თურქულ გაზეთ „ჰურიეთში“ (Hürriyet) გამოქვეყნებულია სტატია სათაურით „არსებობს თუ არა უკრაინის კრიზისიდან გამოსვლის გზა?“ (ავტორი - ნიგიუნ გიუმეში). „რუსეთ-უკრაინის ომი ევროკავშირისათვის გამოცდა გახდა. ყველა ლიდერს თავისი ინტერესები აქვს - ემანუელ მაკრონს, ურსულა ფონ დერ ლაიენს, ოლაფ შოლცს... და ეს იმ დროს, როცა ამერიკამ უკრაინას დახმარება შეუწყვიტა. სამწუხაროდ, მშვიდობაზე არავინ ლაპარაკობს, თურქეთის გარდა“, - ნათქვამია პუბლიკაციაში.
გთავაზობთ სტატიას მცირე შემოკლებით:
რუსეთ-უკრაინის ომში ესკალაციის ტენდენცია ჯერ კიდევ შენარჩუნებულია. ბუნებრივია, ასეთ სიტუაციაში მშვიდობის დამყარების პროგნოზირება რთულია, თუმცა მაინც შევეცადოთ გავარკვიოთ, თუ რამდენად შესაძლებელია საომარი მოქმედებების მშვიდობიანად დასრულება და საერთოდ, არის თუ არა გამოსავალი უკრაინის კრიზისიდან?
რას ელოდება კრემლი
როგორც ცნობილია, 16-17 მარტს რუსეთში საპრეზიდენტო არჩევნები ჩატარდა და მიღებული ხმების რაოდენობით (87,28% გაიმარჯვა ვლადიმერ პუტინმა. რა თქმა უნდა, მოქმედი პრეზიდენტის გამარჯვება, რომელსაც ჩუმი და შეუმჩნეველი მეტოქეები ჰყავდა, არავისთვის სიურპრიზი არ ყოფილა. უფრო მეტი ყურადღება მიიპყრო ვლადიმერ პუტინის სიტყვებმა, რომლებიც მან გამარჯვების შემდეგ წარმოსთქვა: „რუსეთი უკრაინის მიმართ სამშვიდობო მოლაპარაკების მომხრეა, მაგრამ არა იმიტომ, რომ კიევს საბრძოლო მასალები უმთავრდებაო“.
რას ნიშნავს რუსი ლიდერის სიტყვები? იმ დროს, როცა აშშ-ის საპრეზიდენტო არჩევნებამდე რამდენიმე თვეა დარჩენილი, ხოლო უკრაინის დახმარების საკითხი კონგრესშია „გაჭედილი“ და ადგილიდან არ იძვრის, ყველა ამჩნევს, რომ დონალდ ტრამპის აჩრდილი უკვე დიდ გავლენას ახდენს ამერიკულ პოლიტიკაზე მანამ, სანამ იგი, დიდი ალბათობით, თეთრ სახლში დაბრუნდება. ჰოდა, როცა აშშ-ის ყოფილი პრეზიდენტი ამბობს, რომ სწრაფად მოაგვარებს უკრაინის საკითხს, თან მისი მომხრე რესპუბლიკელები კიევისათვის იარაღის მიწოდებას აყოვნებენ, რუსეთის მოქმედი პრეზიდენტის სიტყვები იმის მანიშნებლად უნდა მივიღოთ, რომ რუსული კრემლის ბინადარი ამერიკული თეთრის სახლის ბინადარის შეცვლას ელოდება, სამშვიდობო მოლაპარაკების დაწყების იმედით.
რას ელოდება ევროპა
ჯო ბაიდენის ადმინისტრაცია, რომელსაც, რესპუბლიკელი კონგრესმენების გამო, არ შეუძლია სათანადო მრავალმილიარდიანი მასშტაბური დახმარების გაწევა უკრაინისათვის, გასულ კვირას განაცხადა, რომ გამონახა 300 მილიონი დოლარი საბრძოლო მასალებისათვის. თუმცა ეს ფული ძალიან ცოტაა და ამ თანხით შეძენილი საბრძოლო მასალები კიევს მხოლოდ რამდენიმე კვირას თუ ეყოფა.
ევროპა ეძებს გზებს, თუ როგორ შეიძლება უკრაინის იარაღით უზრუნველყოფა, მაგრამ იმასაც ელოდება, რომ იქნებ ამერიკელმა რესპუბლიკელებმა უკრაინის დახმარების საკითხში თავიანთი ხისტი პოლიტიკა შეარბილონ. სხვათა შორის, ომი უფრო მეტად ევროპას ემუქრება, ვიდრე ამერიკის შეერთებულ შტატებს.
„მოკრივე“ მაკრონი
რუსეთ-უკრაინის ომი ევროკავშირის გამძლეობას ამოწმებს, რომელიც თავის დროზე მშვიდობიანი პროექტის სახით შეიქმნა, მაგრამ დღეს ალიანსში განხეთიქლება შეინიშნება: საფრანგეთის პრეზიდენტი, რომელიც ადრე, სარგებლობდა რა ვლადიმერ პუტინთან ახლო დამოკიდებულებით, ცდილობდა „მშვიდობის მტრედის“ როლი შეესრულებინა, მაგრამ ბოლოს „ომის მსურველ ქორად“ გადაიქცა და თავისი ნამდვილი სახე აჩვენა, როცა უკრაინის დასახმარებლად დასავლური ჯარების გაგზავნის ვარაუდებზე დაიწყო ლაპარაკი. უფრო მეტიც - მან მოკრივის ხელთათმანები ჩაიცვა და სპეციალურად გადააღებინა ფოტოსურათი - სავარჯიშო „მსხალთან“ კუნთების დემონსტრირებით.
„რკინის ლედი“ ურსულა და ზეწოლის გამძლე ოლაფი
ევროკომისიის თავმჯდომარე (ევროკავშირის „პრემიერ-მინისტრი“) ურსულა ფონ დერ ლაიენი ევროლიდერებს სთავაზობს, რომ ევროპული სამხედრო მრეწველობა დამაჩქარებელი „ტურბოძრავით“ აღიჭურვოს. რასაკვირველია, დღევანდელ მის განცხადებებში ბევრი რამ არის განპირობებული ევროპარლამენტის არჩევნებით, რომლის ჩატარება დაგეგმილია 2024 წლის ივნისში - „ევროპის რკინის ლედი“ ხომ ევროპარლამენტის თავმჯდომარის პოსტზე ასარჩევ კანდიდატს წარმოადგენს.
გერმანიის კანცლერი ოლაფ შოლცი, „მტრედადყოფილ“ და აწ უკვე „ქორადქცეულ“ ემანუელ მაკრონთან შედარებით, უფრო თავშეკავებულია: მართალია, მასზე დიდი ზეწოლა ხორციელდება, მაგრამ ჯერ-ჯერობით უარს აცხადებს კიევისათვის „ტაურუსის“ მიწოდებაზე, თუმცა მხარს უჭერს ტანკებისა და სხვა იარაღის გადაცემას.
მოლაპარაკების ალბათობა
დასავლეთი მთლიანად არის დაკავებული იმით, რომ რაც შეიძლება მეტი იარაღი მისცეს უკრაინას. ამის ერთ-ერთი მიზეზი ისაა, რომ გავრცელებულია აზრი - თუ უკრაინა დამარცხდება და რუსეთი გაიმარჯვებს, მაშინ კრემლი ევროპის სხვა ქვეყნებსაც „დაერევა“.
თურქეთის გარდა, პრაქტიკულად არავინ არ ლაპარაკობს ომის მხარეებს შორის ცეცხლის შეწყვეტასა და მშვიდობისდამყარებაზე. პრეზიდენტმა რეჯებ ერდოღანმა , როცა არჩევნების გამარჯვების შემდეგ ვლადიმერ პუტინს დაურეკა და წარმატება მიულოცა, მან ისევ გამოხატა მზადყოფნა შეასრულოს ნებისმიერი საშუამავლო როლი მოლაპარაკების მაგიდაზე მხარეთა დასაბრუნებლად.
მოვლენების დღევანდელი მდგომარეობის ფონზე რუსეთ-უკრაინის ომი, როგორც ჩანს, კიდევ გაგრძელდება, მაგრამ იარაღის მიწოდების პარალელურად, აუცილებელია ვიმუშაოთ დარეგულირების ახალ ფორმულებზე, რომლებიც მშვიდობისაკენ გზამკვლევების ფუნქციას შეასრულებენ.
წყარო: https://www.hurriyet.com.tr/yazarlar/nilgun-tekfidan-gumus/ukraynada-bir-cikis-var-mi-42429886
გლობალური ფინანსური ქსოვილი სხვადასხვა ტიპის კომპანიების ურთიერთქმედებაზე დგას. ფინანსურ ეკოსისტემაში ვხვდებით, როგორც ბანკებს, ასევე ნეობანკებს და ფინტექ-კომპანიებს, საპენსიო ფონდებს, საგადახდო სერვისების მიმწოდებელ ორგანიზაციებს, კერძო კაპიტალის მმართველებს, ჰეჯ-ფონდებსა და აქტივების მმართველ კომპანიებს. აი, სწორედ ამ ბოლო კატეგორიას განეკუთვნება ამერიკული BlackRock-ი, რომელიც სხვა ადამიანებისა და კომპანიების აქტივებს მართავს, ანუ მარტივად რომ ვთქვათ, ინვესტიციას მათ ნაცვლად დებს. გამართული ბიზნესმოდელის გარდა, ამერიკულ კორპორაციას მაღალი რეპუტაცია, ინვესტორებისთვის ფინანსური სარგებლის გენერირების დეკადების განმავლობაში დამტკიცებული შედეგები და პლანეტარული მასშტაბის კავშირები გამოარჩევს.
ამ ყველაფრის დამსახურებით, BlackRock-ი პლანეტის უდიდეს აქტივების მმართველ კომპანიად იქცა, რომლის პორტფელი, ბოლო შედეგებით, $10.5 ტრილიონად იყო შეფასებული. 2024 წლის პირველი კვარტალის ფინანსური ანგარიშის თანახმად, გასულ ერთ წელიწადში, ამერიკულმა კორპორაციამ აქტივების ზომა $1.4 ტრილიონით გაზარდა. ამ თანხის მასშტაბს რომ მიხვდეთ, გეტყვით, რომ მექსიკის მთლიანი შიდა პროდუქტი სწორედ $1.4 ტრილიონია, როცა ესპანეთის, ინდონეზიის და საუდის არაბეთის - ნაკლები. თუმცა BlackRock-ის ჯამური აქტივების ზომა უფრო შთამბეჭდავია, რადგან ამ მაჩვენებელს ქვეყნების მშპ-სთან თუ შევაფარდებთ, აღმოვაჩენთ, რომ მას მხოლოდ ამერიკის შეერთებული შტატები და ჩინეთი უსწრებს.
რა შემოსავალს და წმინდა მოგებას აგენერირებს BlackRock-ი $10.5 ტრილიონად შეფასებული აქტივების მართვით?
2024 წლის I კვარტალში, BlackRock-მა $4.7 მილიარდის შემოსავალი მიიღო, რაც 11%-ით მეტია, ვიდრე შარშან. შემოსავალთან ერთად, ბოლო პერიოდში მკვეთრად, კერძოდ 36%-ითაა გაზრდილი კომპანიის წმინდა მოგება, რომელმაც მიმდინარე წლის პირველ სამ თვეში $1.5 მილიარდი შეადგინა. აღნიშნულ მაჩვენებლებს, უმეტესწილად, ის ფინანსური ინსტრუმენტები აგენერირებენ, რომელთაც BlackRock-ის პორტფელში ვხვდებით - აქ იგულისხმება, როგორც კომპანიების კაპიტალი, ანუ აქციები, ასევე ფიზიკური აქტივები, მათ შორის უძრავი ქონება.
აქციების კუთხით, BlackRock-ის აქტივებს შორის ყველაზე დიდი წილი მსოფლიოს უდიდეს ტექნოლოგიურ, ფარმაკოლოგიურ და ფინანსურ კომპანიებზე მოდის. BlackRock-ის აქციების პორტფელის ათი უდიდესი პოზიცია კი, შემდეგნაირად გამოიყურება:
#1 - Microsoft - $229.7 მილიარდად შეფასებული 542.02 მილიონი აქცია (BlackRock-ის პორტფელის 5.37%)
#2 - Apple - $178.4 მილიარდად შეფასებული 1.04 მილიარდი აქცია (BlackRock-ის პორტფელის 4.17%)
#3 - NVIDIA - $164.66 მილიარდად შეფასებული 182.42 მილიონი აქცია (BlackRock-ის პორტფელის 3.85%)
#4- Amazon - $115.18 მილიარდად შეფასებული 638.54 მილიონი აქცია (BlackRock-ის პორტფელის 2.69%)
#5 - META - $77.18 მილიარდად შეფასებული 158.94 მილიონი აქცია (BlackRock-ის პორტფელის 1.8%)
#6 - Alphabet (Class A) - $62.77 მილიარდად შეფასებული 415.9 მილიონი აქცია (BlackRock-ის პორტფელის 1.47%)
#7 - Alphabet (Class C) - $54.11 მილიარდად შეფასებული 355.37 მილიონი აქცია (BlackRock-ის პორტფელის 1.27%)
#8 - Eli Lilly - $50.78 მილიარდად შეფასებული 65.27 მილიონი აქცია (BlackRock-ის პორტფელის 1.19%)
#9 - Broadcom - $46.27 მილიარდად შეფასებული 34.91 მილიონი აქცია (BlackRock-ის პორტფელის 1.08%)
#10 - Berkshire Hathaway (Class B) - $45.21 მილიარდად შეფასებული 107.51 მილიონი აქცია (BlackRock-ის პორტფელის 1.06%)
წყარო:https://bm.ge/