებული რეზოლუცია "იძულებით გადაადგილებულ პირთა და ლტოლვილთა შესახებ", რჩება "დაბრკოლებად" ჰუმანიტარულ გზაზე", - აღნიშნულია განცხადებაში.
ამასთან, შეხვედრაზე საუბარი შეეხო სოხუმისა და ცხინვალის წარმომადგენლებისთვის გაერო-ში წვდომის არ არსებობასა და აფხაზებისთვის ე.წ. საგარეო პასპორტებით უცხოეთში გადაადგილების აკრძალვას. აფხაზები ითხოვენ, ე.წ. პასპორტით, აფხაზებს მიმოსვლის საშუალება მიეცეთ.
კიდევ ერთი საკითხი, რომელსაც დე-ფაქტო მთავრობები და რუსეთი ითხოვენ, ჟენევის მოლაპარაკებების სხვა ქალაქში გადატანაა. შეთანხმებას ამჯერადაც ვერ მიაღწიეს.
წყარო:https://cominf.org/
"ევროკავშირის არალეგალური, ანტირუსული სანქციების ყველა პაკეტში შეერთების შედეგად, შვეიცარიის ნეიტრალური სტატუსის ფაქტობრივი დაკარგვის გათვალისწინებით, რუსეთის, აფხაზეთისა და სამხრეთ ოსეთის დელეგაციებმა კვლავ პროაქტიურად წამოჭრეს ჟენევიდან მოლაპარაკებების გადატანის საკითხი. მოსკოვი, თავისი მოკავშირეების მუდმივი მხარდაჭერით, აპირებს გააგრძელოს ძალისხმევა ამ ფუნდამენტურ საკითხზე კონსენსუსის მისაღწევად", - აღნიშნულია რუსეთის საგარეო საქმეთა სამინისტროს განცხადებაში.
ჟენევის დისკუსიების შემდეგი რაუნდში მარტში გაიმართება.
პრეზიდენტმა ვლადიმირ პუტინმა განაცხადა, რომ 2025 წელს რუსეთის ეკონომიკური ზრდის ტემპი 1%-მდე შენელდა.
მთავრობის სხდომაზე გამოსვლისას მან აღნიშნა, რომ ეს მაჩვენებელი საგრძნობლად ჩამორჩება წინა წლების დინამიკას. კერძოდ, 2023 წელს 4.1%-იანი და 2024 წელს 4.3%-იანი ზრდა დაფიქსირდა, რაც სამხედრო ხარჯების ზრდის ეფექტით იყო განპირობებული.
პრეზიდენტის თქმით, ეკონომიკური აქტივობის ასეთი შენელება მთავრობისთვის მოსალოდნელი იყო და ის დიდწილად ინფლაციის წინააღმდეგ მიმართულმა ხელოვნურმა ზომებმა განაპირობა. ამ შემთხვევაში, პუტინი ცენტრალური ბანკის მიერ განსაზღვრულ რეფინანსირების განაკვეთზე მიუთითებს, რომელიც 16%-იან ნიშნულზეა.
პუტინმა ხაზი გაუსვა, რომ ცენტრალური ბანკის მიზანმიმართულმა პოლიტიკამ შედეგი გამოიღო და ინფლაცია, რომელიც 2024 წელს 9.5%-ს შეადგენდა, წელს 5.6%-მდე შემცირდა. მისივე პროგნოზით, 2026 წლის ბოლოსთვის ეს მაჩვენებელი 5%-იან ნიშნულამდე დაიწევს.
ეკონომიკური ზრდის შენელების მიუხედავად, კრემლი ამტკიცებს, რომ სახელმწიფო ბიუჯეტი სრულად ფარავს სოციალურ ვალდებულებებსა და სამხედრო საჭიროებებს, მიუხედავად იმისა, რომ რეკორდულად მზარდი ბიუჯეტის დეფიციტი სხვა რეალობაზე მიუთითებს.
ექსპერტთა ნაწილი მიიჩნევს, რომ რუსეთის ეკონომიკურ სტაგნაციას სამუშაო ძალის დეფიციტი, მაღალი საპროცენტო განაკვეთები და დასავლური სანქციების კუმულაციური ეფექტი იწვევს, რომლის სრულ მასშტაბებს უფრო მეტად 2026-27 წლებში ვიხილავთ.
ცნობისთვის, 2026 წლისთვის რუსეთის მთავრობა მშპ-ის 1%-1.3%-იან ზრდას პროგნოზირებს, თუმცა საერთაშორისო სავალუტო ფონდი უფრო პესიმისტურ, 0.8%-იან ზრდის მაჩვენებელს ვარაუდობს.
წყარო: https://bm.ge/
