რუსეთ-უკრაინის ომის შეჯამება 14 სექტემბრის დილის მდგომარეობით

რუსეთ-უკრაინის ომის შეჯამება 14 სექტემბრის დილის მდგომარეობით - გიორგი კობერიძე

дата: 1346

- საინტერესო ვითარებაა კურსკის ოლქში, სადაც რუსებმა კონტრშეტევის შემდეგ რაიონულ ცენტრ კორენოვოს სამხრეთით მდებარე დასახლება სნაგოსტში შეაღწიეს. უკრაინელები დასახლების გასასვლელთან გამაგრდნენ. რუსები სნაგოსტს ოთხი დღე უტევდნენ. მისგან ლუბიმოვკასკენ გადაადგილება აღარ გამოუვიდათ.

ამ ფონზე უკრაინელებმა საზღვარი გლუშკოვოს რაიონში გადაკვეთეს და ვესელოეს უტევენ.

რუსების მიზანი გლუშკოვოს რაიონში, მდინარე სეიმის სამხრეთით ჩარჩენილი ნაწილების გამოხსნაა. უკრაინელების მიზანი კი მათი განადგურება. მთავარი ხიდების არარსებობისა და პონტონების (სამხედრო ხიდების) დაბომბვის ფონზე, უკრაინელები გლუშკოვოში რუსებს არტილერიით უსწორდებოდნენ და თავიანთ რიგებში მსხვერპლი არ ჰქონდათ, მაგრამ რუსული კონტრშეტევის შემდეგ სახმელეთო ოპერაციის დაწყება აუცილებელი ხდება.

- უკრაინული თვითმკვლელი დრონები აქტიურად მუშაობენ კურსკის ოლქში. რადგან რუსები კონტრშეტევაზე დიდი კოლონებით გადაადგილდებიან მათზე ნადირობა არამხოლოდ არტილერიით არამედ დრონების მეშვეობითაც ხორციელდება.

- წითელი ჯვარი ომების ნეიტრალური მხარეა ხოლმე და ჰუმანიტარულ მისიებში მონაწილეობს. ის ჯერ კიდევ 1863 წელსაა შექმნილი, როდესაც იტალიასა და ავსტრიას შორის ომი მიმდინარეობდა. ორგანიზაციის მიზანი დაჭრილთა დახმარება, მშვიდობიანი მოსახლეობისათვის ტვირთის მიწოდება და დაუბრკოლებლად გადაადგილებაა. ამ ფონზე, გუშინ რუსებმა დონეცკის ოლქში წითელი ჯვრის მანქანები და ტვირთი დაბომბეს. ეს კიდევ ერთი სამხედრო დანაშაულია.

- უკრაინაში, ლუგანსკისა და ხარკივის ოლქის საზღვარზე რუსული იერიში მოგერიებულ იქნა, რასაც დიდი რაოდენობით რუსული ცოცხალი ძალა შეეწირა. ორი კვირის წინ უკრაინელებმა წინსვლა შეძლეს ამ მონაკვეთზე. ტერიტორიებზე კონტროლის დასაბრუნებლად რუსებმა კონტრშეტევა მოაწყვეს, თუმცა წარუმატებლად. ამასთან, რუსები ცდილობენ მდინარე ოსიკილზე გასვლას, რათა ერთის მხრივ ბუნებრივ ბარიერს მიაღწიონ, ხოლო მეორეს მხრივ უკრაინული პლაცდარმი მდინარის აღმოსავლეთით ორად გაჰყონ. ამისათვის ისინი ტალღებად უტევენ წელიწადზე მეტია, მაგრამ წარმატებას ვერ მიაღწიეს. მსხვერპლი კი ძალიან დიდი აქვთ.

- დღეს 49 ტყვე სამხედროს გაცვლა მოხდა. სახლში დაბრუნებულ უკრაინელთაგან 15 "აზოვის" ბრიგადის წევრები არიან. ისინი ორი წლის განმავლობაში იმყოფებოდნენ ტყვეობაში.

- დასავლური შეიარაღების რუსეთის ტერიტორიაზე გამოყენების შესახებ ჯერაც არაა მწვანე. აშშ-ში აქტიურად მიმდინარეობს ამაზე მსჯელობა. თუმცა გუშინ პუტინი უშუალოდ დაიმუქრა, რომ თუკი დასავლეთი ამის უფლებას მისცემს უკრაინას, გამოდის რომ თავადაც ხდება ომის მხარეო. ცხადია ეს მუქარა არაფერს ნიშნავს და გვახსოვს რუსული წითელი ხაზები, მაგრამ ამ განცხადებას თავისი აუდიტორია ჰყავს: 1. რუსეთში ხალხს აჯერებენ, რომ ომი ნატოსთან მიდის და არა უკრაინასთან; 2. დასავლეთში აშინებენ პოლიტიკოსებს ომში შესაძლო ჩართვის შესახებ. ზოგი ამას კვლავ იჯერებს.

ამასთან, პრეზიდენტმა ზელენსკიმ დღეს ღიად გააკრიტიკა დასავლეთი და თქვა, რომ როდესაც უკრაინულ ქალაქებს დაუბრკოლებლად ბომბავს რუსეთი და დასავლეთი ამ რაკეტებს არ აგდებს, აუცილებელია კიევისათვის ყველა სახის შეიარაღების მიწოდება და მათ გამოყენებაზე მწვანე შუქის ანთება, რათა უკრაინამ ეფექტურად შეძლოს თავის დაცვა და ომშიც გამარჯვება.

- აშშ-ში კამალა ჰარისმა უკრაინის მხარდამჭერი კამპანია დაიწყო. მისი კამპანიის ლოზუნგია "ჩემთვის არ არის სულერთი თუ რა ხდება უკრაინაში". ამის იდეა კი ტრამპის კამპანიის წინააღმდეგ წასვლაა, რომელიც იზოლაციონიზმს და უსაფუძვლო იდეას ემხრობა "ომის ერთ დღეში დამთავრების შესახებ".

გიორგი კობერიძე

общество

ქონების გადასახადის დეკლარაციის წარდგენის ბოლო ვადაა 1 ნოემბერი. რა უნდა ვიცოდეთ და რა უნდა გავითვალისწინოთ?

თუ თქვენი და თქვენი ოჯახის წლიური შემოსავალი ჯამურად 40 000 ლარს აღემატება და ამასთანავე, გაქვთ სახლი ან მიწა ან ავტომობილი, თქვენ ვალდებული ხართ ბიუჯეტში ქონების გადასახადი გადაიხადოთ.

დაინტერესებული ფიზიკური პირებს, რომელთაც ქონების გადასახადის დეკლარაციის წარდგენა უწევთ, შემდეგი პროცედურები უნდა იცოდნენ:

"1. დეკლარაციის წარდგენის ბოლო ვადაა 2025 წლის 1 ნოემბერი.

2. დეკლარაცია საგადასახადო ორგანოს წარედგინება მხოლოდ ელექტრონული ფორმით (ge), გადასახადის გადამხდელის ავტორიზებული მომხმარებლის გვერდიდან.

3. წელს, უნდა წარადგინოთ 2025 წლის წლიური დეკლარაცია, ამიტომ არ შეუცვალოთ დეკლარაციას პერიოდი პორტალზე.

4. წლევანდელ დეკლარაციაში აისახება:

ა) 2025 წლის 1 აპრილის მდგომარეობით საკუთრებაში არსებული მიწა, ასევე სახელმწიფოს/მუნიციპალიტეტის საკუთრებაში არსებული ის მიწა, რომლითაც სარგებლობთ ან რომელსაც ფლობთ ამავე თარიღის მდგომარეობით;

ბ) 2024 სრული/არასრული წლის განმავლობაში საკუთრებაში არსებული უძრავი ქონება (სახლი, ბინა, ავტოფარეხი, კომერციული ფართი), მსუბუქი ავტომობილები, იახტები (კატარღები), შვეულმფრენები, თვითმფრინავები.

5. თუ ქონება (გარდა მიწისა) 2024 წელს თქვენს საკუთრებაში იყო არასრული წლის განმავლობაში, მასზე ქონების გადასახადის გაანგარიშება ხდება 2024 წლის განმავლობაში ამ ქონების თქვენს საკუთრებაში არსებობის დროის პროპორციულად (თვეების რაოდენობას უთითებთ პორტალზე).